Santiago 5

1Cybintze jlu akeye k'inun. Che ok'e ex che wu'yine tu'n tlaj ju cybise tzul. 2Aju cyk'inumable ma k'ay, ex aju cyxbalune tbanilxix ma baj twa'n poc'. 3Aju k'an pwak tuc'ix sak pwak at cyuc'ile ma acomix ti'j, ex aju acom c'oquel te testiw cyi'je ka mya ba'n keye, ex cbajel twa'n acom cychibjale ic tza'n tu'n k'ak'. Ma baj cychmo'ne cyk'inumable tuj mancbil k'ij, ex atzun mancbil tk'ijlalil ja'lo. 4Akeju majen jaw chmonte twitz cyawale in che sch'in tu'n tlaj e cub cysbu'ne, minti' chjet twi cyc'u'j cyu'ne; ex ju tk'ajk'ajel cywi' keju jaw chmonte twitz cyawale ma canun tuj t-ẍcyin Kajaw, aju Tajaw tcyakil. 5Ma che ank'ine tuj achbil twitz tx'otx' ex ma che achine; ma cyc'a'cha cyc'u'je ic tza'n ke alumaj in che c'a'chanjtz tu'n cycub byo'n, icx cyeye ch'ix tul canun k'ij tu'n cycub byone. 6Ke xjal minti' cypaltil, cub cyk'o'ne cysentens ex cub cybyo'ne, ex minti' e k'ajt cywitze. 7Cyja'tzun erman ten cypasense, che ayone ocxi tul Kajaw. Cyximancuye ti'j ju ak'nal in ayon ti'j ju twitz awal tbanilxix, at pasens tu'n tayon alcye k'ij tu'n tul canun ttzi jbalil ax icx alcye k'ij tu'n tjaw jbal. 8Ax icx cyeye ten cypasense ex cycyuwsam cyanmiye, porque in lak'ex ttzaj tk'ijlalil tu'n tul Kajaw. 9Erman, mi'n che yoline mya ba'n ti'j juntl cyxolxe, tu'n mi'n cyoque tuj xjel; porque lu at Dios ttzi pwert, aju Jwes. 10Akeye wermaniye, cyna'ntze cyi'j ke t-sanjel Dios e yolin ojtxi, porque sama'n ke tu'n Kman; cyna'ntze nic'pun ic'x cyu'n, ex o ten cypasens. 11In kma'n, at tzalajbil cye keju nnic'x cyu'n. O cybiye ti'j Job, o ten nim tpasens, ex o cybiye aju tbincha Kman te te mancbilxi; porque ate Kman nim in k'ak'an tc'u'j ex in tz'e'y tc'u'j ki'j. 12Pero aju mas ilxix ti'j erman, mi'n tzaj cyna'ne tbi Dios ti'j jun cyyole, mi'n tzaj cyna'ne cya'j, ex mi'n tzaj cyna'ne tx'otx', ex mi'n tzaj cyna'ne juntl; nok o'cx tu'n cymanteye oc, pero ax toc oc; ex ka tu'n cymanteye mi'n, pero ax toc mi'n, tu'ntzun mi'n cycyaje tjak' sentens tu'n Dios. 13Ka at jun in bisun cyxole, ba'n tu'n tna'n Dios. Ex ka at jun in tzalaj, ba'n tu'n tbitzan. 14Ka at jun yab cyxole, ba'n tu'n cytzaj txquet ke ansyan cyxol ocslal, ex tu'n cyna'n Dios ti'j yab ex tu'n toc cyk'o'n aseyt ti'j, tu'nju at cyoclen tu'n Kajaw. 15Ka k'uklxix cyc'u'je ti'j Dios oc cyna'ne Dios, cbanixel ju yab ex cjawil waban tu'n Kajaw; ex ka at il otok tbincha, cnajsetel til. 16Cyja'tzun, cypa'n jatz cyile cyxolxe, ex che na'ne Dios cyi'je cyxolxe tu'ntzun cybanixe. Aju tna'j Dios ju xjal tz'aklxix at nim tipumal ex nim in tbincha'n. 17Ate Elías t-sanjel Dios, ic ttzajlen ic tza'n ke; ex o na'n Dios cyuwxix tu'n mi'n ttzaj jbal, ex minti' tzaj jbal twitz tx'otx' tuj ox abk'i tuc'il kak xjaw. 18Ex juntl maj o na'n Dios, ex tzajtzun jbal twitz cya'j, ex tzajtzun twitz tawal tx'otx'. 19Erman, ka at jun cyxole ma tz'el txalpuj ti'j ju yol ax toc, ex ka ma tz'ajtz meltz'aj tu'n juntl erman, 20tz'elx cynic'e ti'j jlu, ka at jun erman ma tz'ajtz meltz'aj jun aj il tu'n, tu'n tcyaj tk'o'n ju tbe mya ba'n, oc cletel tanmi xjal tu'n tu'n mi'n tcyim, ex tcyakil til xjal cnajsetel.

will be added

X\