ISAÍAS 63

1¿Alcye jun xjal tzul, ma tz'etz tuj tnam Bosra aju nintz tnam te Edom, toc tc'a' t-xbalun cyak, cyja' ttzaj tocsa'n t-xbalun in koptz'aj wen ex in bet tuc'il tcyakil tipumal? —Akine, in chin yolin jun yol tz'aklxix ex at nim wipumale tu'n cyclete wu'ne. 2¿Tiku'ntzun cyak que'yin t-xbaluna tocsa'n, mer ic tza'n t-xbalun jun xjal oc nne'l tpatz'u'n ta'l twitz uva tu'n tkan? 3Ax toc o chin patz'une ta'l twitz uva njunalxe ex mi a'l jun o onin wi'je, tuc'il nim ntx'u'jile e baj nwabane ke aj k'oj wi'je, e baj nbetz'ane tu'n nk'oje; ma tz'oc tx'itl chic' ti'j nxbalune ex ma baj naj ti'j tcyakil tu'n. 4Cub nximane tu'n tpon tk'ijlalil tu'n tcub cycastiw aj k'oj wu'ne, porque otok tzul canun tk'ijlalil tu'n cycolpet ke xjal etzan wu'ne. 5Baj nque'yine, pero mi a'l jun tu'n t-onin wi'je; bi'x in jaw labine tu'nju mi a'l jun tu'n tke' nc'u'je ti'j. Cyja'tzun, tu'nx nk'abe cub cyi'j aj k'oj ex ax nk'oje o k'onte wipumale. 6Tu'nju nim nk'oje tzaj, e baj nbetz'ane ke nasyon, bi'x e naj tu'n nk'oje ex o bet tel cychc'el wu'ne twitz tx'otx', chi Kman. 7Waje tu'n nyoline ti'j tc'ujlalil Kman, ex tu'n nbitzane tu'ntzun tjaw nimset tbi ti'j tcyakilju ba'n ma tbincha ki'j, tu'nju nimxix t-xtalbil cyi'j ke cyiyjil aj Israel ex tu'nju o tbincha tu'n tk'ak'bil tc'u'j ex tu'n tc'ujlalil. 8Chi Kman o tma: Etzan ke xjal lu wu'ne, c'wa'lin ke wu'ne ex mlay chin sbunjtze cyu'n. Cyja'tzun e clet tu'n. 9Tuj tcyakil yajbil tzaj cyi'j, ax icx te o yajlanjtz. Ax t-anjel Kman o clonte cye. A o colpin cye tu'nju tc'ujlalil ex tu'nju tk'ak'bil tc'u'j; e jaw twaban ex e jaw tchle'n; iclex o tbincha atxix ojtxi. 10Atzun cye jaw cyi'n cyib tu'n cyk'ojin ti'j Kman, cyja'tzun, tzaj tbis T-xew Dios tu'n cybinchben mya ba'n ex oc te aj k'oj cyi'j ex ax o k'ojin cyi'j. 11Ke xjal etzan tu'n Kman tzaj cyna'n aju tk'ijlalil te ojtxi tej tten Moisés, ex in baj cykanin cyxolx cyja': ¿Jatum ta' Dios aju colpinte cye xjal tuj mar, tuc'ix Moisés aju pastor cyi'j ke xjal etzan tu'n Kman? ¿Jatum ta' Dios aju xi k'onte T-xew tu'n tten cyuc'il, 12ex xi tk'o'n tipumal ma' toclen tu'n tten tuc'il Moisés? ¿Jatum ta' Dios aju cub pa'nte mar cywitz ke xjal etzan tu'n, tu'ntzun tbinjtz aju tkanil ti'j tipumal te jumajx? 13¿Jatum ta' aju ic'x k'inte cye xjal tuj tmij mar ex minti' e jaw tolj, ic tza'n ke chej minti' in che jaw tolj tuj tzkij tx'otx', 14ex ic tza'n ke wacẍ in che cu'tz cywi witz tu'n cycubil tuj chk'ajlaj? Axte Dios ẍaklul cye. Cyja'tzun tten e je'x t-ẍaklu'n ke xjal etzan tu'n ex cyja'tzun tten o tcamba tu'n tyolinjtz jun tkanil ba'n ti'j ex tu'n tjaw nimsa'n tbi. 15Kman, ko tque'yintza max tuj cya'j, max tuj lugar xjan ex ma' toclen jatum najliya. ¿Jatum ta' tc'ujlalila ma'xix ex tipumala? ¿Mape baj tk'ak'bil tc'u'ja ki'je? 16Aya Kmane masque minti' ojtzki'n ko'ye tu'n kxe'chele Abraham ex minti' in ko ule ti'j tc'u'j Jacob, pero aya Kmane; ma bet-xi k'ij axte colpil keye. 17Kman, ¿Tiku'n in tk'o'na ambil tu'n kel txalpaje ti'j tbeya ex in tcyuwsa'na kanmiye tu'n mi'n knimane teya? Tajtz meltz'aja juntl maj kuc'ile nok tu'n tc'ujlalila ki'je, ako'ye tmajena ex ako'ye aj Israel etzan ko'ye tu'na. 18Nok ch'in tuj o oque tajwil ktanmiye, ako'ye kpa'n kibe tu'n kajbene teya. Ke aj k'oj ki'je ma baj cywaban aju tjaya xjan. 19Ato'ye mer ic tza'n bajx cawina jun maj kibaje ex mer ic tza'n bajx tz'oc tbiya ki'je.

will be added

X\