ISAÍAS 48

1Cybintze jlu akeye tiyjil Jacob, toc cybiye aj Israel ex tiyjil Judá keye, in xi cytziyane jun yol axix toc tuj tbi Kman, in tzaj cyna'ne tbi Cydios aj Israel, pero mya ax toc cyu'ne ex mya tz'akl keye twitz. 2In cyma'ne cyja': Teju tnam xjan ko'ye, che chiye, ex k'ukl toc cyc'u'je ti'j Cydios aj Israel, aju toc tbi Kman aju Tajaw Tcyakil. 3Atxix t-xe tnejel xi nma'ne tkanil cyeye cyi'j ke ti'xti o che baj ex ax kine o chinx yec'unte cyeye. Jurat o nbinchaye ex ax toc o che bant. 4Ba'n wu'ne cyuw cywi'ye, cyuw keye ic tza'n c'uxbil, ex ic tza'n k'an c'uxbil mlay cub paktz'aj ti'j. 5Xi nma'ne tkanil cyeye atxix ojtxi, xi nma'ne cyeye tej na'nxtok tu'n tul canun. Cyja'tzun mlay bant tu'n t-xi cyma'ne cyja': Aju tilbilal kdiose tze' ex ke tilbilal c'uxbil cytx'otx'il, atzun keju ma che k'mante tu'n tbant icju. 6O cybiye tcyakil jlu; cyk'onque cwent ti'j ex cxel cynimane ka ax toc; atzun ja'lo cxel nma'ne ac'aj tkanil cyeye cyi'j ke ti'xti ate' tuj ewaj, akeju minti'tok ojtzki'n cyu'ne, 7akeju ti'xti lu ma che binchet ja'lo, mya ojtxi e bant ex na'nxtok cybinteye tkanil cyi'j, ex matzun ja'lo ma cybiye. Cyja'tzun mlay bant txi cyma'ne cyja': Bi'maj jlu ku'ne. 8Na'nxtok cybinteye tkanil cyi'j ex minti'tok ojtzki'n cyu'ne, porque tcyakil maj minti' in xi cybi'ne, mer ic tza'n lamo'n tuj cyẍcyine. Ba'n wu'ne, tcyakil aju in cyma'ne mya ax toc, ex atxix tej cyitz'je toc cybiye te miban che nimane. 9Pero xi nc'u'ne nk'oje, nok tu'n tjaw nimsa'n nbiye, ex we' nk'oje; cyja'tzun minti' e naje wu'ne. 10Akine in baj saksante cyeye, pero mya ic e tenbaye ic tza'n in tenba sak pwak, nok o'cx e ocx nk'o'ne tuj nim c'ixbisabl, mer ic tza'n tuj jun jorni. 11Tu'n tlaj nbiye ma'xix toclen ma nbinchaye jlu, porque mlay wak'e ambil tu'n tyolinjtz mya ba'n wi'je. Mlay wak'e ambil tu'n tjaw nimsa'n tbi juntl te nxele, chi Dios. 12Chin cybintze akeye aj Israel tiyjil Jacob; o che txocliye wu'ne, akine o'cxcu jun Dios, akine t-xe tnejel ex ax kine te bajsbil. 13Tu'n nk'abe cub nk'o'ne tk'ukbil tx'otx' ex wu'nxe xi nlic'une cya'j; oc cytzaj ntxco'ne in che ul lak'e'. 14Cychmon oc cyibe cycyakile ex cybintze: ¿Alcye jun cyxol ke tilbilal nno'c cydiosin xjal o k'mante tkanil ti'j ju ctzajel? Aju xinak o jaw nsc'o'ne cbantel tu'n aju o cub nximane tu'n tbant ti'j Babilonia, ex c'oquel ten k'ojlel cyi'j aj Caldey. 15Akine inx k'mante te, wu'ne tzaj ntxco'ne, wu'ne tzaj wuc'ine, ex aju cbantel tu'n ba'n c'elel. 16Che lak'etze wuc'ile ex cybintze jlu: Atxix t-xe tnejel minti' in yoline tuj ewaj, ex tejtzun ttzaj tcyakil jlu, lu kine at, chi Dios. Ex atzun ja'lo ate Kman ma tzaj samante weye ex ma tzaj t-sama'n T-xew junx wuc'ile. 17Atzun jlu in tma'n Kman aju colpilte cyeye, aju Dios xjan cye aj Israel: Akine Dios aju Cymane, akine chin xel xnak'tzante ju ba'n tu'n tajben te cyeye, akine chin xel ẍaklunte cyeye tuj be cxel cyi'ne. 18Nokwit xi cynimane aju xi nma'ne cyeye, mawtlo che tene tuj txubtxaj nimxix ic tza'n jun nima nojni tu'n a', ex aju in cybincha'ne, ba'nwtlo ma tz'el cyeye ic tza'n ju a' in jaw xtulk'in tibaj mar, 19ke tiyjila mawtlo chmet nimxix cybaj ic tza'n ttxa tz'a'n ttzi mar mlay bant tajlanjtz; minti'wtlo ma che naje wu'ne ex minti'wtlo ma che el nlak'ba'ne nwitze. 20Cyetze tuj Babilonia, cyetz oke cywitz aj Caldey. Cyk'manxe tkanil lu, che sch'ine tu'n tzalajbil, cyk'manxe cye ke xjal ate' max ttxa'npun tx'otx', cyk'manxe cyja': Ate Kman ma colpinte cye tiyjil Jacob akeju tmajen. 21Tej cyex ti'n tuj tzkij tx'otx', minti' tzaj txketle'n cyi'j, jaw jlet jun twi a' t-xe pic tu'n, el c'abchaj pic ex etz tilj nim a' tuj. 22Atzun cye xjal binchal mya ba'n, mlay che ten tuj txubtxaj, chi Kman.

will be added

X\