JEREMÍAS 13

1Tzaj tma'n Kman weye: Txi'ya ex lak'ometza jun c'albil c'u'jbaj binchamaj tu'n nok' lino, k'o'nca tc'u'ja, pero mi'n tz'oc tac'sa'na tu'n a'. 2Etz nlak'o'ne c'albil c'u'jbaj ic tza'nx otok tzaj tma'n Kman weye ex oc nk'o'ne nc'u'je. 3Tzajtzun yolin juntl maj Kman wuc'ile ex tzaj tma'n cyja': 4K'inxa ju c'albil c'u'jbaj ma tz'etz tlak'o'na, aju toc tc'u'ja, txi'ya ttzi nima Éufrates ex ewanxa tuj jun tpa'xil pic ma chixin, chi Kman weye. 5Inxtzune ttzi nima Éufrates ex xi we'wane c'albil c'u'jbaj ic tza'nx otok tzaj tma'n Kman weye. 6Tejtzun tel nim k'ij tzaj tma'n Kman weye: Txi'ya ttzi nima Éufrates ex k'intza c'albil c'u'jbaj, aju xi nma'ne teya tu'n t-xi tewacja ma chixin. 7Inxtzune ttzi nima Éufrates ex jatz wi'ne c'albil c'u'jbaj jatum otok cu'x we'wane, pero otok k'ay ex minti'tok ch'in tajben. 8Tzajtzun yolin Kman juntl maj wuc'ile ex tma cyja': 9Cyja'xtzun cnajel wu'ne aju cynimbil cyib aj Judá tuc'ix nimxix cynimbil cyib aj Jerusalén. 10Akeju tnam xjal lu binchal mya ba'n ke, cyc'i' txi cyniman ke nleye, nok o'cx in cub cycyuwsa'n cyanmi ex ma che'x lpe' cyi'j ke tilbilal tu'n cyajben cye ex tu'n cyc'ulun cywitz, ic cyten ic tza'n c'albil c'u'jbaj lu, minti' ch'in tajben. 11Ic tza'n jun xjal nno'c tkitz'in jun c'albil c'u'jbaj tmij, cyja'tzun e tena cycyakil aj Israel wu'ne cyuc'ix cycyakil aj Judá, e oc nchmo'ne wi'je tu'ntzun cyoc te jun tnam etzan wu'ne, tu'n tel tkanil wi'je cyu'n, tu'n cyajben te nimal te nbiye ex tu'n njaw nimsa'ne cyu'n. Pero minti' ma chinx cyniman. Akine Dios in chin k'mante jlu. 12Icx k'manxa cye: Ate Kman aju Cydios aj Israel in tma'n cyja': Ka ma cu'x k'ot ta'l twitz uva tuj jun ẍok', il ti'j tu'n tnoj wen. Atzun cye aj Israel ctzajel cytzak'we'n teya: ¿Myapetzun ba'n ku'ne cycyakil ẍok' il ti'j tu'n cynoj tu'n ta'l twitz uva? 13Atzun teya cxel ttzak'we'na cye: Chi Kman cyja': Cyja'xtzun cchyo'l cywi' cycyakil keju najlke tuj tnam lu wu'ne; ke rey, akeju in che cub ke' tuj tk'ukbil David, ke pal, keju nno'c cyk'on cyib te nsanjele ex cycyakil keju najlke tuj Jerusalén. 14Ex che najel wu'ne ic tza'n in che pax ke ẍok' jun ti'j juntl; tza'nx ke mambaj ax icx ke c'wa'lbaj che najel. Mlayx tzaj k'ak'an nc'u'je cyi'j; che najel wu'ne ex mlayx tzaj tz'ey nc'u'je cyi'j tu'n mi'n cynaj. Akine Dios in chin k'mante jlu. 15Akeye aj Israel, ma baj yolin Kman. Mi'n jaw cyniman cyibe, che txulecuye bilte tyol. 16Cynimsa'n jawe tbi Kman aju Cydiose na'nxcu ttzaj klolj tu'n, na'nxcu cyjaw tolje cywi witz tuj klolj ex na'nxcu toc te kloljxix aju spic'un in che ayone ti'j. 17Katzun minti' ma txi cybi'ne jlu, chin ok'ele cyi'je tuj ewaj, tu'n tlaj cynimbil cyibe chin ok'ele nimxix, porque ke xjal etzan tu'n Kman che xel k'i'n pres. 18K'manxa te rey ex te ttxu': Cycu'tze tuj cyk'ukbile ex che kecuye twitz tx'otx', porque aju cycoroniye tbanilxix tjax tuj cywi'ye ma cu'tz tz'ak. 19Ke tnam ate' tuj tx'otx' Néguev ma che lamet ex mi jun ba'n tjakonte cye. Cycyakil aj Judá ma che'x k'i'n tuj juntl tnam najchak. 20Cyque'yin jaw cywitze ex cyque'yinxe ke aj k'oj cyja' cytzaj tuj tx'otx' tuj tbank'ab k'ij. ¿Jatum ate' ke xjal otok che'x nk'o'ne tuj cycwente, akeju cyxjalile nim o che tzalaje cyi'j? Chicuya cye chi Kman. 21¿Ti cxel cyma'ne akeye aj Jerusalén oc cyocxe tjak' cycawbil ke xjal, akeju ax keye e xnak'tzante cye tu'n cyoc te cyamiwoye? Tzul ta'w cyi'je ic tza'n jun xu'j oc nnu'l itz'j tal. 22Ex ka ma tzaj cykanine tiku'n in baj cyi'je icju, ba'n tu'n tel cynic'e ti'j ka tu'n tlaj cyile nimxix. Cyja'tzun ma che oque ic tza'n jun xu'j ma tz'el k'i'n t-xbalun toc ti'j, icxtzun cyeye ma che cyaj skiteye cyu'n. 23¿Jacupe tz'oc ttz'umal jun xjal k'ek te sak? ¿Jacupe ch'expet que'yin ttzmal jun tigre? Cyja'xtzun cyeye mlay cybinchaye ba'n porque ma che nak'ete tu'n cybinchanteye mya ba'n. 24Cyja'tzun che bajel nsputune ic tza'n in jaw ikan mu'p tu'n cyk'ik' tuj tzkij tx'otx'. 25Atzun cbajel cyi'je akeye aj Israel, atzun chojbil cyeye wu'ne ti'j cybinchbene. Ma tzic' nna'njtze cyu'ne ex ma tz'oc ke' cyc'u'je cyi'j ke tilbilal nokx gan ke. Akine Dios in chin k'mante jlu. 26Ax icx weye c'elel wi'ne tcyakil cyxbalune toc cyi'je, tu'ntzun tcub cych'ixwiye. 27O che oque aj pajil, minti' ma che oc lpe'ye wi'je. O wile in che c'ulune cywitz ke tilbilal tuj cojbil ex cywi witz, a jlu ic'unxix wu'ne. Ay bec'bil cywitze akeye aj Jerusalén. ¿Jtoj ba'n t-xi cycoline tu'n cybinchanteye mya ba'n? Chi Kman.

will be added

X\