JEREMÍAS 17

1Akeye aj Judá, tz'ibamaj cyile twitz cyanmiye ex cyi'j ke cycach cy-altare tu'n tz'kab c'uxbil ttx'otx'il ex tu'n jun tal abj cyuwxix wen diamante tbi. 2Ke cyc'wa'le in tzaj cyna'n ke cy-altare ex ke tze' in che c'ulune cywitz, akeju junx cycub cyuc'il ke tze' nimxix cyxak cywi' ke witz ma' cyjaw, 3ex cywi' ke tal witz cyuj cojbil. Tu'n tlaj cyile oc nbincha'ye tu'n t-xi cyelk'a'n xjal cyk'inumable ex tu'n tel cyetzan ke tal witz in che ajben cyu'ne tu'n cyc'ulune cywitz tilbilal tuj tcyakil cytanmiye. 4C'elel k'i'n tx'otx' cyeye, aju xi nk'o'ne te cyetzbile, ex che oquele te cymajen ke aj k'oj cyi'je tuj tx'otx' minti' ojtzki'n cyu'ne, porque ma tzaj nim ntx'u'jile cyu'ne, ic tza'n jun k'ak' in julin wen ex mlay yupj. 5Chi Kman cyja': Tzajxwit mya ba'n tibaj ju xjal nno'c ke' tc'u'j ti'j juntl xjal, ex nno'c ten kanil onbil te, ex nne'l tpa'n tib wi'je. 6Ic c'oquel ic tza'n jun wi' tal tze' tuj tzkij tx'otx' minti' in pon canun jbal ti'j, in ch'iy tuj tzkij tx'otx' at atz'an tuj jatum mi a'l jun xjal najl. 7Pero cy'iwla'n te xjal k'ukl tc'u'j wi'je ex o'cx k'ukl tc'u'j wi'je. 8Ic c'oquel ic tza'n jun wi' tze' awa'n ttzi nima, ponin tloc' max ttzi a', minti' in tna'n oc in tzaj ta'w cyak ex puro cha'x ctel t-xak tcyakil maj. Ka minti' ma tzaj jbal, minti' in baj tc'u'j ex minti' in xi tcolin tu'n ttzaj tk'o'n twitz. 9Puro sbul cyanmi xjal twitz tcyakil ti'xti ex jumajx mya ba'n. ¿Alcye jun jacu tz'el tnic' ti'j? 10Akine Dios in baj nque'yine tuj cyanmi xjal ex in baj nxpich'une tuj cyximbetz tu'n t-xi nk'o'ne chojbil teyle junjun ic tza'nx tbinchben ex ic tza'nx tak'unben, chi Kman. 11Aju xjal in cnet tk'inumabl mya tuj tumel, ic tten ic tza'n jun tzchin nno'cx pake' cyibaj jos mya te; tuj tmij tabk'iyil cbel naj tk'inumabl ex te mancbil c'oquel te jun xjal minti' tnabl. 12Aju tja Dios at kxol, atzun tk'ukbil tbanilxix oc k'o'n te ma' toclen atxix t-xe tnejel. 13Nman, aya oybil cye aj Israel, ctzajel nim cych'ixwi cycyakil keju ma cyaj colina cyu'n. Cycyakil keju ma tz'el cypa'n cyib ti'ja che bel naj ic tza'n jun biybaj tz'iban tuj kuk, tu'nju tcyajlen colina cyu'n, aya twi a' itz'. 14Chin tk'anin oca Nman ex chin bantele; chin tcloma Nman ex chin cletele, porque o'cx aya in jaw nnimsa'ne tbiya. 15In tzaj cyma'n xjal weye cyja': ¿Ti ma baj ti'j tyol Kman? ¿Jat ma japun? E tjapun bi'x ja'lo. 16Masque ic cyyol, pero minti' ma txi nkanine teya tu'n ttzaj t-sama'na castiw cyibaj ex minti' in wajbe'ne tu'n ttzaj c'ixbisabl cyibaj. Ba'n tu'na alcye o txi nma'ne cye. 17Mi'n tz'oca te xobtzal weye Nman, porque aya colol weye oc ttzaj mya ba'n. 18E tcub cych'ixwi ke aj k'oj wi'je ex mya weye nch'ixwi tu'n tcub. Ake e cyjaw sec'paj ex mya a kine; e ttzaj mya ba'n cyibaj, ex k'ontza yajbil cyuwxix cyi'j. 19Tzaj tma'n Kman weye cyja': Txi'ya ex we'cuya ttzi tpwertil tnam Jerusalén jatum in che ocx ex in che etz ke rey cye aj Judá; ax icx cbantel tu'na cytzi' mastl pwert te tnam. 20K'manxa cye xjal cyja': Akeye aj Judá, cyuc'ix ke cyreye ex cycyakile najl keye tuj Jerusalén, akeye in che ocxi ttzi pwert, cybintze tyol Kman: 21Chi Kman cyja': Ten cycwente ti'j tu'n tjapun k'ij te ojlabl cyu'ne, mi'n tzaj cyi'ne iktz ex mi'n tz'octz cyk'o'ne tuj tnam Jerusalén tuj k'ij te ojlabl. 22Ax icx mi'n tz'etz cyi'ne mi jun iktz tuj cyjaye tuj k'ij te ojlabl ex mi tu'n toc cymaco'ne jun ak'untl, cypa'mile k'ij te ojlabl tu'n cyajbene weye, ic tza'n xi nma'ne cye ktzan cyxe'chele ojtxi. 23Atzun cye minti' inx cybi'n ex minti' inx cyniman, nok o'cx cub cycyuwsa'n cyanmi ex minti' xi cyniman ncawbile. 24Pero ka axix toc ma chinx cynimane, ka mi'n ma tzul cyi'ne iktz ttzi tpwertil tnam tuj k'ij te ojlabl, ka ma tz'el cypa'ne k'ij lu tu'n cyajbene o'cx weye, ex ka mi'n tz'oc cymaco'ne mi jun ak'untl tuj k'ij lu, 25entons cucx che oquetz ke rey cytzi tpwertil tnam lu. Akeju in che cub ke' tuj tk'ukbil David che oquetz cyuj carwaj ex cyjax cyibaj chej, cyuc'in cyib cyuc'il ke nejenel, cyuc'ix ke xjal aj Judá ex ke xjal najl tuj Jerusalén ex cucx che tel xjal tuj tnam Jerusalén. 26Che ul ke xjal najl cyuj ke tnam ate' tuj Judá, cyuc'ix keju ate' ti'jele tnam Jerusalén, keju najl tuj cytx'otx' tiyjil Benjamín, keju najl tuj chk'ajlaj t-xe witz, keju najl tuj tiwitz tx'otx' ex keju najl tuj tx'otx' Néguev. Ctzajel cyi'n cyoyaj tu'n tul tuj tja Dios, ex atzun ke jlu; ke alumaj patun in che cub ex ke mastl chojbil, ke oyaj ti'j twitz awal, storac ex ke oyaj te ak'bil chjonte. 27Katzun minti' ma txi cynimane nleye tu'n tel cypa'ne ju k'ij te ojlabl, tu'n cyajbene o'cx weye ex tu'n mi'n tocx cyk'o'ne iktz tuj Jerusalén tuj k'ij te ojlabl, entons c'oquel nk'o'ne cyk'ak'al tpwertil tnam, che bajel tz'ey ke tja rey tu'n, ex aju k'ak' lu mi a'l jun jacu yupj tu'n.

will be added

X\