ISAÍAS 53

1¿Mape txi cyocsla'n xjal kpacbable? ¿Mape pon cynabl xjal ti'j tipumal Kman? 2O tajbe Kman tu'n tch'iy tmajen ic tza'n awal ma in ch'iy ex in xi' tloc' tuj tzkij tx'otx'. Mya tbanil que'yin ex aju que'yin twitz, mlay ko tzalaj ti'j; 3el ic'un cyu'n xjal ex minti' e tzalaj ti'j. Aju xjal lu nimcu c'ixc'oj tzaj ti'j ex ba'n tu'n tza'n ta'w c'ixc'oj. Ic tza'n jun xjal minti' kaj tu'n toc kque'yin, ic'un ku'n ex minti' kaj ti'j. 4Masque icju, xi tikan tcyakilju c'ixc'oj at ki'j, ex ic'x ta'w c'ixc'oj tu'n nok tu'n klaj. Ximan ku'n ka tu'n Dios otok tz'oc c'ixbisa'n ex otok cub k'o'n tcastiw ex otok tz'oc yajla'n. 5Pero o c'ixbisanjtz tu'n klaj, tu'nju miban ko bin; nimxix c'ixc'oj ic'x tu'n tu'n tlaj kbinchben mya ba'n; tu'nju ic'x castiw tu'n, cyja'tzun ma ko ten tuj txubtxaj, ex tu'nju tc'ixblen ma ko banix. 6Kcyakil ma ko'x tzpet; ic tza'n ke ẍne'l in che'x tzpet, teyle junjun in xi' tuj tex tbe, pero ate Kman cub k'onte kbinchben mya ba'n tibaj tmajen tu'n t-xi tikan. 7O baj yajla'n, pero cub tipa'n ex cub tmansin tib, minti' o k'ajt; xi k'i'n ic tza'n jun ẍne'l in xi k'i'n tuj biybil te ex ic tza'n jun ẍne'l minti' in k'ajt oc nne'l matzo'n ttzmal, icxtzun te, minti' o k'ajt. 8Nokx gan xi k'i'n pres, minti' til ex mi a'l jun colin ti'j; misicyer jun tzaj tbis ti'j. Bi'x o naj nmajene cyxol xjal tzalu twitz tx'otx' ex cub t-sentens tu'n tcyim tu'n tlaj cyil ke xjal etzan wu'ne. 9Cub cyximan xjal tu'n tcu'x maku'n cyxol ke xjal binchal mya ba'n, pero ocx maku'n junx cyuc'il ke k'inun, masque minti' jun mya ba'n otok tbincha ex minti' o tma jun yol te sbubl. 10O tajbe Kman tu'n tc'ixbiset ex tu'n tyajlanjtz. Ex tu'nju xi tk'on tib tu'n tchjet il te jumajx, ctel nim tank'ibl ex cpol que'yil ke tiyjil che ul itz'j te tibajxi; nok tu'n, c'elel ba'n aju tajbil Kman tu'n tbant. 11Tic'lenxitzun nim yajbil ti'j, oc tila' ju spic'un ex nimxix ctzalajel ti'j oc tque'yinte; tu'nju tz'aklxix ju tmajen Kman, che colpetel nimcu xjal tu'n, porque cxel tikan ju cybinchben mya ba'n. 12Cyja'tzun cxel tk'o'n Dios jun toclen cyxol keju ma' cyoclen, ex tuc'ix ctel cyxol keju at cyipumal oc tbant cysipan aju otok cycamba tuj k'oj, tu'nju xi tk'on tib tu'n tcyim, ex cyxol ke mya ba'n oc te tajlal, ex xi tikan cyil nimcu, ex o cubsan twitz Dios cyi'j xjal tu'n tnajset cyil.

will be added

X\