ISAÍAS 52

1Che we'ctze akeye aj Sión, che wec'tze, cyk'o'nc cyipune akeye aj Jerusalén aju tnam xjan, cyk'o'nc cyxbalune tbanilxix, porque ke xjal mya ocslal ti'j Dios ex mya sak tuj cyanmi mlay che octz juntl maj tuj cytanmiye. 2Che we'ctze akeye aj Jerusalén, cychto'n ele kuk cyi'je, che kecuye tuj k'ukbil te cawbil; akeye aj Sión e je'x k'i'ne pres, cyi'n ele aju caden c'alo'n ti'j cykule. 3Chi Kman cyja': Mi jun sentav o nc'ame cyi'je tej cyxi c'ayine tu'n cyoque te majen; ax icx weye mi jun sentav cxel nk'o'ne cyi'je tu'n cycolpete wu'ne. 4T-xe tnejel ke xjal etzan wu'ne e je'x tuj tnam Ejipt ex e ten ic tza'n stranjer xjal ma chixin; te tibajxi nokx gan ma che yajlet cyu'n aj Asiria. 5Atzun ja'lo, ¿ti nbaj weye tzalu? Ke xjal etzan wu'ne ma che'x k'i'n tuj Babilonia ex minti' cyil. Ke xjal ma cub cyi'j aj Israel cyu'n in che sch'in tu'nju in jaw cyniman cyib, ex tcyakil k'ij in che yolin mya ba'n wi'je. 6Pero tzul tk'ijlalil tu'n tel cynic' xjal wi'je, akeju etzan wu'ne, akine Dios o chinx yoline cye. 7Tbanilxix tque'yinx ju xjal in bet cywi' ke tal witz in pacban tkanil tu'n cyten xjal tuj txubtxaj, in pacban tkanil ba'n ex in tk'o'n tkanil tzokpibl, ex in tma'n cye aj Sión cyja': Aju Cydiose cucx tcawin. 8Cybinxe, in jaw tk'ajk'ajel cywi' ke cwentil cytanmiye ex junx in che sch'in tu'n tzalajbil, porque ax ke in che que'yinte tza'n tten cyja' ttzaj juntl maj Kman tu'n tul tuj tnam Sión. 9Che sch'ine wen tu'n tzalajbil akeye aj Jerusalén masque o cub xitj cytanmiye, porque ma tzaj tk'ukba'n Kman cyc'u'j ke xjal etzan tu'n ex ma colpet tnam Jerusalén tu'n. 10Ma tzaj tyec'un Kman tipumal cywitz cycyakil nasyon. Tuj tcyakil twitz tx'otx' oc cybi' xjal ma ko clet tu'n Kdios. 11Cyetze, cyetz naje tuj Babilonia, mi'n tz'oc cymaco'ne ju ttz'ilil, cyetze tuj Babilonia. Ba'n tu'n tcub cycwentin cyibe ti'j mya ba'n, akeye k'ilte cycyakil ke macbil in che ajben tuj tja Kman. 12Pero mya jurat naj che eletze, ex mya nok che eletz oke, porque ate Kman aju Cydiose c'oquel cwentin cyeye, akeye aj Israel; a cbel nej cywitze ex ax ctzajel lpe' cyi'je. 13Ba'n c'elel tcyakil te nmajene, cjawil nimsa'n ex c'oquel k'o'n toclen ma'xix. 14Nimcu xjal bi'x naj cynabl tej cyque'yinte tej tch'expet tilbilal ex mya ic que'yintl ic tza'n jun xjal. 15Atzun ja'lo che labil nimcu nasyon ti'j; ke rey, oc cyque'yinte, mlay che yolin tu'n cyxobil, porque c'oquel cyque'yin aju bajxtok tzaj k'ma'n cye ex c'elel cynic' ti'j aju bajxtok cybi.

will be added

X\