ISAÍAS 50

1Chi Kman cyja': Mi'n che ximane ti'j ka ma che cyaj ncoline ke aj Israel ic tza'n jun xinak nne'x tlajo'n t-xu'jil, ex mi'n che ximane ti'j ka ma che'x nc'ayine ke tu'n cyoc te majen tu'nju at cyc'as tuc'il juntl. E je'x nc'ayine ke aj Israel tu'n tlaj e binchan il, ex tu'nju el cypa'n cyib wi'je ex e oc miban che niman. 2¿Tiku'n mi a'l jun o cnet wu'ne tej wule? ¿Tiku'n mi a'l jun tzaj tzak'wente weye tej ntxocone? ¿Baka minti' wipumale tu'n cycolpete, ex baka mlay che tzokpete wu'ne? Nok tu'n jun nyole oc t-xi nma'ne, nna'j tzkij mar ex ke nima in che oc te tzkij tx'otx'; tu'n jlu in che baj cyim ke cyiẍ tu'n txketle'n ex in che k'ay tu'nju minti' a'. 3Wu'ne nno'c yupj twitz cya'j ex bis in cyaj. 4Ma tzaj k'o'n nnable tu'n Kman tu'n t-xi nma'ne jun yol te k'ukbabl cyc'u'j ke xjal ma che sict. Cycyakil prim in chin jaw c'asune tu'n Kman tu'n t-xi nk'o'ne nwi'ye ti'j tyol, ic tza'n jun xnak'tzben. 5A Kman ma tzaj k'onte nnable, minti' ma tz'el wic'une ex minti' ma chin el oke ti'j. 6Xi nk'o'ne ttzal wi'je tu'n nbaj asyaline ex minti' in k'ajte tej tjatz bako'n nxmatze. Minti' el wewane nwitze cye keju e oc yasonte weye ex cye keju ocx cytzuban tuj nwitze. 7Ate Kman onil weye, cyja'tzun minti' tzaj nch'ixwiye cywitz keju e oc yasonte weye, ex cyuw ntene ic tza'n jun pic, porque ba'n wu'ne mlay cub nch'ixwiye. 8Tcub ju colol wi'je ntxlaje: ¿Atpe jun at tk'oj wi'je? Ko' junx twitz jwes. ¿Atpe jun taj tu'n tmante alcye wile? E ttzaj wuc'ile ex e ttzaj tma'n weye. 9Ate Kman onil weye, ¿alcye jun jacu cub k'onte nsentense? Cycyakil aj k'oj wi'je che bel naj ic tza'n jun xbalun in baj tu'n poc'. 10Akeye in che niman te Kman ex in xi cybi'ne aju in tma'n tmajen, ka in che bete tuj klolj ex minti' ch'in spic'un tuj cybeye, toc ke' cyc'u'je ti'j Kman, cyokxenanx cyibe tuj tk'ab Dios. 11Pero cycyakile akeye nno'c cytxako'ne k'ak' ex in tzaj cytzyu'ne ttxa'n tzaj, che bete tuj t-spic'umal k'ak' ex che bete tuj t-spic'umal ttxa'n tzaj otok tz'oc cytxako'ne. Ctzajel t-sama'n Kman aju castiw lu cyibaje, ex ax che cyjel pale'ye tuj c'ixbisabl.

will be added

X\