ISAÍAS 47

1Tcu'tza ex kecuya tuj kuk aya tnam Babilonia; ic ttena ic tza'n jun tal k'apoj na'nx tcnet tchmil; tcu'tza tuj tk'ukbila ex kecuya twitz tx'otx' aya tnam Caldey; ic ttena ic tza'n jun tal k'apoj, porque mlaytl cyma xjal ti'ja ka ne'x ta'ya ex ka tcwentin tiba wen. 2Tzyuma tal cya' ex che'nctza triw, k'in ela xbalun aju toc te txaybil twitza, jalo'n jawa tchuya, e tcyaj sbaje' tcuxa, tic'x beta cyuj ke nima; 3e tcyaj k'ancha'l tcyakil t-ximlala ski't ti'j, tu'n ttzaj tch'ixwiya. Cbel tcastiwoya wu'ne ti'j tbinchbena mya ba'n, ex mi jun jacu mayonte weye. 4Aju colpil ke, atzunju Dios Xjan cye aj Israel, aju toc tbi Kman Tajaw Tcyakil. 5Chi Kman cyja': Kecuya ex mi'n k'ajta aya tnam Babilonia, tocxa tuj klolj porque mlay tz'oc k'ma'ntl tbiya xu'j rey cawil cyibaj nasyon. 6Tej ttzaj nk'oje ti'j ju tnam sc'o'maj wu'ne, e el wic'une ke xjal ate' tuj, akeju etzan wu'ne, ex e je'x nk'o'ne tuj tk'aba tu'n tcub cyi'j tu'na; atzun teya minti' tzaj tz'e'y tc'u'ja cyi'j, nok o'cx e baj tyajla'na ke tij xjal ate' cyxol. 7O tmaya cyja': Cucx chin cawile te jumajx akine xu'j rey, chiya. Minti' cub tena ximal ti'j jlu ex minti' cub tena ximal ti'j tza'n tten tu'n tpon baj bajsbil teya. 8Cyja'tzun bintza jlu ja'lo, aya xu'j nimxix tganiya tu'n tachina; tuj twitza segurxix ta'ya tuj tcawbila ex in baj t-ximana tuj tanmiya cyja': O'cxcu akine ex minti' juntl ic tza'n weye; mlay chin oque te meba xu'j ex mlay chin cyaj tene minti' wale, chiya. 9Pero minaben, te junx k'ij che tzajel keju cabe mya ba'n lu ti'ja: Cyjel tena meba xu'j ex cyjel tena minti' tala, bi'x cnajela, masque ba'n k'ijina ex masque ba'n nim mañ tu'na. 10Tuj twitza segurxix ta'ya tuj tbinchbena mya ba'n ex cub t-ximana cyja': Minti' jun in que'yin wi'je, chiya. Aju tnabla ex tojtzkibla ma che cub sbunte teya. Cub t-ximana tuj tanmiya cyja': O'cxcu akine ex minti' juntl ic tza'n weye, chiya. 11Pero tzul jun mya ba'n tibaja ex mlay mayet tu'na tu'nju mañ ba'n tu'na; ctzajel jun xitbil ti'ja ex mlay bant tmayonjtz tu'na; ctzajel jun c'ixbisabl ti'ja aju minti'tok in ayona ti'j, nok minaben tzul ti'ja. 12Cucx cy'a'na ex cucx k'ijina, ic tza'n o bant tu'na tej k'apojxtok ta'ya; mya yajcu jacu tz'ajben teya, mya yajcu tu'n jlu jacu che xob xjal twitza. 13Ma che tzaj ti'na nim xjal k'ol consej teya ex ma sicta tu'n jlu. 14Pero bintza, ke xjal lu ic cyten ic tza'n tzkij ch'im in baj tz'e'y tu'n k'ak', mlay bant cyclonte cyib tuj k'ak'. Porque mya ic tten k'ak' lu ic tza'n ttx'an xk'a'l tu'n kcub ke' ti'j ex tu'n kmek't tu'n. 15Cyja'tzun cbajel cyi'j ke k'ol consej teya, akeju ma sicta cyu'n atxix ttzajlena tuj tk'apojila. Teylex te junjun c'elel tzpet ti'j tbe ex mi a'l jun jacu cleta tu'n.

will be added

X\