JEREMÍAS 19

1Chi Kman weye: Txi'ya lak'ol jun ẍok' xcab tx'otx' ttx'otx'il, ex che tuc'inxa tuc'ila junjun cytijil xjal te tnam ex junjun cytijil pal, 2texa tuj tnam tu'n tpona tuj chk'ajlaj Ben-hinom tbi, tcub tena twitz tpwertil tnam jatum in che ex xo'n ttx'akan c'il, ex atzun k'manxa ke yol cxel nma'ne teya. 3K'manxa cyja': Akeye rey cye aj Judá ex akeye aj Jerusalén, cybintze tyol Kman aju Tajaw Tcyakil ex Cydios aj Israel: Ctzajel nsama'ne jun nintz yajbil tibaj lugar lu ex cycyakil keju che bil ti'j tkanil lu, bi'x c'elel twinkil cyẍcyin tu'n. 4Porque ma tz'el cypa'n cyib aj Israel wi'je, ma tz'ajben lugar lu cyu'n tu'n cyc'ulun cywitz tilbilal nno'c cydiosin mastl nasyon, ex ma cub cypatun storac cywitz junxitl dios minti' ojtzki'n cyu'n, mi cyu'n ke cyxe'chel ex mi cyu'n ke rey cye aj Judá. Ax icx ma che cub cybyo'n nim xjal minti' cyil tuj lugar lu. 5Ax icx ma jaw cybincha'n ke altar tu'n tcub cypatun ke cyc'wa'l tibaj te jun chojbil te Baal, ex baka o txi nma'ne tu'n tbant jlu cyu'n. Misicyer ma cub nximane tu'n tbant icju. 6Cyja'tzun tzul tk'ijlalil mya ax Tofet tbi lugar lu c'oquel ex mya ax Ben-hinom, nok o'cx Chk'ajlaj te Biybil c'oquel tbi. Akine Dios in chin k'mante jlu. 7Tuj lugar lu cbajel ntzpet-sa'ne cyximbetz aj Judá ex aj Jerusalén. Oc nbincha'ye tu'n cycub tz'ak tuj cyk'ab keju in che jyon tumel tu'n cynaj, ex tu'n cycub byo'n tu'n spad cyu'n aj k'oj cyi'j, tu'ntzun tajben ju cyximlal te cychi' c'utz ex te cychi' txcup. 8C'oquel nk'o'ne tnam lu te jun xobajil ex che xmayil xjal ti'j; cycyakil keju che ic'el bet tuj che jawil labin ti'j ex che oquel ten xmayil ti'j porque otok cub xitj. 9Oc nbincha'ye tu'n t-xi cychyo'n xjal ke tal cyc'wa'l, ex cxel cychyo'n ke cyuc'il tu'n tlaj minti' cywa, tu'nju cytxolban cyib aj k'oj ti'jele tnam, akeju in che jyon tumel cyi'j tu'n cynaj cyu'n, chicuya cye, chi Kman. 10Tbajlenxi tma'na jlu, pa'n cubtzuna aju ẍok' cywitzx ke xjal uc'in tu'na, 11ex k'manxa cye: Chi Kman aju Tajaw Tcyakil: Cyja'tzun che telba ke xjal wu'ne tuj tnam lu ex tuj nasyon lu, ic tza'n ma tenba aju ẍok' ma cub pax ex mlay bant tu'n tbaj binchet juntl maj. Che belex cymaku'n ke cyimni tzalu tuj Tofet tu'n tlaj minti' mastl lugar jatum tu'n cycu'x makut. 12Atzun jlu cbantel wu'ne ti'j tnam lu ex cyi'j keju najl tuj. C'oquel nk'o'ne tnam lu ic tza'n lugar Tofet. Akine Dios in chin k'mante jlu. 13Ke ja tuj Jerusalén che oquel nk'o'ne te tz'il, cyuc'ix ke cyja ke rey cye aj Judá, ex ke twi ja jatum in cub cypatun storac cywitz che'w, twitz k'ij ex twitz xjaw, ex jatum in cub cyko'n ta'l twitz uva te jun oyaj te junxitl dios. Ic c'oquel tcyakil jlu ic tza'n lugar Tofet, chi Dios tzaj tma'n te Jeremías. 14Tbajlenxi jlu, ajtz Jeremías tuj lugar Tofet jatum otok txi t-sama'n Kman tu'n tyolin te t-xel, cub we' twitz tja Dios ex xi tma'n cye xjal cyja': 15Ate Kman aju Tajaw Tcyakil ex Cydios aj Israel chi cyja': Ctzajel nsama'ne castiw tibaj tnam lu ex cyibaj tnam cyvesin cyib tuc'il ic tza'n o nmaye, porque ma cub cytzacsin cynabl tu'n mi'n t-xi cyniman nyole.

will be added

X\