ISAÍAS 58

1Chi Kman tzaj tma'n weye: Tjaw sch'ina cyuw wen, mi'n tzaj t-xobila, tjaw tk'ajk'ajel twi'ya ic tza'n jun chun; mayo'n oca ke xjal etzan wu'ne, akeju tiyjil Jacob, tu'n tlaj cybinchben mya ba'n ex tu'n tlaj cyil. 2Tcyakil k'ij in che jyon wi'je, mer in che tzalaj tu'nju ma tz'el cynic' ti'j nbeye, mer in cybincha'n aju tz'aklxix, ex mer minti' in che ic' tibaj nleye, in cykanin ley tz'aklxix weye ex in che tzalaj tu'nju ma che ul lak'e' wuc'ile, 3pero in cyma'n cyja': ¿Ti tajben tu'n tcub kyo'n we'yaj ka minti' in que'yin Dios ki'j? ¿Ti tajben tu'n tcub kyajlan kib ka minti' toc tcwent Dios ki'j? Che chi. Aju k'ij tu'n tcub cyyo'ne we'yaj in ajben cyu'ne tu'n tcub cyk'o'ne cyc'a'ẍe ex in che oc tene yajlal cye ke cymajene; 4tuj ju k'ij tu'n tcub cyyo'ne we'yaj, o'cx in che iline cyxolxe ex in che oc tene k'ojlel ex in baj cybyo'ne juntl cyuc'ile tu'n cyk'abe. Mya ba'n aju in cybincha'ne. Nokx gan tu'n tcub cyyo'ne we'yaj icju, porque mlayx tzaj nbi'ne cyna'j Diose. 5¿Che chipetzune ka in chin tzalaje cyi'je tu'nju in baj cyyajlan cyibe tu'n tcub cyyo'ne we'yaj oc tcub moc'e' cywi'ye ic tza'n ajlaj moc'l twi', ex oc cycub coẍe'ye tuj tza'j tuc'il cyxbalune ch'i'x twitz te jun techal cybise? ¿Apetzun jlu nno'c cyk'o'ne ka otok cub cyyo'ne we'yaj, aju in chin tzalaje ti'j? 6Baka a jlu in chin tzalaje ti'j. Aju tu'n tcub cyyo'ne we'yaj axix toc ex in chin tzalaje ti'j, atzun jlu: Tu'n tcub lakj ju caden ma tz'oc cyk'o'ne te c'albil cye xjal mya tuj tumelxix, tu'n tel cyco'pine aju pyal kitz'in yuw tu'n ti'j cykul xjal, tu'n cytzokpet keju in che yajlanjtz cyu'ne, tu'n t-xi cycoline tu'n cyoque jawni cyi'j xjal, 7tu'n t-xi cyk'o'ne ch'in ti'j cywaye te twa juntl xjal at we'yaj ti'j, tu'n t-xi cyk'o'ne cyposad ke meba xjal minti' cyja, tu'n t-xi cyk'o'ne t-xbalun xjal minti' t-xbalun, ex tu'n mi'n tzic' tna'l cyu'ne tu'n cyonine cyi'j cyxjalile. 8Ka ma bant jlu cyu'ne, cspic'ebil tuj cywitze ic tza'n in jawil k'ij, ex ju c'ixbisabl cyi'je cbantel naj. Aju tz'aklxix cbel nej cywitze te ẍaklul cyeye, ex aju nspic'umale c'oquel lpe' cyi'je tu'n cyclete. 9Katzun ma chin tzaj cytxco'ne, ctzajel ntzak'we'ne, ex ka ma che jaw sch'ine tu'n cykanine onbil, oc nma'ye cyeye: Lu kine lu. Ka ma txi cycoline tu'n cyyajlane cyi'j xjal, ka minti' ma tz'oc cych'icune cyi'j cyuc'ile ex ka minti' ma jaw cynic'antle yol cyi'j, 10ka ma cyak' cyibe tu'n cyajbene teju xjal at we'yaj ti'j ex ka ma che onine ti'j ju xjal ta' tuj bis tu'nju meba, tzultzun koptz'aj spic'un cyeye tuj klolj, ex aju klolj toc cyi'je c'oquel ic tza'n spic'un te chilcuk'ij. 11Tcyakil maj akine chin ẍaklul cyeye ex nim cywaye cxel nk'o'ne tuj tzkij tx'otx', cxel nk'o'ne tipun cyximlale ex ic che oquele ic tza'n txkan awal a'lin wen, ex ic tza'n jun twi a' minti' nna'j tzkij. 12Cjawil cybincha'n cytanmiye juntl maj, aju otok cub xitj, ex cjawil cybincha'ne juntl maj tibaj ju simyent tcubsa'n ojtxi. C'oquel k'o'n cybi ke cytanmiye: “Ke binchal muro otok che cub tz'ak” ex “Ke binchal juntl maj ke ja otok che cub xitj”. 13Cynimanxe aju k'ij te ojlabl ex mi'n cybinchaye aju cyajbile tu'n tbant cyu'ne tuj ju k'ij toc wu'ne te xjan, che ximane ti'j ju k'ij lu ic tza'n jun k'ij te tzalajbil, jun k'ij toc te xjan wu'ne ex ba'n tu'n tnimanjtz; cynimanxe ex mi'n che bete tuj cyeye cybeye, mi tu'n cyjyone ti'j alcye in pon cyc'u'je ti'j, ex mi tu'n cyyoline cyi'j yol nokx gan. 14Ka ma cybinchaye jlu cneteltzun tzalajbil cyu'ne wuc'ile, ex che oquele juntl maj tajwil ju tx'otx' cyuc'ix ke witz te tnam, ex che tzalajele wu'ne ti'j tetzbil cyxe'chele Jacob, aju xi nk'o'ne te. Ax kine ma chin k'mante jlu.

will be added

X\