ISAÍAS 65

1In tma'n Kman cyja': Ke xjal mi jun ti'xti o tzaj cykanin weye, atzun keju ma che ul wuc'ile, ke xjal minti' o che jyon wi'je, atzun keju ma chin cnete cyu'n. Xi nma'ne cyja' cye ke xjal bajx che cubsan nwitze: Lu kine lu, nchiye. 2Enter k'ij ma txi nnukpi'n nk'abe txcol cye xjal miban che bin, cyja' cyxi' tuj be mya ba'n ex lepch ke ti'jx cyex cyximbetz; 3cucx ma chin oc ic'le'ne cyu'n ke xjal lu ex tibaj nwitze ma tz'oc cyma'n cyyol, xi cyk'o'n chojbil te cydios t-xol tkan awal ex cub cypatun storac tibaj lagriy binchamaj te altar; 4in che cub ten cyxol ke cymukbil cyimni ex nne'x ak'bil cyu'n cyuj ke lugar tuj tewan in che chyo'n tchibjal boch ex in cynojsa'n cyc'il tu'n ta'l chibj mayo'n wu'ne tu'n mi'n t-xi cychyo'n. 5In cyma'n cye cyuc'il: Tencja ma chixin, mi'n ko oc tmaco'na, porque xjan ko'ye ex mya ba'n tu'n koc tmaco'na, che chi. Ke xjal lu ic cyten ic tza'n k'ak' in c'ant tcyakil k'ij, ex mya ba'n ke te weye; ic cyten ic tza'n oc nno'cx sib tuj ntxa'ne. 6Pero tcyakil jlu tz'ibamaj nwitze ex mlay chin cyaj tene nok cucx mi'nwt chin k'ajte; cbel nk'o'ne cycastiw ic tza'nx cybinchben. 7Cchjetel cyu'n ti'j ju mya ba'n o cybincha ex mya o'cx jlu, ax icx ti'j mya ba'n o cybincha ktzan cyxe'chel, porque cub cypatun storac cywi' nmak witz ex in el ic'une cyu'n cywi' ke tal witz. Nej cjawil wi'ne tajlal cybinchben mya ba'n, maxitzun cbel nk'o'ne cycastiw, chi Kman Dios. 8Chi Kman in tma'n cyja': Ka at nim ta'l jun pnuj twitz uva, minti' in baj cyyajan xjal, porque jacu tz'el nim ta'l uva ti'j. Cyja'xtzun weye, nok tu'nju nc'ujlalile cyi'j nmajene, mlay cub nxitune enter nasyon. 9Che chmetel ke tiyjil Jacob wu'ne, ax icx ke tiyjil Judá, tu'n cynajan cywi' ke witz etzan wu'ne. Ke xjal sc'o'maj wu'ne che etzal ti'j tx'otx', ke xjal in che ajben weye che najal ma chixin. 10Aju chk'ajlaj Sarón cnojel tuj cyu'n ẍne'l, ex tuj chk'ajlaj Acor che wa'l ke wacẍ; ke alumaj lu cyalun ke xjal in che jyon wi'je. 11Atzun cyeye nne'l cypa'n cyibe wi'je ex nnic' tna'njtz cyu'ne aju witz xjan etzan wu'ne, in xi cyk'o'ne wabj ex ta'l twitz uva te Gad ex te Meni, akeju tilbilal jatum in che pon xjal kanil cyswert. 12Cyja'tzun, mya ba'n aju cyswerte tzul wu'ne, che bel ẍmeje'ye tu'n cycub byo'ne tu'n spad. Porque e tzaj ntxco'ne, atzun cyeye minti' in tzaj cytzak'we'ne; in yoline cyuc'ile, pero minti' in cub cybi'ne; o cybinchaye aju minti' in cub tuj nwitze, jaw cysc'o'ne aju minti' in chin tzalaje ti'j. 13Cyja'tzun in xi nma'ne cyeye: Ke ajbel weye ctel cywa, atzun cyeye c'ic'ex we'yaj cyu'ne; ke ajbel weye ctel cyc'a, atzun cyeye c'ic'ex txketle'n cyu'ne; ke ajbel weye che tzalajel, atzun cyeye ctzajel cych'ixwiye; 14ke ajbel weye che bitzal tu'nju at nimxix tzalajbil tuj cyanmi, atzun cyeye che sch'ile ex che ok'ele tu'n cybise ex tu'n ta'w c'ixc'oj toc cyi'je. 15Ke xjal sc'o'maj wu'ne c'ajbel cybiye cyu'n tu'n ttzaj cykanin mya ba'n ex camic cyi'j txkantl xjal, atzun ke weye nmajen cbajel nch'expu'ne cybi. 16Nok alcyex jun xjal najl tuj tnam lu, oc t-xi tkanin jun cy'iwbil, cxel tkanin te Dios aju in japunxix tyol; ex nok alcyex ma txi ttziyan jun yol axix toc, cxel ttziyan tuj tbi Dios aju in japunxix tyol. Aju c'ixbisabl cye ojtxi ma tzic' tna'l wu'ne ex mlay tz'oc nque'yine juntl maj; ma che cub naj nwitze. 17Cybintze, cbantel jun ac'aj cya'j ex jun ac'aj tx'otx' wu'ne. Aju o baj te tjak'xi c'ic'el tna'l ex mi a'l jun ctzajel na'ntl te. 18Nojx tuj cyanmiye tu'n tzalajbil ex cucx che tzalaje te jumajx ti'j ju cbantel wu'ne, porque c'oquel Jerusalén te ac'aj juntl maj wu'ne, c'oquel te jun tnam te tzalajbil, tu'n cytzalaj ke xjal che tel tuj. 19Ax wuc'ixe chin jawil tzalaj ti'j tnam Jerusalén ex chin tzalajele cyi'j ke xjal etzan wu'ne. Mlay binjtz juntl maj ok'el tuj ex mi jun c-ayayal tu'n tbis. 20Tuj tnam lu mi jun c'wa'l cymel c'itzketok tul-len itz'j ex mi jun tij xjal cymel na'nxtok tjapun baj tank'ibl. Ka ma cyim jun xjal matok in japun jun syent abk'i tu'n, entons cu'xunx ta' oc tcyim, ex katzun mi ma japun jun syent abk'i tu'n jun xjal, jun castiw jlu. 21Cjawil cybincha'n xjal cyja ex ax ke che najal tuj, ex cbelex cyawa'n tkan uva ex ax ke che lo'l ti'j twitz. 22Oc tjaw tbincha'n xjal jun ja, mlay bant tu'n tpon junxitl najal tuj, ex oc tcu'x tawal xjal, mlay bant junxitl tu'n twa'n ti'j. Ke xjal etzan wu'ne, ma' ctel tuj cyank'ibl ic tza'n tuj tank'ibl jun tze'; ke xjal sc'o'maj wu'ne che tzalajel ti'j tak'unben cyk'ab. 23Mya nokx gan che ak'nal, ex ke cyc'wa'l mlay che cyim naj, porque ke c'wa'l lu, cyiyjil ke xjal tcub ncy'iwbile cyibaj; ax icx ke cyiyjil che ul itz'j te tibajxi, che bel ncy'iwla'ne. 24Na'nxtok ntzaj txco'ne cyu'n, che tzajel ntzak'we'n naje; ex na'nxtok cybaj yolin, ctzajel nk'o'n nwi'ye cyi'j. 25Junx che wa'l ke xo'j cyuc'il ke ẍne'l; c'ul cxel cywa'n ke balun ic tza'n ke wacẍ, ex tx'otx' cxe'l cyu'n lobaj. Twitz tcyakilju witz xjan weye, mi jun c'oquel binchante jun mya ba'n ti'j juntl ex mi tu'n toc ten c'ixbisal, chi Kman.

will be added

X\