JEREMÍAS 28

1Tuj tjwe'yin xjaw te tcyajin abk'i ttzyetlen tcawin Sedequías tuj Judá, ate Hananías aju oc tk'on tib te t-sanjel Dios, aju tcy'ajal Azur ex aj Gabaón, xi yolin te Jeremías tuj tja Kman cywitz ke pal ex cywitz cycyakil tnam xjal, ex xi tma'n te cyja': 2—Ate Kman aju Tajaw Tcyakil ex Cydios aj Israel, chi cyja': Cbel ntokine yuw tcub cyibaje tu'n rey te Babilonia. 3Tuj cab abk'i ja'lo oc nbincha'ye tu'n cyul juntl maj cycyakil ke macbil tuj tja Dios, akeju o che pon ti'n rey Nabucodonosor tuj Babilonia. 4Ax icx oc nbincha'ye tu'n tajtz meltz'aj Jeconías aju tcy'ajal Joacim ex rey te Judá, cyuc'ix cycyakil mastl xjal e ex k'i'n tuj Judá tu'n cypon tuj Babilonia, porque cbel ntokine yuw tcub cyibaje tu'n rey Nabucodonosor, chi Kman, chi Hananías. 5Atzunte Jeremías aju t-sanjel Dios xi ttzak'we'n te Hananías, cywitz ke pal ex cywitz cycyakil tnam xjal ate'cxtok tuj tja Dios: 6—Ba'n, cuchiwt tbincha Kman icju ex tu'n tjapun tu'n akeju yol ma tmaya, tu'n cyul meltz'aj ke macbil tuj tja Dios ex tu'n cyajtz cycyakil xjal o che pon k'i'n tuj Babilonia. 7Masque icju, pero bintza aju cxel nma'ne teya ex cye cycyakil tnam xjal: 8Ke t-sanjel Dios e ten tuj tk'ijlalil ojtxi na'nxtok kul itz'j ke, o cyma tkanil tu'n ttzaj k'oj, c'ixbisabl ex tx'u'j yabil cyibaj nimcu nasyon ex cyibaj ke cawbil nimxix cyipumal. 9Ka at jun t-sanjel Dios in tma'n tkanil tu'n cyten xjal tuj txubtxaj ex ka in japun aju in tma'n, atzun nne'l nic'baj ti'j ka axix toc a Kman in tzaj samante te, chi Jeremías. 10Eltzun ti'n Hananías aju yuw tjax tibaj tkul Jeremías, cub ttokin, 11ex tma cywitz cycyakil tnam xjal: —Chi Kman cyja': Tuj tcabin abk'i ja'lo, cyja'xtzun c'elel wi'ne aju yuw tcub cyibaj cycyakil nasyon tu'n Nabucodonosor aju rey te Babilonia, ex cyja'xtzun cbel ntokine, chi Hananías. Atzunte Jeremías cub be tu'n. 12Tel-lenxi ti'n Hananías yuw tjaxtok tibaj tkul Jeremías, tzaj yolin Kman tuc'il Jeremías ex tma cyja': 13Txi'ya ex k'manxa te Hananías: Akine Dios in chin k'mante jlu: Ma cub ttokina yuw tze', pero te t-xel jlu ma baj nbincha'ne juntl yuw c'uxbil te teya. 14Porque akine Dios aju Tajaw Tcyakil ex Cydios aj Israel in chin k'mante jlu: Ma cub nk'o'ne jun yuw c'uxbil cyibaj cycyakil nasyon, tu'n cyoc te tmajen Nabucodonosor aju rey te Babilonia; icxpe ke txcup te tjak' c'ul o che cyaj nk'o'ne tjak' tcawbil. 15Xitzun tma'n Jeremías te Hananías: —Bintza Hananías. Mya a Kman ma tzaj samante teya, ma cub ti'j cynabl tnam xjal tu'na ex ma ke' cyc'u'j ti'j nic'aj yol in tma'na. 16Cyja'tzun in tma'n Kman: Mi'n tentla twitz tx'otx'. Tuj abk'i lu cymela, porque tu'n tyola ma jaw cyi'n cyib tnam xjal wi'je, chi Dios, chi Jeremías. 17Cyimtzun Hananías tuj twukin xjaw tex abk'i lu.

will be added

X\