JEREMÍAS 1

1Ke tyol Jeremías aju tcy'ajal Hilcías. Ate Jeremías cyiyjil jun c'loj pal najl tuj tnam Anatot tuj cytx'otx' tiyjil Benjamín. 2Tuj toxlajin abk'i ttzyetlen tcawin rey Josías tuj Judá, tzaj yolin Kman tuc'il Jeremías. Ate Josías tcy'ajal Amón. 3Ax icx o yolin Kman tuc'il Jeremías tuj tk'ijlalil tej tten Joacim aju tcy'ajal Josías te rey tuj Judá, ex cucx tzaj yolin tejxi tjapun baj junlaj abk'i tcawin juntl tcy'ajal Josías tuj Judá, aju Sedequías tbi, ex tuj tjwe'yin xjaw te abk'i lu tej cyex k'i'n aj Jerusalén tuj cytanmi, tu'n cyxi' k'i'n tuj juntl tnam najchak. 4Tzajtzun yolin Kman wuc'ile ex tma: 5Na'nxtok toc tena tuj talbil ttxu'ya ya otok jaw nsc'o'na, ex na'nxtok tul itz'ja ya otok tz'el npa'na, ex bi'x banimaj wu'ne tu'n toca te nsanjele, tu'n t-xi tma'na nyole cye xjal ate' cyuj txkantl nasyon, chi Kman weye. 6Atzun weye xi ntzak'we'ne: Ay Tat, ma c'wa'lx kine ex mlay bant nyoline. 7Atzunte Kman tzaj tma'ntl weye: Mi'n tmaya ka ma c'wa'lxa. Cxe'la nok jatum oc t-xi nsama'na, ex cxel tma'na tcyakilju cxel nma'ne teya. 8Mi'n xoba cywitz xjal, porque akine chin tel tuc'ila te clol teya, chi Kman tzaj tma'n weye. 9Tzajtzun tnukpi'n Kman tk'ab ex oc tmaco'n ttxo'w ntzi'ye ex tma: C'oquex nk'o'ne nyole tuj ttzi'ya. 10Ja'lo cxel nk'o'ne toclena cyibaj ke cawbil ex cyibaj ke nasyon, tu'n cyjatz baket ex tu'n cycub xitit, tu'n cynaj ex tu'n cycub k'uchj, ax icx tu'n cyjaw binchet ex tu'n cycu'x awat. 11Tzajtzun yolin Kman wuc'ile ex tzaj tkanin weye: ¿Titzun ma tila Jeremías? —Ma wile jun tk'ab tze' almendro, nchiye xi ntzak'we'ne. 12Ax toc tu'na, chi Kman, tzaj tma'n weye. Cyja'tzun tten c'oquel ncwente ti'j tu'n tjapun nyole. 13Tzaj yolin Kman wuc'ile tcabinmaji'n ex tma: ¿Ti ma tila? —Ma wile jun c'il tuj tx'otx' tuj tbank'ab k'ij, in lokin a' tuj ex ch'ix ttzaj pich'k'aj twi' cubni, nchiye xi ntzak'we'ne. 14Tzajtzun tma'n Kman weye: Max tuj tx'otx' tuj tbank'ab k'ij ctzajel ket yajbil cyibaj cycyakil xjal najl tuj tnam lu. 15Akine in chin cyuwsante yol lu: Che tzajel ntxco'ne cycyakil nasyon ate' tuj tx'otx' tuj tbank'ab k'ij. Che ul ke cyrey ex cbel cyk'o'n cyk'ukbil te cycawbil ax ttzi tpwertil tnam Jerusalén, twitz tcyakil muro toc ti'jele ex cyi'jele cycyakil tnam ate' tuj Judá. 16Atzun cycastiw ke binchal il cbel nk'o'ne, akeju ma tz'el cypa'n cyib wi'je, ma cub cypatun storac, ex ma che oc ten c'ulul cywitz junxitl dios, akeju cyu'nx in baj cybincha'n. 17Atzun teya, tenx tipuna, txi'ya ex k'manxa cye tcyakilju cxel nma'ne teya. Mi'n xoba cywitz; katzun ma xoba, wu'ne ctzajel lu'luna cywitz. 18Ja'lo, aya c'oquel nk'o'ne ic tza'n jun tnam toc muro ti'j, ic tza'n jun tkan ja c'uxbil ex ic tza'n jun muro k'an c'uxbil, tu'ntzun tten tipuna tu'n tcub we'ya cywitz cycyakil xjal aj Judá: Cywitz ke cyrey, cywitz ke nejenel cye, cywitz ke cypal ex cywitz cycyakil xjal. 19Che oquel ten k'ojlel ti'ja, pero mlay cub ti'ja cyu'n, porque akine chin tele tuc'ila te colol ti'ja, chi Kman weye.

will be added

X\