JEREMÍAS 15

1Chi Kman tma weye: Masque che cubsan Moisés ex Samuel nwitze, pero mlayx tzaj tz'e'y nc'u'je cyi'j ke xjal lu. K'manxa cye tu'n cyel lak'e' nwitze ex e cyxi'. 2Ka ma tzaj cykanin teya tza'n tu'n cyxi', k'manxa nyole lu cye: Akeju banin cyi'j tu'n cycyim, il ti'j tu'n cycyim, akeju banin cyi'j tu'n cycyim tuj k'oj, il ti'j tuj k'oj tu'n cycyim, akeju banin cyi'j tu'n cycyim tu'n we'yaj, il ti'j tu'n we'yaj che cymel, ex akeju banin cyi'j tu'n cyxi k'i'n najchak, il ti'j che xel k'i'n najchak. 3Akine Dios in chin k'mante jlu: Cxel nsama'ne cyaje txcaj castiw cyibaj: Che bel byo'n tuj k'oj, che xel jawo'n cyu'n tx'yan, che xel chyo'n cyu'n c'utz ex che bajel tzakin cyu'n txcup. 4Ctzajel t-xobil cyi'j cycyakil nasyon twitz tx'otx' ti'j ju cbantel wu'ne cyi'j, tu'n tlaj mya ba'n ma tbincha Manasés tuj Jerusalén, aju rey te Judá, aju tcy'ajal Ezequías. 5¿Alcye ctzajel k'ak'an tc'u'j cyi'je, akeye aj Jerusalén? ¿Alcye cbisal cyi'je? ¿Alcye jun ctzajel tkanin cyi'je ka ba'n ate'ye? 6Ma tz'el cypa'n cyibe wi'je ex nok ttzal cyi'je ma tz'ajtz cyk'o'ne nwitze; tu'ntzun jlu ma chin oc tzokpaje cyi'je tu'n cynaje wu'ne, porque ma baj npasense tu'n tk'ak'an nc'u'je cyi'je. Akine Dios in chin k'mante jlu. 7Ma che baj nsputune ke xjal najl tuj Jerusalén ic tza'n ttxa triw, ex ma che ex wi'ne cyuj ke tnam tuj tx'otx' lu; ma che cyaj nk'one ke xjal etzan wu'ne minti' cyc'wa'l, ex ma che naj wu'ne porque minti' ma cyaj cycolin tu'n cybinchante mya ba'n. 8Mas nim meba xu'j ma che cyaj nk'o'ne cyxol ic tza'n ttxa tz'a'n at ttzi mar. Mer te chilcuk'ij tzaj camic wu'ne cyibaj ke txuybaj ex ke cyal cu'xun; nok minaben tzaj bis cyibaj wu'ne, tuc'ix xobajil. 9Ma baj tipun txuybaj at wuk tal, ya minti'tl in jatz t-xew; in ch'ixwi ex bi'x ma naj tnabl; aju t-spic'umal k'ij ma meltz'aj te klolj. Alcye keju ma che cyaj ank'in, cxel nma'ne tu'n cycub byo'n cyu'n aj k'oj cyi'j. Akine Dios in chin k'mante jlu. 10Ay bec'bil nwitze, aya ntxu'ye in ul talina nok tu'n ntene tuj k'oj cyuc'il cycyakil xjal. Mi jun ma tz'el nch'exo'ne pwak te, ex mi jun ma tzaj tkanin tch'ex weye, pero cycyakil in che kanin tu'n ttzaj mya ba'n wibaje. 11O tma Kman cyja': Ax toc ccletela wu'ne tu'n ttena ba'n. Ax toc, wu'ne che ul aj k'oj ti'ja tu'n cycubsan twitza tuj tk'ijlalil oc tul c'ixbisabl ex bis. 12¿Alcye jun jacu tokj tbanil c'uxbil tu'n ex k'an c'uxbil in tzaj tuj tx'otx' tuj tbank'ab k'ij? 13Akeye aj Israel, cxel nk'o'ne cyk'inumable ex cypwake cye aj k'oj cyi'je, tu'n t-xi cyi'n nok cucx tu'n tlaj tcyakil il ma cybinchaye tuj tcyakil cytx'otx'e. 14Che oquel nk'o'ne te cymajen ke aj k'oj cyi'je tuj jun tx'otx' minti' ojtzki'n cyu'ne, porque nimxix nk'oje ma tzaj cyi'je, mer ic tza'n k'ak' bi'x che bajel tz'e'ye tu'n, chi Dios. 15Nman Dios, tcyakil ba'n tu'na, chin tna'ntza ex tzaja onil weye. K'o'nca t-xel cyi'j keju in che jyon wi'je tu'n ncube cyu'n. Mi'n ten tpasensa cyi'j ex mi'n chinx ttzokpi'na tu'n ncyime cyu'n. Ba'n tu'na ka tu'n tlaja in chin oc yaso'ne cyu'n. 16Tej ttzaj yolina weye, cyaj wawa'ne tyola tuj wanmiye, nim o chin tzalaje cyi'j ex e oc te jun tzalajbil tuj wanmiye, porque etzan kine tu'na, aya Nman Dios Tajaw Tcyakil. 17Minti' ma chin tene junx cyuc'il keju in che achin, ex atxix tej woque tuj tcwenta njunalxe in chin bete, ex nim ma tzaj nk'oje tu'n tlaj cyil xjal. 18¿Tiku'n minti'x in baj ta'w c'ixc'oj wi'je? ¿Tiku'n minti' k'anbil ti'j c'ixbisabl weye ex minti'x in k'anit tu'n k'anbil? ¿Maj ic c'oquela te weye ic tza'n jun xoch nna'j tzkij a' tuj? Chi Jeremías. 19In tzajtzun tzak'we'ne tu'n Kman ex tma: Ka ma tz'ajtz meltz'aja wuc'ile, jacutzun nc'ama juntl maj ex jacu tz'ajbentla te weye. Ka mi'n ma yolina ti'j yol nokx gan ex ka o'cx ma yolina ti'j yol at tajben, entons atzuna c-yolil te nxele, porque akeju xjal lu il ti'j tu'n cyajtz meltz'aj tuc'ila, ex mya aya tu'n taj meltz'aj cyuc'il. 20Ic c'oquela wu'ne cye xjal lu ic tza'n jun muro k'an c'uxbil toc ti'j jun tnam ex cyuw tu'n tcub ti'j. Che k'ojel ti'ja, pero mlay cub ti'ja cyu'n, porque akine chin tel tuc'ila te colol ti'ja. 21Cletela wu'ne tuj cyk'ab ke xjal mya ba'n, ex cletela wu'ne tuj cyk'ab xjal tx'u'j cywi'. Akine Dios in chin k'mante jlu.

will be added

X\