JEREMÍAS 27

1Tej ttzyet tcawin Sedequías aju tcy'ajal Josías ex rey te Judá, tzaj yolin Kman tuc'il Jeremías cyja': 2Binchama jun yuw cyuc'ix ke pyal ti'j ex k'on jaxa tibaj tkula, 3ex samanxtzuna jun tkanil cye ke rey tuj Edom, Moab, Amón, Tiro ex Sidón; samanxa cyi'j aj sanjelal ma che ul tuj tnam Jerusalén yolil tuc'il rey Sedequías. 4Ex cxel tma'na cye cyja': Cymanxe cye cyreye: Ate Kman aju Tajaw Tcyakil ex Cydios aj Israel in k'mante jlu: 5Tuc'il nim wipumale bant tx'otx', ex e bant xjal ex ke alumaj ate' twitz tx'otx'; ex alcye jun xjal waje txi nk'o'ne te, jacu txi nk'o'ne. 6Atzun ja'lo ma cyaj nk'o'ne tcyakil tx'otx' lu tjak' tcawbil Nabucodonosor aju rey te Babilonia, aju ajbel weye; ax icx ke txcup te tjak' c'ul ma che cyaj nk'o'ne tjak' tcawbil. 7Cycyakil nasyon che oquex tjak' tcawbil, ax icx tjak' tcawbil tcy'ajal ex tjak' tcawbil tal tchman, pero cpol tk'ijlalil tu'n tocx ttanmi tjak' cycawbil ke nintz nasyon ex tjak' cycawbil ke rey nimxix cyipumal. 8Ex katzun at jun nasyon ex ka jun rey minti' ma tz'ocx tk'on tib tjak' tcawbil Nabucodonosor, akine chin tzajel samante k'oj, we'yaj ex tx'u'j yabil tibaj te tcastiw, ocxi tbaj naj tcyakil tu'n Nabucodonosor. Akine Dios in chin k'mante jlu. 9Atzun cyeye, mi'n txi cybi'ne cyyol keju nno'c cyk'on cyib te nsanjele, mi ke chman, mi ke pjul ti'j witzic', mi keju ba'n che cy'a'n ex mi keju in cyma'n ti cbajel te tibajxi, akeju in cyma'n cyeye: Mlay che ocxe tjak' tcawbil rey te Babilonia. 10Aju in tzaj cyma'n cyeye nok nic'aj yol. Ka ma txi cynimane cyyol, che elex k'i'ne tuj cytx'otx'e tu'n cypone tuj juntl tnam najchak; che bajel nsputune ex che cymele. 11Atzun teju nasyon ma tz'ocx tk'on tib tjak' tcawbil rey te Babilonia ex ka ma tz'ajben te, cxel nk'o'ne ambil cye xjal ax tu'n cycyaj ten ax tuj cytx'otx', tu'ntzun cyank'in tuj ex tu'n cyak'nan twitz. Akine Dios in chin k'mante jlu. 12Akine Jeremías xi nma'ne tcyakil jlu te Sedequías aju rey te Judá: Cyocxe tjak' tcawbil rey te Babilonia, che ajbene te ex che ank'iltzune. 13¿Tiku'n taja tu'n tcyima cyuc'ix ke t-xjalila tu'n k'oj, tu'n we'yaj ex tu'n tx'u'j yabil, ic tza'nx ma tma Kman tu'n tbaj cyi'j cycyakil nasyon minti' ma tz'ocx cyk'on cyib tjak' tcawbil rey te Babilonia? 14Mi'n txi cybi'ne cyyol keju nno'c cyk'on cyib te t-sanjel Dios, akeju in cyma'n cyeye: Mlay che ocxe tjak' tcawbil rey te Babilonia, porque aju in cyma'n cyeye nok tten cyu'n. 15Chi Kman: Mya a kine ma chin tzaj samante cye. In cyma'n ka wu'ne in tzaj nma'ne yol aju in xi cyma'n cyeye, ex nok tten cyu'n. Cyja'tzun che elex nlajo'ne tuj tx'otx' lu ex che cymele cyuc'ix keju ma che k'mante ke yol lu cyeye, chi Kman, nchiye te. 16Ax icx xi nma'ne cye pal ex cye cycyakil tnam xjal cyja': Atzun jlu in tma'n Kman: Mi'n txi cybi'ne cyyol keju nno'c cyk'on cyib te nsanjele, akeju in che k'mante cyeye ka jurat naj che ajetz sama'n ke macbil tuj tja Dios, akeju otok che pon k'i'n tuj Babilonia. Aju in cyma'n cyeye nok tten cyu'n. 17Mi'n txi cybi'ne cyyol, cyocxe tjak' tcawbil rey te Babilonia ex octzun che ank'ile. ¿Ilpetzun ti'j tu'n tbaj xitj tnam lu? 18Ka axix toc nsanjele ke, ex ka ax toc akine o chin yolin cyuc'il, e ttzaj cykanin weye, akine Dios Tajaw Tcyakil, tu'n mi'n t-xi nk'o'ne ambil cye aj Babilonia tu'n t-xi cyi'n ke macbil atx tuj tja Dios, tuj tja rey te Judá ex tuj Jerusalén, chi Kman, chi Jeremías. 19Porque ate Kman aju Tajaw Tcyakil chi cyja' cyi'j ke tkan ja, ti'j ju pil matij k'an c'uxbil ttx'otx'il, cyi'j ke tk'ukbil ex cyi'j mastl macbil otok che cyaj ten tuj tnam lu, 20akeju minti' e je'x ti'n Nabucodonosor aju rey te Babilonia tej tex ti'n Nabucodonosor Jeconías aju tcy'ajal Joacim ex rey te Judá tuj Jerusalén, tu'n tpon ti'n tuj Babilonia junx cyuc'il cycyakil xjal ma' cyoclen tuj Jerusalén ex tuj Judá, 21atzun jlu in tma'n Kman aju Tajaw Tcyakil ex Cydios aj Israel cyi'j ke macbil o che cyaj ten tuj tja Dios ex tuj tja rey te Judá ex tuj Jerusalén: 22Che xel k'i'n tuj Babilonia, ex axtzun che cyjel ten ocxi wajbeye tu'n cyul juntl maj tuj lugar lu. Akine Dios in chin k'mante jlu.

will be added

X\