ISAÍAS 57

1In che cyim ke xjal tz'aklxix ex minti' in tzaj ch'in cyximbetz xjal cyi'j, ke xjal nimal Dios in che cub naj ex mi a'l jun nne'l tnic' ti'j; oc cycyim in che tzokpet tu'n mi'n cyten tuj jun c'ixc'oj, 2ex in che ten tuj txubtxaj. Otok che bet tuj tumelxix ex atzun ja'lo in che ojlan jatum maku'n ke. 3Che lak'etze akeye tal jun xu'j ba'n cy'a'n, akeye o che el itz'j ti'j jun xu'j aj pajil ex ti'j jun xu'j jawni twitz cyuc'il xinak: 4¿Al i'j in che xmayine? ¿Al i'j in jaw cyyuch'ine twi cytxa'ne? ¿Al i'j in xi cyyec'une cyak'e? Akeye cyc'wa'l xjal miban che bin ex nic'al yol ke, 5in xi cyk'on cyibe tu'n cyc'ulune cywitz ke tilbilal, ex tu'n cyyaẍine cyjak' c'ol ex cyjak' cycyakil tze' nim cyxak, ex in xi cyk'o'ne cyc'wa'le te chojbil cytxlaj ke tk'ab xak ex cyuj ke cypa'xil pic. 6Akeye aj Israel, mas ba'n tuj cywitze tu'n t-xi cyk'o'ne c'ulbil cywitz ke abj tz'umin cywitz ate' tuj tk'ab xak, porque atzun ta' jun lugar pa'maj cyu'ne te cyeye. Cyibajtzun keju abj lu ma cub cyko'ne ta'l twitz uva te oyaj cye ex ma txi cyk'o'ne twitz awal te oyaj cye. ¿Ocpetzun chin tzalajele ti'j tcyakil jlu? 7Twi' jun witz ma'xix twa'l, atzun cub cyk'o'ne cywatbile tu'n cyyaẍine, ex axtzun in che jaxe k'olte ju chojbil. 8Ti'jxi tpwertil cyjaye cub cyk'o'ne ke tilbilal ic'bilxix. Ma tzic' nna'njtze cyu'ne, ma tz'el cyskitin cyi'je ex ma che cub tane twi cywatbile ma' twitz; ma bant cytrate cyuc'il ke xinak akeju cyajbile tu'n cycub tane cyuc'il, ex in che que'yine cyi'j ke tilbilal. 9E je'x kelane tu'n cypone jatum ta' ju dios Mélec, k'i'n aseyt cyu'ne ex nimxix tajlal perjum; xi cysama'ne ke sanjel najchak wen, xi cysama'ne tu'n cycu'pun tuj cynajbil cyimni. 10E sicte tu'nju nimxix e bete, pero minti' el cynic'e ti'j ka tcyakil jlu minti' tajben. Oc juntl maj cyipune ex tu'ntzun jlu minti' e sicte. 11¿Alcyetzun ke dios in che xobtoke cywitz ex in xi cyk'o'ne nimbil cye, tu'nju minti' ma japun nyole cyu'ne ex ma tzic' nna'njtze cyu'ne te jumajx? ¿Myapetzun ax toc minti' in che xobe nwitze, tu'nju minti' in chin k'ajte atxix ojtxi? 12Pero cxel nma'ne cyeye alcye cymodiye, tuj cynable tz'aklxix ate'ye, pero tcyakil jlu mlay tz'ajben te cyeye. 13Oc cyjaw sch'ine tu'n cytzaj onine, mlay che tzaj onine cyu'n ke tilbilal in che c'ulune cywitz, ex mlay che clete cyu'n. Cycyakil ke che xel ikan tu'n cyk'ik'; nok che bel naj oc cyel xupin tu'n cyk'ik'. Atzun ke xjal k'ukl cyc'u'j wi'je, che etzal ti'j ju tx'otx' ex che najal twi' ju witz xjan etzan wu'ne. 14Cbinjtzel jun yol cyja': Cybinchame jun be chk'ajlaj tuj, cyi'mele ke ti'xti tolsabl cycub tuj be, tu'ntzun cyex ke xjal etzan wu'ne, chi Dios. 15Porque ate Dios aju at tuj cya'j, aju itz' te jumajx ex aju toc tbi Xjan, in tma'n cyja': Atzun najl kine tuj jun lugar najchak tjaw ex xjan, pero ax icx atine tuc'il ju xjal mans ex ma tz'ajtz ti'j tanmi, ax icx in xi ncyuwsa'ne tc'u'j ex in xi nk'ukba'ne tc'u'j. 16Mya cucx cxel nma'ne cyil ke xjal etzan wu'ne ex mya cucx tu'n ttzaj tlo'ch nc'u'je cyi'j; porque ka cucx ma bant wu'ne icju, jacu tzaj baj cyc'u'j nwitze ke xjal nch'isbene. 17Tu'n tlaj cyil ke aj Israel tzaj nk'oje cyi'j, cub cycastiw wu'ne ex el npa'n wibe cyi'j; atzun cye cucx el cypa'n cyib wi'je ex cucx e oc lpe' ti'j cyex cyajbil. 18Ma wile cybinchben mya ba'n, pero che banixel wu'ne ex che xel nẍaklu'ne. Cxel nk'ukba'ne cyc'u'j keju in che bisun, 19ex cxel nk'o'ne bitz tuj cytzi'. E cyten tuj txubtxaj keju ate' najchak, ex e cyten tuj txubtxaj keju ate' nikayin ex che banixel wu'ne. 20Pero ke xjal mya ba'n, ic cyten ic tza'n jun mar in pulin wen, minti' tu'n twe' ex nne'tz t-xo'n xok'l ex ttz'ilil. 21Ke xjal mya ba'n mlay che ten tuj txubtxaj, chi Dios.

will be added

X\