JEREMÍAS 16

1Tzaj yolin Kman wuc'ile ex tma cyja': 2Mi'n txi tjyo'n t-xu'jila ex mi'n tzaj tc'wa'la tuj tx'otx' lu, 3porque cxel nma'ne teya alcye cbajel cyi'j ke c'wa'l che ul itz'j tuj tx'otx' lu, ex alcye cbajel cyi'j cytxu' ex cyman. 4Che cymel tu'n yabil xobajilxix ex mi jun c-ok'el cyi'j ex mi jun cbelex makunte cye; cucx che cyjel pale' twitz tx'otx' ic tza'n cytxa' alumaj. Che bel byo'n tu'n spad ex che cymel tu'n we'yaj, cxel chyo'n cyximlal cyu'n ke jil in che lipan twitz cya'j ex ke txcup te tjak' c'ul. 5Ax icx tzaj tma'n Kman weye: Mi'n tz'ocxa tuj jun ja jatum in che bisun xjal ti'j jun cyimni, mi'n ok'a cyuc'il ex mi'n txi tk'ukba'na cyc'u'j, porque ma tz'el nlak'ba'ne nxtalbile, nc'ujlalile ex tk'ak'bil nc'u'je cyi'j ke xjal lu. Akine Dios in chin k'mante jlu. 6Che cymel ke tij xjal ex ke c'wa'l tuj tx'otx' lu, mi jun cbelex makunte cye, mi jun c-ok'el cyi'j, mi jun cbajel tkesin t-ximlal ex mi jun c'elel tc'o'ẍin ti'j twi' tu'n tlaj tbis cyi'j. 7Mi jun cxel k'inte wabj mi c'abj cye keju at cyxilen tuc'il ktzan cyimni tu'n tk'ukbanjtz cyc'u'j, masque a ktzan cyman ex ka ktzan cytxu' otok cyim. 8Ax icx mi'n tz'ocxa tuj jun ja jatum nno'c jun nintz wa'n, mi'n cub ke'ya wa'l ex c'al cyuc'il. 9Porque akine Dios, aju Tajaw Tcyakil ex Cydios aj Israel, cxel nma'ne jlu: Che bel naj ke bitz te nink'ij wu'ne tuj tnam lu, ex bitz te tzalajbil ex ke bitz te mejeble'n; a jlu cbantel wu'ne itz'x keye, ex axkeye che que'yilte. 10Oc t-xi tma'na tkanil lu cye tnam xjal, tzul cykanin teya: ¿Tiku'n ma tzaj tma'n Kman tu'n ttzaj mya ba'n matijxix lu kibaje? ¿Alcyetzun mya ba'n ma kbinchaye? ¿Alcye il o kbinchaye twitz Kman aju Kdios? Che chilo teya. 11Atzun teya cxel ttzak'we'na: Chi Kman: Tu'nju in cyaj coline cyu'n ktzan cyxe'chele, e oc lpe' cyi'j ke tilbilal, e c'ulun cywitz ex e ajben cye, atzun weye in cyaj coline cyu'n ex minti' japun nleye cyu'n. 12Atzun cyeye masxix ma tzic' cybinchbene mya ba'n cywitz ktzan cyxe'chele, porque teyle junjun cyeye ma tz'oc lpe' ti'j ju mya ba'n in tma'n tanmi ex minti' in chinx cynimane. 13Cyja'tzun che elex nlajo'ne tuj tx'otx' lu, ex che xel nlajo'ne tuj jun tnam minti' ojtzki'n cyu'ne ex mi cyu'n ktzan cyxe'chele; atzun che ajbele k'ijl ex konic'an cye txkantl dios ex mlayx tzaj k'ak'an nc'u'je cyi'je. 14Akine Dios in chin k'mante jlu: Tzul tk'ijlalil tu'n mi'n cymatl cyja': Cxel ktziyan jun yol axix toc twitz Kman aju etz k'inte cye aj Israel tuj Ejipt, che chiwt, 15nok o'cx cxel cyma'n cyja': Cxel ktziyan jun yol axix toc twitz Kman aju etz k'inte cye aj Israel tuj tx'otx' tuj tbank'ab k'ij, ex cyuj cycyakil mastl tnam jatum otok che baj t-sputun, che chilo. Che ajetz meltz'aj wu'ne tu'n cyul tuj cytx'otx' aju xi nk'o'ne cye ktzan cyxe'chel ojtxi. 16Akine Dios in chin k'mante jlu: Che xel nsama'ne nim xjal tu'ntzun cytzyet aj Israel cyu'n ic tza'n in che tzyet cyiẍ. Ax icx che xel nsama'ne nim xjal tu'ntzun cytzyet aj Israel cyu'n ic tza'n in che tzyet jil cyu'n cambal, ex che tzyetel cyu'n cywi' cycyakil nmak witz ex cywi' cycyakil tal witz, ax icxpe tuj tpaxil pic jatum cyewan cyib. 17Porque in wile tcyakil cybinchben; minti' jun in cyaj ten tuj ewaj nwitze, ax icx ju cyil mlayx bant txi cyewan nwitze. 18Cbel nk'o'ne cycastiw ic tza'nx cybinchben mya ba'n ex ic tza'nx cyil, porque ma baj cytz'ilsa'n twitz ntx'otx'e cyu'n ke tilbilal cydios cyimni ke, ex ma cybincha nimcu mya ba'n ic'un wu'ne tuj tcyakil tx'otx' etzan wu'ne. 19Aya Nman, aya k'ol wipune ex aya clol weye, ti'ja nno'c nclon wibe tuj tk'ijlalil xobajil; max ttxa'npun tx'otx' che tzajel ke nasyon tu'n cyul tuc'ila ex oc cyma teya cyja': Minti' cyajben ke dios o che c'ulun ktzan kxe'chele cywitz ex minti' cyipun, nok o'cx sbul ke. 20¿Jacupe bant cydios xjal cyu'nx? Jacu, pero mya ax toc Dios ke, chi Jeremías. 21Cyja'tzun, ja'lo cxel nyec'une wipumale cye ex c'eleltzun cynic' ti'j ka akine Dios.

will be added

X\