ISAÍAS 64

1Nokwit xbaj tlakina cya'j ex xcu'tza tu'n cyjaw lu'lun ke witz twitza, 2ic tza'n in baj tz'e'y txkan ch'i'x tu'n k'ak' ex ka ic tza'n in tzaj loklon a', jacutzun tz'el cynic' aj k'oj ti'ja, ti'j tipumala ex jacu che tzaj lu'lun ke nasyon twitza. 3Tej tbinchanteya tbinchbena xobajilxix, aju minti'tok ximan ku'ne tu'n ttzaj tk'o'na, ex tej tcu'tza, e jaw lu'lun ke witz twitza. 4Bajx kbiye ex bajx kile ka at juntl dios jacu bant tcyakil jlu tu'n, ex tu'n tbinchante t-xtalbil cye keju k'ukl cyc'u'j ti'j. 5In c'met xjal tu'na, aju in tzalaj tu'n tbinchante ju ba'n ex nnu'l ti'j tc'u'j tu'n tbinchante aju tajbila. Ma tzaj tk'oja ki'je tu'n tlaj ma ko binchane il; ax tuj kile ma ko tene ma bet-xi k'ij. ¿Ocpetzun ko cletele? 6Kcyakile ic ktene ic tza'n jun xjal mya sak tuj tanmi, tcyakilju kbinchbene ba'n mer ic tza'n jun ttx'akan xbalun tz'il ti'j; kcyakile ma ko cub tz'ake ic tza'n t-xak tze' in tzaj tz'ak oc ttzkij, ex aju kbinchbene mya ba'n in xi k'inte keye ic tza'n tu'n cyk'ik'. 7Mi a'l jun in cubsan twitza ex mi a'l jun nno'c tilil tu'n tu'n toc ke' tc'u'j ti'ja; cyja'tzun ma cub tewan tiba kwitze ex ma ko cyaj tcolina tu'n tlaj kbinchbene mya ba'n. 8Masque icju, pero aya Kmane; ako'ye ic tza'n xcab tx'otx' ex atzun teya binchal keye ic tza'n jun xjal binchal xar, porque kcyakile ma ko bante tu'na. 9Kman, mi'n tzaj nimxix tk'oja ki'je ex mi'n tzaj tna'na kbinchbene mya ba'n. Ko tque'yintza, porque kcyakile etzan ko'ye tu'na. 10Ke tnam xjan teya, ma che oc te jun lugar tzkij tx'otx'; ma tz'oc Jerusalén te jun tnam minti' xjal tuj, ma naj tnam Sión. 11Aju lugar xjan ex ma' toclen te keye, jatum jaw nimsa'n tbiya cyu'n ke kxe'chele, ma baj naj tu'n k'ak'. Tcyakilju in ko tzalaje ti'j ma baj xitj. 12Ex ti'j tcyakil jlu, Kman, ¿cucxpetzun c'ic'elex ti'j tu'na? ¿Maj mi'ntzun k'ajta ti'j? ¿Cucxpetzun ko tele tuj bis ma'xix tu'na?

will be added

X\