ISAÍAS 55

1Cycyakile akeye in che txkete, cytzaje tu'n cyc'ane a'; akeye minti' cypwake, cytzaje, jacu cnet triw nok cucx te cyeye ex che wa'ne; jacu cnet cyc'aye ta'l twitz uva ex cyc'aye lech nok cucx ex minti' tu'n tchjet cyu'ne. 2¿Tiku'n nokx gan tu'n tbaj cynajsa'ne cypwake ka mya wabj tu'n tlak'et cyu'ne? ¿Tiku'n tu'n tbaj cynajsa'ne twi cyc'u'je ti'j ju minti' in che noje tu'n? Cyk'ontz cywi'ye ti'j nyole ex che wa'le tbanil wabj ex che nic'bele cyi'j ke ti'xti nim tc'oc'jal. 3Cytzaje wuc'ile ex cyk'ontz cywi'ye ti'j nyole, chin cybintze ex che ank'ile. Cyjel bant ti'j jun nyole cyuc'ile tu'n tcyaj ten te jumajx, tu'ntzun tjapun aju nyole xi ntziyane te David, tu'nju at nc'ujlalile ti'j. 4Oc nk'o'ne David ic tza'n jun testiw cye xjal tu'n tel cynic' wi'je, ex te jun nejenel ex k'ol xnak'tzbil cye xjal. 5Ctzajel ttxco'na ke xjal minti' ojtzki'n cywitz tu'na; ke xjal mi ojtzki'na cyu'n che ul kelan tuc'ila, porque akine aju Dios Xjan cye aj Israel, ma jaw nnimsa'ne, chi Kman. 6Che jyone ti'j Kman acux at ambil cyeye tu'n tcnet cyu'ne, che cubsane twitz acux nikayin ta'. 7Aju xjal binchal il, ba'n tu'n tcyaj tcolin ju tbe mya ba'n, aju xjal binchal tplojil, ba'n tu'n tcyaj tk'o'n ju t-ximbetz mya ba'n; e tajtz meltz'aj tuc'il Kdios, porque ate Dios at nim xtalbil tuc'il tu'n tcub tnajsa'n cyil xjal. 8Porque chi Kman cyja': Aju weye nximbetz, mya junx ta' ic tza'n cyeye cyximbetz, ex oc in bant jun ti'xti wu'ne, mya ic tten ic tza'n cyeye in bant cyu'n. 9Ic tza'n te cya'j ma' tjaw tibaj tx'otx', icxtzun weye nximbetz ex aju tumlal in bant wu'ne, mas ma' t-xilen twitz cyximbetze ex twitz aju in bant cyu'ne. 10Ic tza'n jbal ex ttxa che'w in cu'tz twitz cya'j, minti' nna'j meltz'aj juntl maj, nok o'cx in baj ac'ix twitz tx'otx' tu'n, tu'n tpok'l tawal ex tu'n toc twitz, tu'n tk'onte iyaj, ex tu'n tcu'x awet juntl maj, ex tu'n ttzaj tk'o'n twa ju in awan ti'j, 11icxtzun we nyol in xi nma'ne, mlay tz'ajtz meltz'aj juntl maj wuc'ile nok cucx, nok o'cx in tbincha'n alcye wajbile ex in japun tu'n aju in xi nma'ne tu'n tbant. 12Che eletze ma chixin tuc'il tzalajbil, che ul meltz'aje tuj txubtxaj. Oc cyque'yinjtze cyu'n ke nmak witz ex ke tal witz, che jawil bitzan tu'n tzalajbil ex cycyakil tze' tuj cojbil che jawil tzalaj. 13Te t-xel ch'i'x, che tzajel ch'iy tzaj, ex te t-xel la, ctzajel ch'iy k'atxab; atzun jlu c-yec'ulte ma' t-xilen tbi Kman; cyjel ten te jun techal te jumajx ex mlay naj.

will be added

X\