ISAÍAS 61

1Aju T-xew Kman Dios at wuc'ile, porque ma tzaj k'o'n woclene tu'n Kman ex ma chin tzaj sama'ne k'olte tkanil ba'n cye meba, tu'n cybanix keju bis ta' cyanmi, tu'n t-xi nk'o'ne tkanil cye keju e je'x k'i'n pres tu'n cycolpet ex tu'n tjaket tpwertil cyja pres, 2ex tu'n t-xi nk'o'ne tkanil ti'j tk'ijlalil tu'n tul canun t-xtalbil Kman ex tu'n tcub cycastiw ke aj k'oj ti'j. Ma chin tzaj t-sama'n tu'n tk'ukbet cyc'u'j keju in che bisun, 3tu'n t-xi nk'o'ne tzalajbil te t-xel bis cye keju in che bisun tuj tnam Sión, tu'n t-xi nk'o'ne nim tzalajbil cye te t-xel ok'el ex tu'n cybitzan te nimbil tbi Dios te t-xel bis. Ic che oquel ic tza'n jun wi' c'ol awa'n tu'n Kman ex oc cybincha' aju tz'aklxix tu'n tyec'unjtz tajwalil Kman. 4Cjawil cybincha'n juntl maj ke tnam ex ke ja e cub xitj ojtxi. 5Stranjer xjal che oquel cwentil cyi'j cyẍne'le ex che ak'nal tuj cycojbile ex ti'j tkan uva at cyeye. 6Atzun cyeye c'oquel k'o'n cybiye pal te Kman ex tmajen Kdios. Che wa'le ti'j cyk'inumabl mastl nasyon ex aju cyajwalil c'oquel te jun adorn te cyeye. 7Ex tu'nju nimxix ma tzic'x cyu'ne ex nim ma cub cych'ixwiye ex nim ma che oc ic'lene, cyja'tzun il ti'j tu'n cyc'monteye nim k'inumabl ax tuj cytanmiye ex che tzalajele te jumajx. 8Porque nim in tzalaj Kman tu'n tbinchet aju tz'aklxix ex ic'un tu'n aju elk'a'mj ex ju byoj xjal. Oc tk'a' chojbil tbanilxix cye ke xjal etzan tu'n ex cyjel bant ti'j jun tyol cyuc'il te jumajx. 9Ke cyiyjil che ul itz'j te tibajxi che oquel te ma' cyoclen cyxol ke mastl nasyon; cycyakil keju che que'yil cyi'j c'elel cynic' ti'j ka tcub tcy'iwbil Kman cyibaj. 10Nimxix in chin tzalaje ti'j Kman ex in noj tuj wanmiye tu'n tzalajbil ti'j Ndiose, porque ma chin clete tu'n ex ma chin oc k'o'ne te tz'aklxix tu'n. Ic ma chin oque ic tza'n jun cu'xun cyja' tmoje' toc t-xbalun tbanilxix, ex ic tza'n jun k'apoj cyja' tmoje' in baj tbincha'n tib ex nno'c tk'o'n tu'. 11Porque ic tza'n te tx'otx' in tpok'sa'n tawal ex in tzaj t-xul awal tuj pe'n, icxtzun oc tbincha' Kman tu'n cucx tbinchet aju tz'aklxix, ex cycyakil nasyon cjawil cynimsa'n tbi tu'n cybitz.

will be added

X\