JEREMÍAS 14

1Tu'nju minti' tzaj jbal tzaj tma'n Kman te Jeremías cyja': 2In che ok' aj Judá tu'n cybis, minti' xjal at cytzi tpwertil tnam, ma che cub ke' xjal twitz tx'otx' tu'n cybis, in jaw tk'ajk'ajel cywi' aj Jerusalén tu'n ta'w c'ixc'oj. 3In che'x cysama'n cymajen k'inun k'il a'; in che'x ke jlu jatum in chmet a', pero minti' a' in cnet cyu'n ex in che ajtz meltz'aj minti' a' k'i'n cyu'n tuj cyẍok'; puro najni nno'c cynabl, in tzaj cych'ixwi ex nno'c cymuk'an ti'j cywi' tu'n tlaj cybis. 4Ma che'x pax tx'otx', ke xjal ak'nal tuj cojbil ma naj cynabl ex nno'c cymuk'an ti'j cywi' tu'n tlaj cybis, tu'n tlaj minti' jbal. 5Ax icx ke cytxu masat tuj cojbil in cyaj cycolin ke cyal c'itzke'tok cyul-len itz'j, tu'n tlaj minti' c'ul te cywa. 6Ke bur te tjak' c'ul in che cub we' cywi' ke tal witz tz'la'j cyi'j, in xi cysako'n jatum ta' a' ic tza'n xo'j, ex aju tbak' cywitz bi'x nno'c yupj ti'j tu'n tlaj minti' c'ul te cywa. 7Aya Nman, masque ax kile in k'mante tu'n tcub ksentense, pero binchama ki'je tu'ntzun tjaw nimsa'n tbiya. Nimcu maj minti' ma japun tyola ku'ne ex ma ko binchane il twitza. 8Aya oybil cye aj Israel, o'cx aya colol ki'je tuj tk'ijlalil yajbil. ¿Tiku'n ic ttena ic tza'n jun stranjer xjal tuj tnam, ex mer ic tza'n jun betin xjal o'cx in ayon ti'j tu'n tcub k'ij ex nnic' naj? 9¿Tiku'n ic ma tz'oca ic tza'n jun xjal najni tnabl ex ic tza'n jun soldad minti' tipun tu'n tonin? Pero aya Kdiose ex aya at kxole, cycyakil xjal ba'n cyu'n ka etzan ko'ye tu'na; mi'n ko cyaj tcolina, chi Jeremías. 10Atzun jlu in tma'n Kman cyi'j aj Israel: Ke xjal lu nim cygan tu'n cybetje'; cyja'tzun minti' in che tzaj nque'yine tuc'il tzalajbil. Ja'lo ctzajel nna'ne cyil ex cbel cycastiw wu'ne tu'n tlaj cybinchben mya ba'n. 11Tzaj tma'n Kman weye: Mi'n cubsana nwitze tu'n cyxi wonine ke xjal lu. 12Masque cub cyyo'n we'yaj, mlayx tzaj nk'o'n nwi'ye ti'j cykanbetz; masque che cub cypatun ke alumaj ex masque tzaj cyi'n twitz awal te jun oyaj te weye, mlayx nc'ame. Che najel wu'ne tu'n k'oj, tu'n we'yaj ex tu'n tx'u'j yabil, chi Kman weye. 13Atzun weye xi ntzak'we'ne: Aya Nman Dios, ke xjal nno'c cyk'on cyib te t-sanjela in xi cyma'n cye xjal ka minti' tu'n ttzaj k'oj mi we'yaj; nok o'cx tu'n cyten tuj txubtxaj tuj lugar lu. 14Tzajtzun ttzak'we'n Kman weye cyja': Ke xjal lu nok in che nic'an yol ex nokx gan in tzaj cyna'n nbiye. Minti'we ma che tzaj nsama'n, minti'we ma tzaj nma'n cye icju, ex minti' ma chin yoline cyuc'il. Aju in cyma'n cyeye ka at ma cyil ic tza'n tuj witzic', mya ax toc cyu'n, nok sbubl jlu, nok tten cyu'n ex nok tuj cyex cynabl ma jaw jlet jlu. 15Cyja'tzun chi Kman in tma'n cyi'j ke xjal nno'c cyk'on cyib te t-sanjel: Minti' ma che'x nsama'ne ke xjal lu, akeju in cyma'n ka wu'ne in che tzaj nsama'ne, ex in cyma'n ka mi'n tzaj k'oj mi we'yaj tuj tnam lu. Che cymel ke xjal lu tuj k'oj ex tu'n we'yaj. 16Ax icx ke xjal in xi cybi'n cyyol ke sanjel lu, che cymel tuj k'oj ex tu'n we'yaj, cyuc'ix cyxu'jil, cycy'ajal ex cyme'jel. Ke cyximlal cyimni cucx che cyjel pale' cyuj ke cay te Jerusalén ex mi a'l jun cbelex makunte cye. Atzun cbantel wu'ne cyi'j tu'ntzun tchjet cybinchben mya ba'n. 17K'manxa jlu cye xjal: Nne'l ta'l nwitze k'ijtl ex konic'an ex mlayx k'ajen tu'n tlaj yajbil xobajilxix ma tzaj cyi'j ke nxjalile, ex tu'nju puro cyuw c'ixbisabl ma tzaj cyi'j. 18Ka ma chin exe tuj cojbil, in wile cyximlal ke cyimni otok che cub byo'n tu'n spad; ka ma chin ocxe tuj tnam, in che wile ke xjal cyja' cycyim tu'n we'yaj. Tza'nx keju oc cyk'on cyib te t-sanjel Dios ax icx ke pal, nok e betje' ex minti' el cynic' ti'j, chicuya, chi Dios te Jeremías. 19Aya Nman, ¿maj te jumajx ma che el tic'una aj Judá? ¿Mapetzun baj tganiya cyi'j aj Sión? ¿Tiku'n ma ko baj tc'ixbisa'na ex minti'x in ko banixe tu'na? In ko ayontoke tu'n ktene tuj txubtxaj, pero misicyer ba'n ma kc'ame. In ko ayontoke tu'n kbanixe, pero nok o'cx xobajil at. 20Aya Nman, ma tz'el knic'e ti'j kbinchbene mya ba'n ex aju mya ba'n cybincha ktzan kxe'chele; ma ko binchane il twitza. 21Pero nok tu'n tjaw nimset tbiya, mi'n ko el tic'una, mi'n cub tk'o'na tch'ixwi tk'ukbila ma' t-xilen. Na'ntza aju yol cyaj bant ti'j tu'na kuc'ile, ex japunx tu'na. 22¿Atpetzun jun tilbilal cydios xjal cyuj mastl nasyon jacu tzaj jbal tu'n? ¿Tu'nxpelo cya'j in tzaj jbal? Mi'n. Tu'na in tzaj t-sama'na, aya Kmane ex Kdiose, tu'na in bant tcyakil jlu; cyja'tzun o'cx ti'ja k'ukl kc'u'je.

will be added

X\