ISAÍAS 51

1Chin cybintze, akeye cyajbile tu'n cyank'ine tuj tumelxix ex akeye in che jyon wi'je, chi Kman in tma'n: Cyque'yintze aju pic jatum e el tx'emine, ex aju lugar jatum in jatz abj axtzun e je'tz k'i'ne; 2che ximane ti'j Abraham aju cyxe'chele, ex che ximane ti'j Sara aju tzaj alinte cyeye. Tej ttxquet Abraham wu'ne, tjunalxtok te at, pero cub ncy'iwla'ne ex chmet-xix cybaj tiyjil wu'ne. 3Cxel nk'ukba'ne cyc'u'j aj Sión, aju tnam otok cub xitj tcyakil. Aju tzkij tx'otx' c'oquel wu'ne te tkan awal, ic tza'n tkan awal cub nk'o'ne tuj Edén. Tuj tnam lu ctel tzalajbil ex che tel xjal tuj txubtxaj, cxel cybitzan ke bitz te ak'bil chjonte te weye tuc'il tk'ajk'ajel twi chnab. 4Akeye xjal etzan wu'ne chin cybintze, aya nasyon sc'o'maj wu'ne chin tbintza: Akine chin k'malte xnak'tzbil, ex ke nmandamyente che ajbel te spic'un cye tnam. 5Ch'ix tul canun tk'ijlalil tzokpibl wu'ne; aju colpibl wu'ne cyja' ttzaj lak'e'; tuc'il wipumale chin cawile cyibaj ke tnam. Ke tnam ate' ttzi'yile mar in che ayon wi'je ex nno'c ke' cyc'u'j ti'j wipumale. 6Cyque'yin jawe twitz cya'j ex cyque'yin cube twitz tx'otx'; cbel naj cya'j ic tza'n sib, cbajel tipun tx'otx' ic tza'n jun xbalun in baj, ke xjal najl twitz che cymel ic tza'n ke tal us. Atzunju colbil wu'ne cucx cyjel ten te jumajx, ex aju tzokpibl wu'ne minti' bajsbil te. 7Chin cybintze, akeye nne'l cynic'e ti'j alcyeju tz'aklxix ex awa'n nxnak'tzbile tuj cyanmiye. Mi'n che xobe ka in che oc ic'le'ne cyu'n xjal, mi'n che el sec'paje ka ma che oc yaso'ne cyu'n, 8porque che najel ic tza'n in naj xbalun tu'n poc' ex ic tza'n in baj tamtz'u'n lan tu'n sk'i'n. Pero aju tzokpibl wu'ne cucx ctel te jumajx, ex aju colbil wu'ne minti' bajsbil te, chi Kman. 9Tzulx tnabla Kman, tenx tipun tk'aba, tzulx tnabla ic tza'n o tbinchaya tuj tk'ijlalil ojtxi. Tu'na baj tpaẍu'na aju nintz txcup Rahab ex tu'na baj t-xayu'na aju nintz txcup dragón, 10tzkij ju mar tu'na, aju ma' t-xe', ex bant jun be tu'na max t-xe'pun mar tu'n cyic'tz ke xjal tuj, akeju otok che colpet. 11Cyja'xtzun tten che ul meltz'aj keju ma che colpet tu'n Kman, ex che oquex tuj tnam Sión in che bitzan tu'n tzalajbil; ex cucx ctzalajel cywitz; cnetel tzalajbil cyu'n ex che tel tuj txubtxaj; mlay che tentl tuj bis ex mlay che ayayantl. 12Chi Kman cyja': Ax kine chin xel k'ukbante cyc'u'je. ¿Tiku'n in che xobe cywitz ke xjal in che cyim, akeju ic cyten ic tza'n ch'im jurat in tzkij? 13¿Mape tz'ic tna'l Kman cyu'ne, aju pok'salte cyeye, aju xi lic'unte cya'j ex cub tk'o'n t-simyentil tx'otx'? ¿Coc'xpe che lu'lule tcyakil k'ij tu'n tlaj cytx'u'jil keju ba'n che yajlan ex ma bant cyten tu'n cynaje cyu'n? Pero ¿jatumtzun ta' aju cytx'u'jil ja'lo? 14Ke xjal in che yajlanjtz tuj pres, jurat che tzokpetel, mlay che cyim tuj calabós ex cucx cxel k'o'n cywa. 15Akine Cymane aju Cydiose aju Tajaw Tcyakil, atzun nbiye jlu; wu'ne in yucch twitz mar ex in julin oc in xtulk'in a', 16wu'ne xi nlic'pu'ne cya'j ex wu'ne cub nk'o'ne tk'ukbil tx'otx'. Wu'ne ocx nk'o'ne ke nyole tuj cytzi'ye ex e oc ncwentine tjak' t-xlecumal nk'abe. Xi nma'ne cye aj Sión: Akeye etzan wu'ne. 17Tzulx cynable, tzulx cynable akeye aj Jerusalén, che we'ctze. O che c'ixbisanjtze tu'n tk'oj Kman mer ic tza'n jun xjal in xi tc'a'n k'e'n, cxel tc'a'n ocxi tbaj tu'n ex ocxi tchyo'n twi'. 18Cyxol cycyakil ke cyc'wa'le o che tzaj, minti' jun in xi ẍaklunte cyeye; cyxol cycyakil ke cyc'wa'le o che cub cych'isune, minti' jun in xi katonte cyeye. 19Atzun ke cabe mya ba'n lu e tzaj cyibaje: Aju cytanmiye o cub xitun ex o tz'ex elk'an aju at tuj, ex ke xjal ate' tuj e cyim tu'n we'yaj ex tu'n k'oj. ¿Alcye jun jacu tzaj tz'e'y tc'u'j cyi'je? ¿Alcye jun jacu tzaj k'ukbante cyc'u'je? 20Ke cyxjalile ma baj cyipun, ic cyten ic tza'n jun masat otok tzyet tu'n c'obil, palch ke cyuj cyscyin tcyakil cay, ma che tza'w tu'n tk'oj Kman Dios ex tu'nju ma che tzaj cawin tu'n. 21Cyja'tzun, akeye xjal ate'ye tuj yajbil cybintze jlu, ma chyo'n cywi'ye pero mya tu'n vin. 22Chi Kman aju Cydiose cyja', aju in colin cyi'j ke xjal etzan tu'n: C'elel wi'ne aju copa tuj cyk'abe, aju xi nk'o'ne cyeye tej ttzaj ntx'u'jile cyi'je ex chyo'n cywi'ye tu'n, ex mlay txi cyc'antle juntl maj. 23Cxel nk'o'ne cye keju ma che c'ixbisante cyeye, akeju in cyma'ntok cyeye cyja': Che palecuye twitz tx'otx' porque ko ic'ex bete cyibaje, che chi; atzun cyeye e cub pale'ye twitz tx'otx', ic e oque ic tza'n be tu'n cyic'x bet xjal cyibaje.

will be added

X\