ISAÍAS 56

1In tma'n Kman cyja': Cybinchame ti'j xtis, cybinchame aju tuj tumelxix, porque ch'ix tul canun aju colbil cyeye ex cxel nyec'une wipumale tu'n cyclete. 2At tzalajbil te xjal aju cucx t-xi tniman ke yol lu ex in che japun tu'n tuj tumelxix, aju xo'n ju k'ij te ojlabl tu'n ex minti' nno'c tk'o'n te minti' tajben, aju toc tcwent ti'j tu'n mi'n tbinchante jun mya ba'n. 3Ka at jun stranjer xjal ma txi tk'on tib te Kman, mi'n txi tma'n cyja': Part chin tele tu'n Kman ti'j ju tnam etzan tu'n, chiwt. Ax icx ju xinak minti' tumel tu'n tten t-xu'jil, mi'n txi tma'n cyja': Mer ic tza'n jun tze' tzkij kine, chiwt. 4Porque in tma'n Kman cyja': Akeju xinak minti' tumel tu'n tten cyxu'jil, ka ma txi cyniman keju k'ij te ojlabl k'ma'maj wu'ne, ex ka ma japun aju wajbile cyu'n, ex ka cucx ma che ten wa'lxix tuj ju yol o cyaj bant ti'j wu'ne, 5cxel nk'o'ne jun ti'xti cye mejorxix twitzju tu'n tten cyc'wa'l, cucx ctzajel na'n cybi tuj njaye tujxi ju muro te njaye, ex cxel nk'o'ne jun cybi tu'n tten te jumajx, ex mlayx jaw k'uchin. 6Ex akeju stranjer xjal ctzajel cyk'on cyib wuc'ile tu'n cyajben weye ex tu'n tten cyc'ujlalil wi'je, tu'ntzun cyoc te nmajene, ka ma txi cyniman keju k'ij te ojlabl, ka mi'n ma tz'oc cyk'o'n te minti' tajben ex ka cucx ma che ten wa'lxix tuj ju yol o cyaj bant ti'j wu'ne, 7che tzajel wi'ne twi witz xjan aju etzan wu'ne, ex che tzalajel wu'ne tuj njaye te nabl weye. Twi altar etzan wu'ne cc'metel wu'ne aju cyoyaj patun in cub, ax icx ke chojbil ctzajel cyk'o'n weye, porque aju njaye, ja te nabl Dios tbi c'oquel te cye cycyakil tnam. 8Che ajetz meltz'aj wu'ne ke xjal otok che'x k'i'n pres najchak, chi Kman Dios aju nna'jtz chmonte cye aj Israel, akeju otok che baj sputj. 9Cytzaje akeye txcup ate' tuj cojbil, cytzaje akeye jil te tjak' c'ul, cytzaje chyo'l ke ẍne'l; 10porque ke cwentil cye ke xjal etzan wu'ne mer ma cub moẍxix cywitz ex minti' ch'in ba'n cyu'n. Cycyakil ke jlu ic cyten ic tza'n tx'yan miban che k'ajt ex miban che kawin, nok bunl ke ex in che witzcy'an, nimxix cygan tu'n cytan. 11Mer ic tza'n tx'yan ke, nok nne'l cyc'u'j ex minti' in che noj, pastor ke ex minti' nne'l ch'in cynic' ti'j; teylex te junjun in xi ti'n tex tbe, o'cx in che jyon ti'j aju cyex cyajbil. 12In cyma'n cyja': Ko' jyolte kc'a vin ex jyolte k'e'n aju mas at-xix ta'w, tu'ntzun tchyo'n kwi'. Ex e tbant ku'n nchi'j, ic tza'n cbantel ku'n ja'lo ex ka masxix ch'intl.

will be added

X\