Santiago 1

1Akine Santiago, tmajen Dios kine ex tmajen Kajaw Jesucrist; in xi nk'o'ne jun k'olbebl cyeye, akeye tiyjil Israel, cablaj c'loj cybete, cysipan cyibe tuj tcyakil twitz tx'otx'. 2Akeye wermaniye, ka ma tzaj junxilchak joybil cyi'je, tz'ocwit te nim tzalajbil cyeye. 3Porque ba'n cyu'ne, ka ma che malonjtze tuj cyocslable, ctel mastl cypasense tu'n tic'x cyu'ne. 4Tz'oc tililx cyu'ne tu'n tten cypasense cabalxix, tu'n toc cynable ex tu'n cytene minti' cypaltile, ex minti' jun atx taj cyeye. 5Ka at jun cyxole atx taj tnabl, kaninx tnabl te Dios, ex ctzajel tk'o'n Dios tnabl; porque ate Dios nimxix in tzaj tk'o'n cye cycyakil ex minti' in ilin. 6Pero ke'xix tc'u'j xjal ti'j Dios oc t-xi tkanin, ex mi'n jawje' tc'u'j; porque aju xjal minti' in ke' tc'u'j ti'j Dios, ic tten ic tza'n twitz mar in yucch tu'n cyk'ik' ex in xtulk'in. 7Ka at jun xjal minti' in ke' tc'u'j ti'j Dios, tz'elx tnic' ti'j, minti' jun ti'xti ctzajel k'o'n te tu'n Kajaw. 8Jun xjal cabe tc'u'j mya segur ta' tuj tcyakil tbe. 9Aju erman tal yaj, tzalajx tu'nju cjawil nimsa'n tu'n Dios; 10pero aju k'inun, tzalajx ti'j tu'n toc te ch'in; porque cnajel te k'inun ic tza'n t-xmacal c'ul. 11Porque oc tja'wil k'ij tuc'ix nim tcyakal, bi'x in tzkij c'ul ex nne'l tz'ak t-xmacal, aju que'yin tbanilxix, cnajel. Icxtzun te k'inunju, cucx toc tilil tu'n ti'j tnegosyo, pero oc cnajel. 12At tzalajbil teju xjal ka ma tzic'x tu'n oc toc tuj joybil ti'j; porque ka ma tzic'x tu'n, oc tc'ma' jun oyaj tu'n tten tchwinklal, aju tzaj tma'n Dios tu'n ttzaj tk'o'n cye keju in che c'ujlan te. 13Ka at jun xjal ma tz'oc tuj joybil ti'j tu'n tbinchante aju mya ba'n, mi'n tma ka tu'n Dios ma tz'oc tuj joybil ti'j; porque mlay bant tu'n toc Dios tuj joybil ti'j tu'n tbinchante aju mya ba'n, ex mi jun nno'c tuj joybil ti'j tu'n Dios. 14Pero teyle junjun nno'c tuj joybil ti'j, ax tnabl in xmoxin te tu'n tpon tc'u'j ti'j ju mya ba'n, ax tnabl in sbunte te. 15Nej in pon tc'u'j ti'j ju mya ba'n; octzun tch'iy ju mya ba'n tuj tanmi, in tbincha'n il, octzun tch'iy il, in tzajtzun camic tu'n il. 16Akeye erman at nc'u'je cyi'je, mi'n che tzpete ti'j jlu. 17Tcyakil oyaj ba'n ex tcyakil oyaj tbanilxix, atzun in cu'tz tuj cya'j, atzun in tzaj tuc'il Dios aju binchal cye spic'un ate' twitz cya'j. Minti' in tch'expu'n Dios tnabl, ex mya ic tten Dios ic tza'n jun xlecun in bet. 18Tu'nxju tajbil ma ko oc te tc'wa'l nok tu'n tyol axix toc, tu'ntzun koc tnejel ocslal cyxol ke tch'isben, ic tza'n tnejel twitz awal. 19Cyja'tzun erman akeye at nc'u'je cyi'je, cycyakile ba'n tu'n t-xi cybi'n naje ju yol, pero mya jurat naj tu'n cyyoline, ex mya jurat naj tu'n cyjaw cyakpaje. 20Porque aju xjal jurat in jaw k'ojl, minti' in tbincha'n aju tz'aklxix tuj twitz Dios. 21Cyja'tzun, cyk'oncje tcyakil ttz'ilil tuc'ix ju mya ba'n ma chmet-xix, ex che oque mans, tu'n cyc'monteye ju yol ma cu'x awa'n tuj cyanmiye; porque at tipumal ju yol lu tu'n tclet cyanmiye. 22Cynimanxe ju yol, ex mya nok o'cx tu'n cybinteye, porque ka o'cx in xi cybi'ne ex minti' in japun cyu'ne, in cysbun cyibe. 23Ka at jun o'cx in xi tbi'n ju yol ex minti' in japun tu'n, ic tten ic tza'n jun xjal nno'cx tque'yin twitz tuj jun respej. 24Porque oc tbaj tque'yin twitz in xi'tzun, ex bi'x nnic' tna'l tu'n tza'n que'yin. 25Atzun teju in cu'x tque'yinxix tuj ley tz'aklxix, aju ley at tzokpibl tu'n, ex cucx in cu'x tque'yin, ex minti' nnic' tna'l tu'n aju in tbi'n, nok o'cx in japun tu'n, atzunte jlu at tzalajbil te ti'j ju in tbincha'n. 26Ka at jun cyxole tuj tnabl ka in niman Dios, pero ka minti' in ajtz tjac'u'n ti'j ttzi', in cub t-sbun tib, ex aju tocslabl nokx gan. 27Aju ajbebl twitz Kman Dios sakxix ex minti' tpaltil, atzun jlu: tu'n konin cyi'j c'wa'l minti' cyman ex cyi'j meba xu'j tuj yajbil cye, ex tu'n toc kcwentin kib tu'n mi'n ktz'ilix cyxol xjal.

will be added

X\