ISAÍAS 62

1Tu'nju at nc'u'je cyi'je akeye aj Sión, mlay txi ncoline tu'n nk'ajte, ex tu'nju at nc'u'je cyi'je akeye aj Jerusalén, mlay chin ajlane ocxi t-spic'e' ju cycambable ic tza'n in tzaj spic'e' t-xe cya'j te prim, ex ocxi tc'ant ju colbil cyeye ic tza'n jun ttxa'n tzaj in c'ant. 2Oc cyila' ke nasyon aju colbil cyeye, oc cyila' cycyakil rey aju cyajwalile. C'oquel k'o'n juntl tbi Jerusalén ac'aj, axte Kman c'oquel k'onte. 3C'oquel tnam Jerusalén ic tza'n jun coron tbanilxix que'yin tocx tuj tk'ab Kman Dios. 4Mlay txi cyma'ntl xjal ti'j tnam Jerusalén: O cyaj colin, che chiwt, ax icx mlay txi cyma'ntl ti'j cytanmi: O cub xitj, che chiwt. Nok o'cx aju tbi tnam Jerusalén c'oquel, atzun jlu: Aju tnam nimxix nganiye ti'j, ex atzun tbi cytanmi xjal jlu: Nxu'jile. Porque in tzalaj Kman ti'j tnam Jerusalén, ex ic c'oquel Kman ic tza'n jun chmilbaj te te cytanmi xjal. 5Ic tza'n jun cu'xun in moje' tuc'il jun k'apoj, icxtzun che oquel ke aj Jerusalén te tajwil cytanmi ex ctzalajel tuc'il, ic tza'n jun chmilbaj in tzalaj tuc'il t-xu'jil. 6Ma che cub tk'o'n Kman ke xk'ukil cyibaj ke muro cyoc ti'jele tnam Jerusalén. K'ijl ex konic'an minti' in xi cycolin tu'n cycubsan twitz Dios. Mi'n txi cycoline tu'n cyk'ajte, akeye in che cubsane witz Kman, 7mi'n txi cyk'o'ne ambil te tu'n tojlan maxi ocxi tjaw tbincha'n juntl maj ju tnam Jerusalén, ex ocxi tjaw nimsa'n tnam Jerusalén cyu'n cycyakil xjal twitz tx'otx'. 8Ma tzaj ttziyan Kman jun yol axix toc ex ma jaw tk'o'n tbank'ab nimxix tipumal twitz cya'j, chi cyja': Mlay txi nk'o'ne ambil cye aj k'oj tu'n t-xi cywa'n aju triw etzan cyu'ne ex mi tu'n t-xi cyc'a'n ke stranjer xjal ta'l twitz uva aju o bant cyu'ne tu'n cyak'unbene; 9nok o'cx ax keye che wa'le ti'j twitz cyawale otok jaw cychmo'ne, ex chin jawil cynimsa'ne; cbajel cychmo'ne twitz uva ex che c'ale ti'j ta'l ax twitz njaye xjan. 10Cyexe, cyexe ttzi tpwertil tnam; cybinchame ju be te cye ke xjal etzan ke wu'ne. Cheba cychk'ajlajin baje tuj ex cyi'mele ke abj tuj; cyk'on jawe bander te jun techal te txocbil cye ke nasyon. 11Lu jun tkanil tu'n Kman tu'n tpon max ttxa'npun tx'otx'; cymanxe cye keju najl tuj tnam Sión: Ma tzul aju Clol cyeye, che chicuye. Ke xjal etzan tu'n Kman che ul ti'n junx tuc'il akeju otok che colpet tu'n. 12Atzun cybi c'oquel k'o'n jlu: Ke xjal xjan, ex atzun juntl cybi c'oquel jlu: Ke xjal o che tzokpet tu'n Kman, ex atzun tbi tnam Jerusalén c'oquel k'o'n jlu: Aju tnam nim tgan Dios ti'j ex aju tnam mya colimaj tu'n.

will be added

X\