JEREMÍAS 20

1Tej tbinte Pasur aju tcy'ajal Imer, ex aju pal ex nejenel ma' toclen tuj tja Dios, ka in yolintok Jeremías ti'j yol in tzaj k'ma'n te tu'n Dios, 2xi tma'n tu'n tbaj asyalin Jeremías ex tu'n cyocx k'o'n tkan tuj toy' tze' tcubsa'n ttzi' nintz pwert Benjamín tbi, tcub twitz tja Dios. 3Te juntl k'ij tej t-xi tma'n Pasur tu'n cyetz k'i'n tkan Jeremías tuj toy' tze', xi tma'n Jeremías te: Aju tbiya Pasur ma ch'expet tu'n Kman, ex atzun tbiya ma tz'oc, Magor-misabib, (atzun in tma'n: At xobajil tuj tcyakil part). 4Porque chi Kman: Ctzajel nim xobajil ti'ja wu'ne, ax icx cyi'j cycyakil tamiwoya nok tu'n tlaja; ex twitzxa che bel byo'n tu'n spad cyu'n aj k'oj cyi'j. Che xel nk'o'ne cycyakil aj Judá tuj tk'ab rey te Babilonia tu'n cyxi k'i'n pres tuj Babilonia ex ka tu'n cycub byo'n tu'n spad. 5Ax icx cxel nk'o'ne tcyakil k'inumabl at tuj tnam lu cye aj k'oj, tuc'ix tcyakilju at cye xjal ex ke ti'xti wi'yilxix, ex tcyakil cyk'inumabl ke rey cye aj Judá c'elex cyi'n tu'n t-xi cyi'n tuj Babilonia. 6Atzun teya Pasur, cxel k'i'na pres tuj Babilonia junx cyuc'il cycyakil keju ate' tuj tjaya. Atzun cymela ex atzun cbelex maku'na cyuc'ix cycyakil ke tamiwoya, akeju xi tpacba'na ju yol te sbubl cye, chi Jeremías. 7Aya Nman, ma chin cub t-sbu'na ex ma wak'e ambil tu'n nsbunjtze; tu'nju aya mas cyuw, ma cub wi'je tu'na. Nok te tzebl in chin oque cyu'n xjal tcyakil k'ij; cycyakil in che xmayin wi'je. 8Tcyakil maj oc in chin yoline, in xi nma'ne tkanil tu'n ttzaj yajbil cyuw ex xitbil; coc'x in chin oc ic'le'ne cyu'n xjal ex in chin xmayinjtze cyu'n tu'nju in xi nma'ne tyola cye. 9Ka ma nmaye: Ya mi'n chin ximantle ti'j Kman ex mi'n chin yolintle ti'j ju in tma'n, entons nno'c tyola tuj wanmiye ic tza'n jun k'ak' in naj nim tu'n ex in julin max tuj nbakile. Masque ma tz'oc tilil wu'ne tu'n twe' nyoline, pero minti'x in we' nyoline. 10O nbiye ke xjal in che jasin ex in cyma'n wi'je: At xobajil tuj tcyakil part. Ex che chitl in cyma'n: E kxi' k'ol part ti'j. Cycyakil wamiwoye in che ayon ti'j tu'n njaw tolje ex in cyma'n: Mya yaj cub tz'ak tuj sbubl ku'n, entons cbel ti'j ku'n ex atzun c'oquel kk'o'n t-xel ti'j, che chi. 11Pero aya Nman Dios ata wuc'ile ic tza'n jun soldad mi a'l jun jacu xcye' ti'j; keju in che jyon wi'je tu'n ncube cyu'n, che bel tz'ak ex mlay che xcye' wi'je; cbajel cyipun, cbel cych'ixwi te jumajx ex mlay tzic' tna'njtz. 12Aya Nman Dios aju Tajaw Tcyakil, ke xjal tz'aklxix in che oc tuj malbil tu'na, ojtzki'n cyximbetz xjal tu'na ex aju at tuj cyanmi; waje tu'n tic' nwitze ti'j castiw cbel tk'o'na cyibaj ke xjal lu, porque tuj tcwenta ma cyaj nk'o'ne tu'n t-xi tbincha'na wi'je. 13Che bitzane te Kman ex cynimsa'n jawe tbi, porque a in clonte ju xjal at tbis tuj cyk'ab ke xjal mya ba'n. 14Nokwit ba'n toc te minti' tajben aju k'ij tej wul itz'je. Cuchiwt mya cy'iwla'n aju k'ij tej wul pok'sa'ne tu'n ntxu'ye. 15Cuchiwt cub tcastiw ju xjal o jaw tzalaj nmane tu'n, tej tmante tkanil ka k'a jun tc'wa'l otok tzul itz'j. 16Cuchiwt ic tz'oc xjal lu ic tza'n ke tnam o che baj t-xitun Dios te jumajx. Cuchiwt tbi tk'ajk'ajel cywi xjal in che ok' te prim ex tk'ajk'ajel cywi xjal tuj k'oj te chilcuk'ij. 17Nokwit in cub byo'ne tuj talbil ntxu'ye; awtlo ntxu'ye oc te mukbil weye ex awtlo in cyaj tene tuj talbil ntxu'ye te jumajx. 18¿Tiku'n in etze tuj talbil ntxu'ye nok tu'n tic' nwitze ti'j ta'w yajbil ex ta'w bis ex tu'n tjapun baj ju wank'ible tuj ch'ixbajil?

will be added

X\