JEREMÍAS 11

1Tzaj yolin Kman wuc'ile, akine Jeremías, ex tzaj tma'n cyja': 2Bintza ke yol lu, akeju cyaj bant ti'j wu'ne cyuc'il aj Israel, ex k'manxa cye aj Judá ex cye ke xjal najlke tuj Jerusalén. 3K'manxa cye: Chi Kman aju Cydios aj Israel cyja': Ctzajel mya ba'n tibaj ju xjal minti' ma txi tniman aju yol cyaj bant ti'j wu'ne cyuc'il ktzan cyxe'chele 4tej cyetz wi'ne tuj tnam Ejipt, jatum e ten ic tza'n tuj jun jorni jatum in bant c'uxbil. Xi nma'ne cye: Chin cynimanxe, cybinchame tcyakil aju cxel nma'ne cyeye, ex atzun keye che oquel te jun tnam etzan wu'ne, ex atzun weye chin oquele te Cydiose, 5tu'ntzun tjapun wu'ne aju yol xi ntziyane cye ktzan cyxe'chele, tu'n t-xi nk'o'ne cytx'otx' k'inun tx'otx' ex tbanilxix jatum ate'ye ja'lo, chi Dios tma weye. Atzun weye xi ntzak'we'ne: Ictzunju Nman. 6Tzajtzun tma'n Kman weye: K'manxa ke yol lu cyuj ke tnam te Judá ex cyuj ke cay te Jerusalén: Chi Kman cyja': Cybintze alcye yol cyaj bant ti'j wu'ne cyuc'il ktzan cyxe'chele ex japunx cyu'ne. 7Tej cyetz wi'ne cyxe'chele tuj Ejipt, xi nma'ne cye tu'n t-xi cyniman kine; atxix ojtxi ax icx ja'lo cucx t-xi nma'ne cye icju. 8Pero minti' ma chinx cybi'n ex minti' ma chinx cyniman, nok o'cx teyle junjun ma cub tcyuwsa'n tanmi tu'n tbinchante mya ba'n ic tza'n tma tanmi; minti' cyajbe tu'n tjapun cyu'n aju otok txi nma'ne cye, cyja'tzun tzaj nk'o'ne mya ba'n cyibaj, ic tza'nx ju yol cyaj bant ti'j wu'ne cyuc'il. 9Atzunte Kman tzaj tma'n weye: Ma moje' cyyol aj Judá ex ke xjal najlke tuj Jerusalén tu'n tjaw cyi'n cyib wi'je. 10Minti' xi cyniman nyole, ax ma cybincha ic tza'n cybincha ktzan cyxe'chel. Ma che'x lpe' cyi'j txkantl dios mya Dios ke, tu'n cyc'ulun cywitz. Tza'nx ke aj Israel, ax icx ke aj Judá ma che ic' tibaj nleye, aju cyaj bant ti'j wu'ne cyuc'il ktzan cyxe'chel. 11Cyja'tzun ctzajel nsama'ne jun c'ixbisabl cyi'j ex mlayx che tzokpaj tuj. Masque che cubsan nwitze, mlayx che tzaj nbi'ne. Akine Dios in chin k'mante jlu. 12Che xe'ltzun ke aj Judá ex ke xjal najl tuj Jerusalén kanil onbil cyuc'il ke tilbilal nno'c cydiosin, akeju in cub patun storac cywitz, pero mlayx che clet cyu'n ke jlu oc ttzaj c'ixc'oj cyi'j. 13Akeye aj Judá: Ic cyajlal cydiose at ic tza'n cyajlal cytanmiye, ex ic tza'n cyajlal ke cay tuj tnam Jerusalén, icxtzun cyajlal ke altar ma jaw cybincha'ne tu'n tcub cypatune storac twitz Baal aju tilbilal jumajx ic'bilxix. 14Tu'ntzun jlu, aya Jeremías, mi'n na'ntla Dios cyi'j ke xjal lu, ex mi'n cubsana nwitze cyi'j, porque mlayx che'x nbi'ne oc ttzaj cykanin onbil weye oc ttzaj c'ixbisabl cyi'j. 15Ke xjal c'ujla'n wu'ne, nim mya ba'n in cybincha'n. ¿Titzun cyoclen tu'n cyocx tuj njaye? Tuj cyximbetz ka tu'nju in tzaj cyk'o'n chojbil ex chibj weye c'ic'ex ti'j tu'n ttzaj castiw cyibaj. ¿Ba'npe tu'n tjaw cyniman cyib ti'j jlu? 16Tuj tk'ijlalil ojtxi toctok cybi wu'ne: Jun tkan olivo nimxix t-xak ex nimxix twitz tbanil che que'yin, atzun ja'lo c'oquel tk'ak'al t-xak wu'ne tuc'il jun tk'ajk'ajel cyuwxix wen, ex che bajel ntokine ke tk'ab. 17Akine Dios aju Tajaw Tcyakil, aju cu'x awante cyeye, ma txi nma'ne tu'n ttzaj mya ba'n cyibaje tu'n tlaj tcyakil mya ba'n ma cybinchaye, akeye aj Israel ex aj Judá. Ma tzaj nk'oje cyi'je tu'nju ma cub cypatune storac twitz Baal, chi Dios. 18Ma tzaj tyec'un Kman tu'n tel nnic'e ti'j cyximbetz aj k'oj in bant cyten tu'n cybinchante mya ba'n wi'je. A Kman jakonte nwitze tu'n tel nnic'e cyi'j ti in baj cye wi'je. 19Ic ntene ic tza'n jun tal ẍne'l mans in xi k'i'n tuj biybil te, minti' ba'n wu'ne ka in che jyontok tumel tu'n cyoc tzokpaj wi'je. In cyma'ntok cyja': E tnaj xinak lu ku'n ic tza'n in jaw tx'emit jun wi' tze' tuc'ix twitz; kbyonc tu'ntzun mi jun cucx ttzaj na'nte tbi. 20Pero aya Nman aju Tajaw Tcyakil, aya Jwes tz'aklxix, ojtzki'n tu'na cyximbetz xjal max tuj cyanmi, k'ontza ambil weye tu'n toc nque'yine oc tcub cycastiw ke xjal lu tu'na, porque tuj tcwenta ma txi nk'o'ne aju in baj wi'je. 21Ke xinak aj Anatot in che jyon tumel tu'n ncub byo'ne cyu'n, ex in cyma'n weye tu'n mi'n nyoline ti'j tyola cye; katzun mi'n, o'cx tu'n ncub byo'ne cyu'n. 22Cyja'tzun, ate Kman aju Tajaw Tcyakil chi in tma'n cyi'j ke xinak lu: Cbel cycastiw wu'ne; ke cu'xun che cymel tuj k'oj, ke cycy'ajal ex ke cyme'jel che cymel tu'n we'yaj. 23Mi jun cye cyjel ank'in, porque tzul tk'ijlalil tu'n ttzaj jun mya ba'n cyibaj ke xinak te tnam Anatot, ex cbel cycastiw wu'ne, chi Kman.

will be added

X\