ISAÍAS 44

1Chin cybintze ja'lo akeye aj Israel tiyjil Jacob, akeye nmajene sc'o'maj wu'ne. 2Akine Cymane aju binchal cyeye, aju binchante cyeye tej na'nxtok cyul itz'je ex onin keye wu'ne. Akeye aj Israel tiyjil Jacob, mi'n che xobe, akeye nmajene sc'o'maj wu'ne, 3porque cxel nk'o'ne a' tuj lugar minti' cynajbil xjal tuj ex che jawil jlet ke nima wu'ne tuj tzkij tx'otx'. Ctzajel nk'o'ne Nxewe tu'n tten cyuc'il ke cyiyjile ex ctzajel nk'o'ne ncy'iwbile cyibaj cyc'wa'le. 4Che ch'iyel ic tza'n cha'x c'ul a'lin wen ex ic che oquel ic tza'n ke tze' chjaj ate' ttzi nima. 5Oc tma jun cyja': Te Kman we kin, ex juntl c'oquel tk'o'n tbi tiyjil Jacob, ex juntl cbel ttz'iban tibaj tk'ab: Tetzbil Kman we kin, ex c'oquel tk'o'ntl Israel te juntl tbi. 6Ate Kman, cyrey aj Israel ex colpil cye ex Tajaw Tcyakil, chi cyja': Akine t-xe tnejel ex ax kine te bajsbil; o'cx akine Dios, minti' juntl. 7¿Atpe jun jacu pon ic tza'n kine? Ba'n tu'n tyolin ex tu'n ttzaj ttx'olba'n weye. ¿Atpe jun jacu tzaj tk'o'n jun tkanil ti'j ju cyja' ttzaj te tibajxi, ex tu'n tmante alcyeju ch'ix tjapun? 8Mi'n che sec'paje ex mi'n che xobe. Bay weye o nmaye jlu ex xi nma'ne atxix ojtxi, akeye testiw ti'j jlu. ¿Atpe juntl Dios? Minti', o'cx kine. Minti' juntl colol cyi'je, minti' jun ojtzki'n wu'ne. 9Cycyakil keju ba'n che binchan tilbilal nokx gan ke, ex keju tilbilal akeju c'ujla'nxix cyu'n, minti' cyajben. Akeju in che c'ulun cywitz, moẍ ke ex minti' nne'l cynic' ti'j, cyja'tzun cbel cych'ixwi. 10Aju xjal in cub binchante jun tilbilal tu'n toc te tdios ex tu'n tc'ulun twitz, nokx gan in naj tk'ij ti'j. 11Cycyakil keju in che c'ulun cywitz ke tilbilal cbel cych'ixwi. Akeju binchal ke tilbilal, xjal ke. Nokwit junx che ul yec'ul cyib tu'n cyoc tuj xjel, jaculo cub cych'ixwi ex jacu tzaj nim cyxobil. 12Ba'n ku'n ti in tbincha'n jun tx'inol c'uxbil: In tzaj ti'n ju tz'kab, ex tbajlenxi cyakix ju c'uxbil tu'n k'ak', in baj ttx'ino'n ju c'uxbil tu'n martiy tu'ntzun tbant aju taj tu'n tcub tbincha'n. In ak'nan ti'j tuc'il tipun tk'ab, pero ka minti' ma wa'n, in baj tipun, ex ka minti' ma c'an, in sict. 13Ba'n ku'n alcye in tbincha'n jun calpinter: In baj techan ju tze' tu'n metro, in baj tk'o'n techal tu'n lapis tuc'ix compás ex nno'c ten ak'nal ti'j tu'n tz'kab. Cyja'tzun tten in bant jun tilbilal tu'n, ex in cyaj tk'o'n tilbilal mer ic tza'n tilbilal xjal ex mejor nno'c tu'n. Octzun tbant, nno'cx tk'o'n tuj tja. 14In jaw ttx'emin xjal jun tze' wi'ten, ex ka tzis, ex ka jun wi' c'ol, akeju in che ch'iy cyxol mastl tze' tuj chc'ul. Ex ka in cu'x tawa'n jun wi' tzaj aju in ch'iy tu'n jbal. 15Ti'j tze' lu nne'l cysi' xjal, in xi cyi'n junjun piẍ tu'n tocx tuj k'ak' tu'n cymek't tu'n, ex junjuntl piẍ in che ajben tu'n ttzk'aj pan, atzun junjuntl in ajben cyu'n tu'n tbant jun tilbilal tu'n toc te cydios, ex in che cub ẍmeje' twitz tu'n cyc'ulun te. 16Junjun piẍ tze' nno'cx cyk'o'n tuj k'ak' tu'n tocx txo't chibj tibaj; octzun tbaj chibj txo'maj cyu'n, bi'x in che noj tu'n. Ax icx in che mek't tu'n k'ak' ex in cyma'n cyja': Ba'n ju k'ak', ch'ix kmek't tu'n. 17Ex ti'j ttx'akan tze' in baj cybincha'n jun tilbilal tu'n toc te cydios, in che cub ẍmeje' tu'n cyc'ulun twitz, ex in che cubsan twitz, che chi cyja': Ko tcloma porque aya kdiose. 18Ke xjal lu minti' ch'in ba'n cyu'n ex minti' nne'l cynic' ti'j, moẍ ta' cywitz, minti' in che que'yin ex lamo'n tuj cynabl, minti' nne'l cynic' ti'j. 19Minti' in che cub ten ximal ti'j, atx taj tu'n toc cynabl tu'n tel cynic' ti'j ex tu'n t-xi cyma'n: Mij tze' ma tz'ocx kk'o'n tuj k'ak' ex tu'n t-xk'a'lil ma tzk'aj kwa pan, ma baj ktxo'n kchi' ex ma baj ku'n. ¿Ba'npetzun tu'n tbant ku'n jun tilbilal ic'bil ti'jx ttx'akan tze' lu? ¿Ba'npetzun tu'n kc'ulun twitz jun piẍ tze'? Che chiwt. 20A jlu axix toc nokx gan, junx ta' ic tza'n tu'n t-xi klo'n tza'j. Axju cynabl xjal in sbunte cye ex tu'ntzun jlu mlayx che clet. Mlayx tz'el cynic' ti'j nok tten ju tilbilal tzyu'n cyu'n ex mya dios. 21Akeye aj Israel tiyjil Jacob, cyna'ntze ka akeye nmajene; akeye nmajene ex akine in binchan cyeye. Akeye aj Israel, mi'n tzic' nna'njtze cyu'ne. 22Ma cub naj cypaltile ex cyile wu'ne, ic tza'n in cub naj muj. Cyajtz meltz'aje wuc'ile porque wu'ne ma che colpete. 23Aya cya'j, tjaw sch'ina tu'n tzalajbil ti'j ju ma tbincha Kman, ex akeye lugar t-xe'pun tx'otx', che sch'ine tu'n tzalajbil. Akeye witz ex tal witz ex cycyakil ke tze' ate' cywi'ye, che sch'ine tu'n nim tzalajbil porque ma tzaj tyec'un Kman tajwalil tu'nju ma che colpet ke aj Israel tu'n, akeju tiyjil Jacob. 24Atzun jlu in tma'n Kman aju colpil cyeye, aju pok'sante cyeye tej na'nxtok cyul itz'je: Akine Dios aju cymane, aju binchal tcyakil, wu'ne xi nlic'pu'ne cya'j ex cub nk'ukba'ne tx'otx' ex mi jun o oninte weye. 25Mlayx wak'e ambil tu'n tjapun cyyol ke pacbal nic'al yol; cbajel tzact cynabl ke xjal aj k'ij wu'ne. Che oquel meltz'aj ke aj nabl ti'jx cyyol ex aju cyojtzkibl c'oquel te nokx gan. 26Pero wu'ne in japun cyyol ke nmajene, ex wu'ne nne'l ba'n aju cyximbetz keju sama'n wu'ne. Cxel nma'ne tu'n cynajan juntl maj ke xjal tuj Jerusalén, ex ke tnam tuj tx'otx' Judá che jawil binchet, ex ke tnam otok che cub xitj che jawil binchet juntl maj. 27Jacu txi nma'ne te nintz mar tu'n taj tzkij, ex cye ke nima tu'n taj tzkij a' cyuj. 28Cxel nma'ne te rey Ciro cyja': Ma tz'oc nk'o'ne te cwentil ke xjal etzan wu'ne. Oc tbincha'ya tcyakilju wajbile ex cxel tma'na te tnam Jerusalén cyja': Cjawil bincha'na juntl maj, ex cxel tma'na te njaye: Che bel ke' t-simyentila, chiloya.

will be added

X\