JEREMÍAS 22

1Tzaj tma'n Kman weye cyja': Txi'ya tuj tja rey ex k'manxa tkanil lu: 2Aya rey te Judá, aya k'ukl tocx tuj tk'ukbil David, cyuc'ix ke xjal at cyoclen ttxlaja ex cycyakil xjal najl tuj tnam lu, cybintze tyol Kman cyja': 3Cybinchame aju tz'aklxix ex aju ba'n, cyclome ke xjal tuj cyk'ab keju in che baj yajlan cye, mi'n cybinchaye mya ba'n ex mi'n che elk'ane cyi'j stranjer xjal, mi cyi'j ke c'wa'l minti' cyman, mi cyi'j ke meba xu'j ex mi'n cub cybyo'ne ke xjal minti' cyil. 4Ka axix toc ma cybinchaye aju ma txi nma'ne cyeye, entons ke rey in che ocx ke' tuj tk'ukbil David, cucx che oquetz ttzi tpwertil tja rey cyjax ke cyuj carwaj ex cyibaj chej, cyuc'in cyib cyuc'il ke xjal at cyoclen cytxlaj ex cyuc'ix ke tnam xjal. 5Katzun minti' ma txi cynimane yol lu, cxel nma'ne jun yol axix toc wu'nx wibe, aju tja rey nok ttx'akan cyjel ten. Akine Dios in chin k'mante jlu. 6Porque chi Kman ti'j tja rey te Judá: Ic ttena te weye ic tza'n tx'otx' Galaad, ex ic tza'n twi witz Líbano, pero cxel nma'ne jun yol axix toc ti'ja: C'oquela wu'ne te jun tzkij tx'otx' ex te jun lugar minti' cynajbil xjal tuj. 7Che xel nsama'ne ke xjal banin cyten cyuc'il cymacbil in che ajben tuj k'oj te xitul teya, cbajel cytx'emin ke tkan ja wi'ten tbanilxix che que'yin ex c'oquex cyk'o'n tuj k'ak'. 8Tbajlenxitzun jlu, oc cyic' bet xjal te nimcu nasyon ttxlaj tnam lu cxel cykanin cye cyuc'il: ¿Tiku'n ma tbincha Kman icju ti'j nintz tnam lu? 9Ex ctzajel tzak'we'n cye: Tu'nju minti' ma japun cyu'n aju yol cyaj bant ti'j tu'n Cydios cyuc'il, ma che oc ten c'ulul cywitz ke tilbilal ex ma che ajben cye. 10Mi'n che ok'e ti'j ktzan rey Josías, mi'n che ok'e ti'j tcyimlen; masxix che ok'e ti'j Salum aju tcy'ajal; ma txi k'i'n najchak ex mlay tz'ajtz meltz'aj juntl maj, mlayx tzul meltz'aj tuj tx'otx' jatum ul itz'j. 11Porque chi Kman ti'j Salum aju tcy'ajal Josías aju ktzan rey te Judá, aju cyaj ten te cawil tcyimlenxi ktzan tman ex aju ma tz'ex k'i'n tuj lugar lu: Mlayx tzul meltz'aj, 12nok o'cx max cymel tuj tnam jatum ma pon k'i'n, ex mlayx tz'ajtz meltz'aj juntl maj que'yilte tnam lu. 13Ay bec'bil twitza, aya in jaw tbincha'na tjaya ma' twa'l tu'n sbubl ex mya tuj tumel; in che oc tk'o'na ke xjal ak'nal ti'j ex minti' in xi tchjo'na twi cyc'u'j. 14In tma'na cyja': Cjawil nbincha'ne jun njaye matijxix wen, ela' colin tten ex ma' tuj, cyjel nk'o'ne ventan ti'j, c'oquel nk'o'ne tz'lom tze' wi'ten tujile ex c'oquel nk'o'ne tc'a' cyak que'yin, chiya. 15¿Tu'npetzunju in baj tbincha'na tjaya ti'j tbanil tze' wi'ten c'oquela te jun nintz rey tuj twitza? Aju ktzan tmana o tz'ank'in tuj txubtxaj, o tbincha aju tz'aklxix ex o bet tuj tumel, cyja'tzun puro ba'n ela te te. 16Tuj tumel xi tbincha'n cyi'j meba ex cyi'j keju in che baj yajla'n, ex cyja'tzun ba'n ela te te. O bant tu'n icju, tu'nju el tnic' wi'je. Akine Dios in chin k'mante jlu. 17Atzun teya, o'cx nno'c tilil tu'na tu'n tcambanteya cambabl mya tuj tumel, in che cub tbyo'na ke xjal minti' cyil, in che baj tyajla'na ke t-xjalila ex nne'l ti'na aju at cye, chi Kman te Joacim. 18Cyja'tzun chi Kman ti'j Joacim aju tcy'ajal Josías, aju rey te Judá: Mi a'l jun cjawil ok' ti'j oc tcyim, mi a'l jun cxel tma'n tuj ok'el cyja': Ay Wermaniye, ay Wanbe, ay Nman, ay Tat Rey, che chiwt. 19Cbelex maku'n ic tza'n jun bur, cxel jawo'n ex c'elex xo'n ti'jxi tnam Jerusalén. 20Akeye aj Jerusalén, cyjaxe twi witz Líbano ex cyjaw sch'ine, tjaw tk'ajk'ajel cywi'ye tuj tx'otx' Basán, cyxi sch'ine max cywi' ke tal witz Abarim, porque cycyakil ke tnam mojl cyyole cyuc'il ma che naj. 21In yoline cyuc'ile tuj tk'ijlalil tej txubtxaj ate'ye, pero minti' inx cybine. Ex cyja'x cybinchaye t-xe tnejel, minti' o cyajbeye tu'n t-xi cybine nyole. 22Tu'n cyk'ik' che xel jawo'n cycyakil ke nejenel cyeye ex akeju tnam mojl cyyole cyuc'il che xel k'i'n pres tuj juntl tnam najchak. Entons cbel cych'ixwiye ex cnajel cynable tu'n tlaj tcyakil cybinchbene mya ba'n. 23Akeye txubtxaj ate'ye tuj cyjaye binchamaj ti'j tze' wi'ten tzajni k'i'n twi witz Líbano, che jawil ayayane oc ttzaj c'ixc'oj cyi'je, ic tza'n c'ixc'oj in tzaj ti'j jun xu'j oc nnu'l itz'j tal. 24Chi Kman o tma te Jeconías aju tcy'ajal Joacim aju rey te Judá: Cxel nma'ne jun yol axix toc wu'nx wibe: Masque icwit ttena ic tza'n jun xmulk'abaj in ajben te seyarbil toc ti'j tal nbank'abe, pero c'elel wi'ne, 25ex cxel nk'o'ne tuj cyk'ab aj k'oj ti'ja, akeju in che ximan ti'j tu'n tcub byo'na cyu'n, akeju nimxix in xoba cywitz. Cxel nk'o'ne tuj tk'ab Nabucodonosor aju rey te Babilonia, ex tuj cyk'ab aj Caldey. 26C'elex nlajo'na tuc'ix ttxu'ya ex che xel k'i'ne tuj jun tx'otx' jatum mya a e ul itz'je, ex maxtzun che cymele cycabile. 27Cyja'tzun mlayx che ul meltz'aje tuj tx'otx' nimxix cyganiye tu'n cyul meltz'aje tuj, chi Kman te Jeremías. 28¿Icpe tten Jeconías ic tza'n jun tal xar pa'x mi jun in tzalaj ti'j? ¿Tiku'n ma tz'ex lajo'n cyuc'ix ke tc'wa'l tu'n cyxi k'i'n tuj tx'otx' minti' ojtzki'n cyu'n? 29Aya tx'otx', aya tx'otx', aya tx'otx', bintza tyol Kman: 30Chi Kman cyja': Cytz'iban cu'xe tbi xinak lu cyuj ke libro, mer ic tza'n minti' tc'wa'l, ex tcyakil mya ba'n ma tz'el te te. Porque minti' jun tiyjil c'oquex ke' tuj tk'ukbil David tu'n tcawin juntl maj tuj Judá.

will be added

X\