ISAÍAS 6

1Tuj abk'i tej tcyim rey Uzías o wile Kman k'ukl tuj tk'ukbil ma' tjaw ex ma' toclen, nojni tuj tja tu'n ttxa'n t-xbalun. 2Lu ke Serafín in che koptz'aj wen cycubsa'n tibajxi Kman. Teyle junjun at kak t-xic'. Cabe cyxic' in ajben te makbil cywitz, cabetl in ajben te txaybil cykan ex atzun cabetl in ajben tu'n cylipan. 3Ex che chi in cyma'n jun te juntl: Xjante, Xjante, Xjante Kman aju Tajaw Tcyakil; nojni tcyakil twitz tx'otx' tu'n tajwalil. 4Tej tk'ajt tk'ajk'ajel cywi', bi'x e tzaj lu'lun tpwertil tja Dios ex bi'x baj noj tuj tu'n sib. 5Atzun weye nmaye cyja': Ay bec'bil nwitze, chin cymele. Ma wile tu'n nwitze aju Rey, aju Kman Tajaw Tcyakil; atzun weye xjal kine ex mi jun yol tuj tumel nne'tz tuj ntzi'ye, ex najl kine tuj jun tnam jatum minti' jun xjal in yolin tuj tumel, nchiye. 6Cyxol ke Serafín lu tzaj lipan jun ex ul wuc'ile, tzyu'n jun xk'a'l tu'n tu'n tenás, otok jaw ti'n tibaj altar. 7Oc tt'ano'n ti'j ntzi'ye ex tma weye cyja': Bintza, aju xk'a'l lu ma tz'oc t'anet ti'j ttzi'ya, ma tz'el k'it tbinchbena mya ba'n ex ma cub najset tila, chi Serafín. 8Nbiye tk'ajk'ajel twi Kman ex tma: ¿Alcye cxel nsama'ne? ¿Alcye c'oquel te ksanjele? Atzun weye xi ntzak'we'ne: Lu kine lu, chin t-samanxa. 9Tzajtzun tma'n weye: Txi'ya ex k'manxa cye xjal cyja': Masque ma tzaj cyk'o'n cywi'ye ti'j, mlay tz'el cynic'e ti'j; ex masque ma cyile, mlayx tz'el cynic'e ti'j. 10Najsa'n baja cynabl ke xjal lu tu'n mi'n tocx tuj cywi', maksima tuj cyẍcyin tu'n mi'n cybinte, ex maksima cywitz tu'n mi'n tcyil ex tu'n mi'n tel cynic' ti'j, tu'ntzun mi'n tajtz ti'j cyanmi ex tu'n mi'n cybanix wu'ne, chi Kman weye. 11Xitzun nkanine te: ¿Nic'puntzun ctel jlu, Nman? Tzajtzun ttzak'we'n: Max ocxi cybaj naj ke tnam ex mi jun xjal tu'n tcyaj ten cyuj, ocxi cycyaj ten ke ja minti' cyajwil, ocxi cybaj naj ke cojbil ex mi jun xjal cyjel ten cyuj, 12ex ocxi cyxi wi'ne ke xjal tuj jun tnam najchak, tu'ntzun mi jun xjal tu'n tcyaj ten tuj ttanmi. 13Masque nic'xi xjal che cyaj ten tuj tnam, ax icx che najel, ic tza'n in jaw tx'emit jun tze' c'ol ex ka jun tze' sic'l ex o'cx ttronquil in cyaj ten, pero ti'j tronc lu ctzajel ch'iy t-xul xjanxix.

will be added

X\