ISAÍAS 8

1Tzaj tma'n Kman weye: K'intza jun tz'lom ma tij ex tz'iban cuba tu'n letr clarxix aju yol lu: Maher-salal-hasbaz. 2Ex k'intza pal Urías, tuc'ix Zacarías aju tcy'ajal Jeberequías, tu'n cyoc te testiw, porque ax toc che yolin, chi Kman. 3Yajxi ch'intl, oc nmojban wibe tuc'il ju xu'j pacbal tyol Dios, aju nxu'jile; oc ten jun tal ex ul itz'j jun tal xinak. Tzajtzun tma'n Kman weye: K'on oca tbi ne' Maher-salal-hasbaz. 4Porque na'nxtok tbant tmante tal ne': Tat ex ka Nan, c'eletz k'i'n k'inumabl tuj tnam Damasco ex tuj tnam Samaria ex cxel k'i'n tu'n tpon tuc'il rey te Asiria. 5Ex tzaj tma'ntl Kman weye: 6Tu'nju ma tz'el cyic'un ke xjal aju a' Siloé, aju cheba in bet, ex ma che tzalaj ti'j rey Rezín ex ti'j rey Peka aju tcy'ajal Remalías, 7cyja'tzun ctzajel wi'ne aju rey cye aj Asiria, cyuc'ix cycyakil ke t-soldad, tu'n cyoc tzokpaj k'ojlel cyi'j aj Judá; che ul ic tza'n nima Éufrates in ch'iy nimxix wen ex in baj naj tcyakil aju at ttzi a' tu'n; 8cbajel naj tcyakil cyu'n, mer ic tza'n otok noj tuj tx'otx' Judá tu'n nima ex mer ic tza'n otok japun a' twi cysemil xjal. Ic che oquel ke aj k'oj, ic tza'n jun chyu'j lic'un ke t-xic', ex in makset tcyakil ttx'otx'a cyu'n, aya Emanuel. 9Akeye nasyon, cychmo'n oc cyibe ex che najele; cybintze jlu akeye tnam najchak ate'ye: Masque bant cytene tu'n cyk'ojine, che najele; ax toc, masque bant cytene tu'n cyk'ojine, che najele. 10Che ximane ti'j aju cyaje tu'n tbant, pero cbajel naj cyximbetze; cyximan cube alcye cyaje, pero mlayx japun, porque at Dios kuc'ile. 11In tzaj tzyu'ne tu'n Kman cyuwxix wen ex tzaj tma'n weye tu'n mi'n woc lpe'ye ti'j cymod xjal lu ex tma cyja': 12Oc cymante xjal: At xobajil ki'j tu'nju in che ximan xjal tu'n cybinchante mya ba'n ki'j, ka che chi, mi'n tz'ocx cyk'on cyibe cyxol. Mi'n che sec'paje ex mi'n che xobe ti'j tcyakilju in che el xob ti'j. 13Akine Cymane aju Tajaw Tcyakil, akine tu'n woc cyk'o'ne te xjan, ex ba'n tu'n tten nchiylale cyi'je ex tu'n cyxobe nwitze. 14Chin oquele te jun lugar jatum tu'n cyclete; pero te cye ke cabe c'loj tiyjil Israel chin oquele te jun abj tu'n cyjaw tolj ti'j; chin oquele ic tza'n jun c'obil cye aj Jerusalén, tu'n cyjaw tz'ak tuj. 15Nimcu che jawil tolj tu'n cycub tz'ak ex che cymel; nimcu che bel tz'ak tuj c'obil ex che tzyetel tu'n, chi Kman. 16Cyc'u'nxe aju yol lu ex bi'x cyk'on cyaje tal aju tcubil nxnak'tzbile. 17Masque ma cub tewan tib Kman cywitz ke tiyjil Jacob, atzun weye chin ayole ti'j, porque o'cx ti'j ma ke' nc'u'je. 18Akine ex ke nc'wa'le ma che tzaj tk'o'n Kman weye, ko ajbele te jun techal cyxol aj Israel. Tu'n Kman aju Tajaw Tcyakil ma ko oc k'o'ne icju, aju najl twi witz Sión. 19Ex ka ma tzaj cyma'n xjal cyeye: Cykaninxe jun yol te cyanmi cyimni ex cye aj k'ij, ka che chi, akeju in baj cych'expu'n tk'ajk'ajel cywi' oc cyyolin ex oc cyjasun, atzun cyeye cxel cytzak'we'ne cyja': ¿Baka mya ba'n tu'n cykanin xjal jun yol te Cydios? ¿Ba'npe tu'n cykanin jun consej cye cyimni cyi'j ke itz'x? 20Cybinxe aju xnak'tzbil ex aju tley Dios. Ka minti' in cyma'n xjal ic tza'nx ju yol lu, cucx ate' tuj klolj. 21Nok che betjebel ke xjal, ctzajel yajbil cyi'j ex c'oquel ta'w we'yaj cyi'j, ex tu'n ta'w we'yaj ctzajel nim cyk'oj. Tu'ntzun jlu cxe'l cyyol ti'j cyrey ex ti'j Cydios. Ex cjawil cyi'n cywitz jawni, 22ex te tibajxi cbel cyque'yin twitz tx'otx'; o'cx yajbil tzul cyibaj, tuc'ix klolj ex kxopin ex nim bis. Cycyakil che cyjel ten tuj klolj.

will be added

X\