JEREMÍAS 24

1T-xilenxi k'i'n Jeconías pres tu'n Nabucodonosor aju rey te Babilonia, cyuc'ix ke nejenel tuj Judá, ke calpinter ex ke tx'inol c'uxbil, tzaj tyec'un Kman weye cabe chi'l twitz higo cycub ke twitz tja Dios. Ate Jeconías tcy'ajal Joacim ex rey te Judá. 2Tbanilxix twitz higo tcu'x tuj jun chi'l ic tza'n tnejel twitz higo in che k'anix, atzun juntl chi'l mya ba'n ke twitz higo tcu'x tuj ex jumajx mya ba'n ke, mlay bant cylonjtz. 3Ex tzaj tkanin Kman weye cyja': ¿Ti ma tila Jeremías? Atzun weye xi ntzak'we'ne: Ma wile twitz higo; akeju ba'n, puro tbanil ke, atzun keju mya ba'n, jumajx mya ba'n ke, mlayx bant cylonjtz. 4Tzajtzun tma'n Kman weye: 5Akine aju Cydios aj Israel in nma'ne jlu: Ic tza'n ke twitz higo tbanilxix, cyja'xtzun che elel aj Judá nwitze, akeju o che ex nlajo'ne tzalu ex o che'x k'i'n cyu'n aj Caldey; oc nbinchaye ba'n cye. 6Akine chin oquel tene cwentil cye ex che ul meltz'aj juntl maj wu'ne tuj tnam lu; che tel ba'n wu'ne ex mlay che naj juntl maj wu'ne; ic che oquel ic tza'n jun tze' awa'n ex mlay che jatz nbako'ntle. 7Cxel nk'o'ne cynabl tu'n tel cynic' ti'j ka akine Cyman; che oquel te jun tnam etzan wu'ne, atzun weye chin oquele te Cydios, porque che ajetz meltz'aj wuc'ile tu'n tcyakil cyanmi. 8Atzunte Sedequías aju rey te Judá, cyuc'ix ke nejenel ex mastl xjal najl tuj Jerusalén, akeju otok che cyaj ten ex keju otok che'x k'i'n tuj Ejipt, che oquel wu'ne ic tza'n ke twitz higo mya ba'n ex jumajx mya ba'n ke, mlayx bant cylonjtz. 9Che oquel yaso'n ex che elel ic'un cyu'n xjal cyuj cycyakil nasyon twitz tx'otx', che oquel k'o'n te mya ba'n, te tzebl ex te xmaybil cyu'n xjal, ex ctzajel kanin mya ba'n cyibaj cyuj cycyakil lugar jatum che bajel nsputune. 10Che tzajel nsama'ne xjal k'ojlel cyi'j, ax icx ctzajel nsama'ne we'yaj ex tx'u'j yabil cyi'j, ocxi mi jun tu'n tcyaj ten tuj tx'otx' xi nk'o'ne cye ex cye ktzan cyxe'chel.

will be added

X\