Santiago 4

1¿Tiku'n at k'oj cyxole ex in che k'ojle? ¿Myapetzun tu'n tlaj ju cyachbile? Axju cyachbile in k'ojin cyi'je. 2In pon cyc'u'je ti'j nimcu ex minti' in cnet cyu'ne; cyja'tzun in cub cybyo'ne jun xjal. Nim in pon cyc'u'je ti'j te juntl, ex minti' in cnet cyu'ne; cyja'tzun nno'c tilil cyu'ne tu'n tcub ti'j juntl ex in che k'ojine ti'j. Minti' in cnet cyu'ne aju cyajbile, porque minti' in xi cykanine te Dios. 3Ex ka ma txi cykanine, mlay tzaj k'o'n cyeye, porque mya tuj tumel in xi cykanine; porque atzun cyajbile tu'n tbaj cynajsa'ne ti'j cyachbile. 4Akeye ic cytene ic tza'n jun xu'j at tchmil pero mas at tgan ti'j juntl. ¿Minti'pe ba'n cyu'ne, ka ma cyc'ujlaye aju achbil twitz tx'otx' che oquele aj k'oj ti'j Dios? Cyja'tzun, alcye jun xjal taj tu'n tc'ujlante ju achbil twitz tx'otx', nno'c tk'on tib aj k'oj ti'j Dios. 5Aju in tma'n tuj Tu'jil, ¿nokx ganpe tuj cynable? Aju Xewbaj Xjan ma tzaj tk'o'n Dios tu'n tnajan tuj kanmi at-xix tc'u'j ki'j ex in bisun ki'j, chi Dios tuj Tu'jil. 6Pero mas nim t-xtalbil Dios in tzaj tk'o'n ke. Cyja'tzun in tma'n tuj Tu'jil: At tk'oj Dios cyi'j ke xjal jawni cywitz, atzun keju mans ke, in tzaj tk'o'n Dios t-xtalbil cye. 7Cyk'o'nxtzun cyibe tjak' tcawbil Dios. Che we'xixe twitz tajaw il, ex c'eleltzun ok cywitze. 8Che lak'exe ttxlaj Dios, ax icx te ctzajel lak'e' cyuc'ile. Akeye aj il, cytx'jom cyk'abe; ex akeye cabe cyc'u'j, cytx'jome tuj cyanmiye. 9Che bisune, ex che wu'yine, ex che ok'e. Aju cytzeble tz'ocwit te ok'el, ex aju cytzalajbile tz'ocwit te bis. 10Cymansincu cyibe twitz Kajaw, octzun che jawil nimsa'ne tu'n. 11Erman, mi'n che yoline mya ba'n ti'j juntl cyxole. Ka at jun in yolin mya ba'n ti'j jun erman, ex ka nno'c terman tu'n tuj malbil, ti'j ley in yolin mya ba'n ex nno'c ju ley tuj malbil tu'n. Katzun ma tz'oc ley tuj malbil tu'na, minti' in japun ley tu'na icju, nok o'cx nno'c tk'on tiba te jwes. 12Nok o'cx junx k'olte ley ex Jwes, ate Dios, aju at tipumal tu'n cyclet xjal tu'n ex at tipumal tu'n cynaj xjal tu'n. Atzun teya, ¿alcyetzuna tu'n toc juntl tuj malbil tu'na? 13Ja'lotzun, cybintze akeye in che k'mante: Ja'lo ex ka nchi'j ko xe'l tuj tnam lu, ex atzun ko tel jun abk'i, ex cbel kk'o'n kc'a'ẍ tu'n tchmet kpwak, che chiye. 14Pero minti' ba'n cyu'ne aju tzul te nchi'j. Porque ¿tza'n tten cychwinklale? Ic tten cychwinklale ic tza'n ch'in muj nok ch'in in ten, ex jurat in cub naj. 15Mas ba'n tu'n cymanteye cyja': Ka tajbil Kajaw, oc ko ank'il ex oc kbincha' jlu ex ka juntl. 16Atzun cyeye in jaw cyniman cyibe. Pero mya ba'n in cybincha'ne tu'nju in jaw cyniman cyibe. 17Alcye jun xjal ba'n tu'n alcye ju ba'n ex minti' in tbincha'n, at til.

will be added

X\