ISAÍAS 54

1Tjaw sch'ina tu'n tzalajbil aya xu'j miban alina ex minti' jun tala o tzaj; tjaw bitzana tu'n tzalajbil aya bajx tzaj jun tala, porque chi Kman cyja': Aju xu'j o cyaj colin tu'n tchmil, mas nim tal che ul itz'j twitz ju xu'j at tchmil. 2Nimsa'n el tuj tjaya xbalun ex mi'n xoba tu'n t-xi tlic'pu'na ju xbalun tocxa tuj, nukpinxa mas ke tak'al ex pajo'n cu'xa mas ke stac te tzuybil te, 3porque max cpol baja tuj tcyakil lugar ti'jeleya; ke tiyjila cbel cyi'j nimcu nasyon cyu'n, ex che najal cyuj ke tnam minti' xjal cyuj ja'lo. 4Mi'n xoba, mlay cub tch'ixwiya ex mlay tz'oc ic'lena. C'ic'el tna'l tu'na aju tch'ixwiya tzaj tej matok k'apojxa ex mlay tzaj tna'ntla aju tch'ixwiya cub tej ttena te meba xu'j, 5porque aju binchante teya cjawil xu'jla'na tu'n, ex atzun tbi jlu: Kman aju Tajaw Tcyakil; aju colpil teya atzun Dios Xjan cye aj Israel, ex atzun Dios tuj tcyakil twitz tx'otx'. 6Ic ttena ic tza'n jun xu'j o cyaj colin tu'n tchmil cy'itzketok toclen moje', ex at nim tbis, pero ma txconjtza juntl maj tu'n Dios ex in tma'n teya cyja': 7Nok ch'in tuj cyaj ncolina, pero tu'nju at nim nxtalbile, ctzajel wi'ne juntl maj tu'n tmoje'ya wuc'ile. 8Nok tu'nju in jaw cyakpaje, o tz'el npa'n wibe te jun rat ti'ja, pero tu'nju minti' bajsbil te nc'ujlalile, ctzajel tz'e'y nc'u'je ti'ja, chi Kman aju Colpil teya. 9Ic tza'n xi nma'ne jun nyole axix toc te Noé, tu'n mi'n tnaj juntl maj twitz tx'otx' tu'n a', icxtzun cxel nma'ne jun nyole axix toc ja'lo, tu'n mi'n ttzaj juntl maj nk'oje ti'ja, ex tu'n mi'n woc tzokpaje cyuw tu'n nyole ti'ja. 10Masque ch'expet cylugar ke nmak witz ex masque che cub xitj ke tal witz, aju nc'ujlalile ti'ja mlay ch'expet ex mlay ch'expet aju nyole cyaj bant ti'j cyuc'ile tu'n cytene tuj txubtxaj, chi Kman, aju at tc'u'j cyi'je. 11Bec'bil twitza tnam Jerusalén, ma baj yajla'na cyu'n xjal ic tza'n in naj jun tnam tu'n jun nintz cyk'ik', ex mi a'l jun ma k'ukbante tc'u'ja. Atzun ja'lo tbanil abj azabache cybi che ajbel te muro wu'ne ti'ja, ex ju t-simyentila cbantel cyi'j ke tbanil abj zafiro cybi. 12Ke tbanil abj rubí cybi che ajbel tu'n cyjaw binchet ke ja ma' cywa'l te cwentbil tnam, ke tpwertila che bantel cyi'j ke tbanil abj berilo cybi, ex aju muro c'oquel ti'ja, ti'j tbanil abj cjawil binchet. 13Cxel nk'o'ne xnak'tzbil cye xjal che najal tuja ex cycyakil che tel tuj txubtxaj. 14C'oquel nimxix tipuna oc tbinchet aju tz'aklxix tu'na; minti'tl yajbil ti'ja, mlay xoba, ex mlay tzaj juntl maj xobajil ti'ja. 15Ka at jun ma tz'oc tzokpaj ti'ja, mya wu'ne sama'n jlu, pero cbel ti'j tu'na aju c'oquel tzokpaj ti'ja. 16Bintza, akine in binchante cye xjal tx'inol c'uxbil nno'cx cyxupin k'ak' tu'n tjaw c'ant, ex in che bant tcyakil txcaj ubl cyu'n nok alcyex tajben; ax icx ma nbinchaye ju xjal in baj naj nimcu tu'n, tu'n tbaj t-xitun nimcu; 17pero mi jun xjal jacu bant jun ubl tu'n tu'n tnaja tu'n. Bi'x cmaksetel cytzi' tu'na, akeju in tzaj cyma'n ka at tila. Atzun jlu in xi nk'o'ne cye keju in che ajben weye, ex aju colbil cye, wu'ne in xi nk'o'ne, chi Kman.

will be added

X\