JEREMÍAS 29

1Atzun ke yol lu xi t-sama'n Jeremías aju t-sanjel Dios tuj u'j, tu'n tpon max tuj Babilonia cyuc'il ke cytijil xjal akeju itz'xtok ke, cyuc'il ke pal, cyuc'il ke t-sanjel Dios ex cyuc'il mastl xjal aj Jerusalén, akeju otok che'x k'i'n tu'n rey Nabucodonosor, 2texlenxi k'i'n rey Jeconías tuj ttanmi, tuc'ix ttxu' ex keju at cyoclen ttxlaj rey, cyuc'ix ke nejenel tuj Judá ex tuj Jerusalén, cyuc'ix keju ba'n che binchan tcyakil ti'xti tbanilxix, ex cyuc'ix ke tx'inol c'uxbil. 3Aju u'j lu, a Elasa xi k'inte te, aju tcy'ajal Safán, tuc'ix Gemarías aju tcy'ajal Hilcías. Ake jlu, tu'n Sedequías aju rey te Judá e je'x sama'n tu'n cypon tuj Babilonia tuc'il rey Nabucodonosor. Ex chi tyol u'j cyja': 4Ate Kman aju Tajaw Tcyakil ex Cydios aj Israel in tma'n cye cycyakil aj Jerusalén o che pon k'i'n tuj Babilonia, chi cyja': 5Cybinchan jaw cyjaye ex che ank'ine cyuj, cyawan cu'xe cyawale ex che nic'bene ti'j cywitz. 6Che moje'ye ex e ttzaj cycy'ajale ex cyme'jele, icx cye cyc'wa'le e cyjaw moje' ex e ttzaj cyc'wa'l, chmet-x cybaje ma chixin ex mya nok tu'n tcub naj cyajlale. 7Tz'oc tilil cyu'ne tu'n cyten xjal tuj txubtxaj tuj tnam jatum o che pon nsama'ne ex che cubsane nwitze ti'j tnam lu, porque ka ma che ten xjal tuj txubtxaj tuj tnam lu, ax icx cyeye che tele tuj txubtxaj. 8Akine Dios Tajaw Tcyakil ex Cydios aj Israel cxel nma'ne jlu cyeye: Mi'n txi cyk'o'ne ambil tu'n cycub sbu'ne cyu'n keju nno'c cyk'on cyib te nsanjele, mi cyu'n ke chman najl cyxole ex mi'n txi cybi'ne cywitzic' nno'c yec'un tuj cywitz. 9Aju in cyma'n cyeye ka wu'ne o txi nma'ne cye, puro nic'aj yol jlu. Akine Dios in chin k'mante jlu. 10Chi Kman cyja': Ocxi tjapun baj 70 abk'i cyu'ne tuj Babilonia, oc nbincha'ye ba'n cyeye ex cjapunel nyole tu'n cyajtz meltz'aje juntl maj wu'ne tuj lugar lu. 11Porque ba'n wu'ne alcye nximbetze cyi'je; ximan wu'ne tu'n nbinchanteye ba'n cyi'je ex mya tu'n nbinchanteye mya ba'n. In xi nma'ne jlu tu'ntzun tke' cyc'u'je ti'j oybil, porque mas ba'n che tele te yajxitl. Akine Dios in chin k'mante jlu. 12Che cubsaltzune nwitze ex che tzajel yoline wuc'ile tuj na'j Dios, atzun weye che tzajel nbi'ne. 13Che jyole wi'je ex chin cnetele cyu'ne, porque che jyole wi'je tu'n tcyakil cyanmiye. 14Axix toc chin cnetele cyu'ne; che ajetz wi'ne jatum ate'ye ja'lo, che eletz wi'ne cyuj cycyakil nasyon ex cyuj cycyakil lugar jatum o che baj nsputune; che oquel nchmo'ne ex che ajetz wi'ne tu'n cyule juntl maj tuj lugar lu jatum e ex nlajo'ne. Akine Dios in chin k'mante jlu. 15Cyeye in cyma'ne cyja': O che ul t-sama'n Kman ke t-sanjel kuc'il tzalu tuj Babilonia, che chiye. 16Atzunte Kman in tma'n ti'j rey aju k'ukl tuj tk'ukbil David, ex cyi'j ke xjal najlke'x tuj tnam Jerusalén ex cyi'j ke cyermaniye, akeju minti' e je'x k'i'n cyuc'ile: 17Cxel nsama'ne k'oj, we'yaj ex tx'u'j yabil cyibaj. Che oquel wu'ne ic tza'n ke twitz higo k'aynaj ke, ex tu'nju jumajx mya ba'n ke, mlay bant tu'n cyxi' lo'n. Akine Dios Tajaw tcyakil in chin k'mante jlu. 18Chin xel lpe'ye k'ojlel cyi'j ex ctzajel nsama'ne we'yaj ex tx'u'j yabil cyibaj. Wu'ne che jawil sec'paj cycyakil nasyon cyi'j, ctzajel kanin mya ba'n cyibaj, che jawil labin xjal cyi'j ex che oquel nk'o'ne te cytzebl ex te cyxmaybil cycyakil nasyon jatum che bajel nsputune, 19tu'nju minti' xi cybi'n nyole, aju xi k'ma'n cye cyu'n nsanjele ela'xi maj che'x nsama'ne. Ax icx cyeye, minti'x xi cybi'ne. Akine Dios in chin k'mante jlu. 20Atzun cyeye, akeye o che ex k'i'n tuj Jerusalén ex o che pon nsama'ne tuj Babilonia, cybinxe nyole. 21Atzun jlu in tma'n Kman aju Tajaw Tcyakil ex Cydios aj Israel ti'j Acab aju tcy'ajal Colaías, ex ti'j Sedequías aju tcy'ajal Maasías, akeju in che k'mante nic'aj yol cyeye ex in cyma'n ka wu'ne in xi nma'ne yol cye: Che xel nk'o'ne tuj tk'ab Nabucodonosor aju rey te Babilonia, ex cywitzxtzune che bel byo'n. 22Cyja'tzun ke aj Judá, akeju otok che pon k'i'n tuj Babilonia, ka cyaj tzaj cykanin jun mya ba'n cyibaj cyuc'il, cxel cyma'n cyja': Ba'nwt tbincha Kman ti'ja ic tza'n o tbincha ti'j Sedequías ex ti'j Acab tej cycub baj tz'e'y tuj k'ak' tu'n rey te Babilonia. 23Atzunju cbajel cyi'j, tu'nju cybincha mya ba'n cyxol aj Israel: Cybincha aj pajil cyuc'il cyxu'jil cyuc'il, in che nic'an yol, in cyma'n ka wu'ne xi nma'ne ke yol cye, aju in cyma'n cyeye ex minti' xi nma'ne cye. Ba'n jlu wu'ne ex o wile. Akine Dios in chin k'mante jlu. 24Xi tma'n Kman te Jeremías tu'n t-xi tma'n te Semaías aju aj Nehelam cyja': 25Ate Kman aju Tajaw Tcyakil ex Cydios aj Israel chi cyja': Aya xi samante jun u'j cye cycyakil tnam xjal ate' tuj Jerusalén ex te pal Sofonías aju tcy'ajal Maasías, ex cye ke mastl pal, ex chi u'j cyja': 26Ate Kman ma tz'oc k'onte toclena te pal te t-xel Joiada, tu'ntzun tcyaj ten tja Dios tuj tcwenta. Ka at jun loc ma tz'oc ten yolil ic tza'n jun t-sanjel Dios, k'o'ncxa ke tkan tuj toy' tze' ex c'alo'nca tu'n caden. 27¿Tiku'ntzun na'nx tmayet Jeremías tu'na, aju aj Anatot, aju in yolin cywitze ic tza'n jun t-sanjel Dios? 28Porque ma tzul t-sama'n jun u'j kuc'ile tzalu tuj Babilonia chi cyja': Nim abk'i che tele ma chixin, cyja'tzun cybinchan jaw cyjaye ex che tene cyuj ex cyawan cu'xe cyawale ex che nic'bene cyi'j cywitz, chi Jeremías keye tuj u'j, chi Semaías. 29Atzunte pal Sofonías jaw t-sch'in ju u'j lu twitz Jeremías. 30Tzajtzun yolin Kman tuc'il Jeremías cyja': 31Samanxa jun u'j cye cycyakil keju o che'x k'i'n tuj Babilonia, tu'n cybinte ka akine Dios in chin k'mante jlu: Ate Semaías aju aj Nehelam ma yolin cyuc'ile ka wu'ne otok txi nsama'ne, pero nok tten tu'n, ex ma cub ti'j cynable tu'n tu'n toc ke' cyc'u'je ti'j nic'aj yol ma tma. 32Cyja'tzun akine Dios cxel nma'ne jlu: Cbel tcastiw Semaías wu'ne, cyuc'ix ke tiyjil. Mlay che ten ke tiyjil cyxol ke xjal etzan wu'ne ex mi tu'n cy-achin ti'j tzalajbil cxel nk'o'ne cye xjal etzan wu'ne, porque cyu'n ke tyol ma jaw cyi'n cyib ke xjal etzan wu'ne tu'n cyk'ojin wi'je. Akine Dios in chin k'mante jlu.

will be added

X\