JEREMÍAS 12

1Tz'aklxix teya Nman tu'n woc tene yolil tuc'ila, ex masque icju, waje txi nkanine junjun nxjele teya: ¿Tiku'n ba'n nne'l tcyakil cye ke xjal binchal mya ba'n? ¿Tiku'n tuj txubtxaj in che ank'in ke xjal in che ximan tu'n cybinchante mya ba'n cyi'j cyuc'il? 2Tu'na ma che oc ic tza'n jun wi' tze' in cu'x awa'n, in xi' tloc', in ch'iy ex nno'c twitz. Akeju xjal lu nok tu'n cytzi' in tzaj cyna'n tbiya, atzunju cyanmi najchak ta' ti'ja. 3Atzun teya Nman, ojtzki'n kine tu'na; in chin tque'yina ex ba'n tu'na alcyechak nximbetze ti'ja. K'inxa ke xjal lu ic tza'n in che'x k'i'n ke ẍne'l tuj biybil cye, che tpa'n ela alcye k'ij tu'n cycyim tu'na. 4¿Jte'tltzun k'ij ctel tx'otx' te tzkij ex tu'n tten c'ul te tzkij tuj cojbil? Ma che cyim ke jil ex ke chyu'j tu'n tlaj cybinchben xjal mya ba'n, akeju najl tuj tx'otx' lu, porque in cyma'n: Mi'n til Jeremías alcye cbajel ki'j, che chi. 5Ka nimxix in sicta oc tjaw ojkelina cyuc'il xjal, ¿tza'ntzun tten tu'n t-xcye'ya tu'n tkelina cyuc'il xjal cyjax cyibaj chej? Ka in jaw tolja tuj chk'ajlaj, ¿titzun cbantel tu'na tu'n tbeta tjak' chc'ul ttzi nima Jordán? 6Axpe ke termaniya ex ke xjal at t-xilena cyuc'il ma jaw cyi'n cyib tu'n cyk'ojin ti'ja, in che sch'in ti'ja tuc'il cyk'oj. Mi'n tz'oc ke' tc'u'ja cyi'j, masque che tzaj yolin teya tuc'il yol puro ba'n. 7Ma che cyaj ncoline ke xjal etzan wu'ne, ma cyaj ncoline wetzbile. Aju tnam o nc'ujlaye ma txi nk'o'ne tuj cyk'ab aj k'oj. 8Aju tnam oc te wetzbile, ja'lo ic tten te weye ic tza'n jun balun te tjak' chc'ul, in tzanun wi'je; cyja'tzun ma tz'el wic'une. 9Aju tnam etzan wu'ne ic tten ic tza'n jun chyu'j tbanilxix que'yin ttzmal, aju in che oc tzokpaj txkantl chyu'j ti'j. Cytzaje cycyakile akeye txcup te tjak' c'ul, cychmon oc cyibe tu'n cychyo'ne ti'j. 10Ma baj naj tkan n-uvaye cyu'n nimcu nejenel cye aj k'oj, ma baj cywaban aju cojbil etzan wu'ne, aju ntx'otx'e tbanilxix ma tz'oc cyu'n te jun tzkij tx'otx', 11ax toc ma cyaj cyk'o'n te jun tzkij tx'otx' ex ma cyaj ten tuj bis. Tcyakil tx'otx' ma tz'oc te tzkij tx'otx' ex mi a'l jun in tzaj tbis ti'j. 12Cywi' cycyakil tal witz tuj tzkij tx'otx' e tzaj aj k'oj xitul tcyakil, porque akine Dios tu'n nspadiye che najel cycyakil tnam ex mi jun ctel tuj txubtxaj. 13Cu'x cyawa'n triw, pero aju twitz jaw cyi'n puro ch'i'x, tcyakil cyak'unben nokx gan. Tzaj cych'ixwi tu'nju misicyer twitz awal ma chmet cyu'n tu'n tlaj nimxix ntx'u'jile. 14Chitzun Kman in tma'n cyi'j ke tnam binchal mya ba'n, akeju cyvesin cyib cyuc'il aj Israel, ex akeju ma che el k'inte cytx'otx' aju tzaj tk'o'n Kman te cyetzbil: Akine chin elex k'inte cye tuj cytx'otx' ex che eletz wi'ne aj Judá cyxol. 15Pero cyetzlenxi wi'ne, tzul k'ak'an nc'u'je cyi'j ex che ul wi'ne juntl maj tujx cytx'otx' ex tujx cytanmi. 16Ax toc, ake jlu e je'x xnak'tzante cye ke xjal etzan wu'ne tu'n t-xi cyma'n jun yol axix toc twitz tilbilal Baal, pero ka ax toc ma txi cyocslan cyocslabl ke xjal etzan wu'ne, ex ka ma tz'ajben nbiye cyu'n oc t-xi cyma'n jun cyyol axix toc, ex ka ma cyma cyja': Cxel ktziyane jun yol axix toc twitz Kman, entons ba'n ax tu'n cyten cyxol ke xjal etzan wu'ne. 17Katzun at jun nasyon minti' ma chinx tniman, cjawitz nbako'ne ic tza'n jun wi' tze', ex bi'x cnajel wu'ne. Akine Dios in chin k'mante jlu.

will be added

X\