ISAÍAS 43

1Atzun ja'lo, akeye aj Israel tiyjil Jacob, ate Kman aju binchante cyeye chi cyja': Mi'n che xobe porque ma che colpete wu'ne; ti'j cybiye e tzaj ntxco'ne porque etzan keye wu'ne. 2Ka il ti'j tu'n cyic'xe tuj a', akine chin tele cyuc'ile, ka il ti'j tu'n cyic'xe cyuj nima, mlay che'x mulk'aje tjak' a', ex ka il ti'j tu'n cyocx k'o'ne tuj k'ak', mlay che tz'e'ye ex mlay jaw julin k'ak' cyi'je. 3Porque akine Dios aju Cymane, aju clol cyeye, ex akine Dios Xjan cye aj Israel. Ma che'x nk'o'ne ke aj Ejipt, ke aj Etiopía ex ke aj Sabá, tu'n tcub cyi'j te cyxele tu'ntzun cycolpete. 4Porque nimxix nc'u'je cyi'je, ma' cyoclene tuj nwitze ex c'ujla'n keye wu'ne. Nok tu'n cytene wuc'ile ex tu'n cycyaj ank'ine, ma che'x nk'o'ne ke xjal ex ke nasyon tu'n tcub cyi'j te cyxele. 5Mi'n che xobe porque lu kine atine cyuc'ile. Max tuj tx'otx' tuj tjawitz k'ij ex max jatum nne'x baj, che ajetz nchmo'ne ke cyxjalile tu'n cytene juntl maj junx. 6Cxel nma'ne teju lugar at tuj tbank'ab k'ij cyja': Che tk'o'n ajtze, ex cxel nma'ne teju lugar at tuj tnayaj k'ij cyja': Mi'n che cyaj ttzyu'ne. Cyi'n ajtze ke ncy'ajale ex ke nme'jele max ttxa'npun tx'otx' najchak. 7Cycyakil keju toc nbiye cyi'j, akeju wu'ne, e bant tu'n tjaw cynimsa'n nbiye. 8Cyi'ntze ke xjal etzan wu'ne, akeju at tbak' cywitz pero moẍ ke, ex at cyxcyin pero chcyin cywi'. 9Ba'n tu'n toc cychmon cyib cycyakil tnam ex cycyakil nasyon tu'n cyoc tuj xjel. ¿Alcye jun cyxol ke tnam lu otok tma jlu ojtxi, ex ka otok tzaj tk'o'n naj tkanil ti'j ju o baj te ojtxi? Ba'n tu'n ttzaj cyi'n testiw ti'j tu'n cymante ka ic tten jlu ex tu'n kbinte ex tu'n tel knic' ti'j ka ax toc cyyol. 10Chi Kman cyja': Akeye testiw wi'je, ex akeye nmajene e jaw nsc'o'ne tu'n wojtzkinjtze cyu'ne, tu'n toc ke' cyc'u'je wi'je ex tu'n tel cynic'e alcye kine. Mi a'l juntl dios o ten nej nwitze ex mi a'l juntl ctel te tibajxi. 11O'cx kine Dios aju Cymane, mi a'l juntl jacu che clete tu'n. 12A kine in k'onte tkanil ex akine in pacbante: Ma che clete wu'ne ex mya tu'n juntl dios, ax keye testiw wi'je. 13Akine Dios atxix ojtxi ex cucx ntene ja'lo. Mi a'l jun jacu tzokpaj tuj nk'abe. Mi a'l jun jacu cub k'uchinte ju in bant wu'ne. 14Ate Kman aju Dios Xjan cye aj Israel, ex aju tzokpil cyeye chi cyja': Nok tu'nju at nc'ujlalile cyi'je, cxel nsama'ne txkan soldad tu'n cypon tuj Babilonia ex cycyakil ke aj Caldey che elel ok cyuj cybarc, akeju nim in che tzalaj cyi'j. 15Akine Dios aju Cymane, aju binchante cye aj Israel, aju Dios Xjan ex cyreye, chi Dios. 16Jaket jun be ojtxi tu'n Kman tuj mar, jun be nno'cx tuj tmij a' in yucch wen, 17ex e je'tz ti'n txkan soldad nim cyipun, tuc'ix cycarwaj ex cychej, tu'ntzun cynaj tu'n. Cucx e cyaj pale' ex minti'tl o che jaw we', bi'x e cub baj ic tza'n jun mech in cub yupj. 18Atzun ja'lo, chi Kman cye ke xjal etzan tu'n cyja': Mi'n tzaj cyna'ntle aju o baj cyi'je ex mi'n che ximantle ti'j ju o baj ojtxi. 19Porque oc nbincha'ye jun ti'xti ac'aj ex oc cyila'ye bi'x ja'lo cbantel. Cjaketel jun be wu'ne tuj ju lugar minti' cynajbil xjal tuj, ex che jawil jlet ke nima tuj tzkij tx'otx'. 20Chin jawil nimsa'ne cyu'n ke jil te tjak' c'ul, ic tza'n ke wech ex ke chyu'j avestrús, porque cjawil jlet nim a' wu'ne tuj lugar minti' cynajbil xjal tuj, ex che jawil jlet ke nima tuj tzkij tx'otx', tu'ntzun t-xi nk'o'ne te cyc'a ke xjal etzan wu'ne ex sc'o'maj ke wu'ne. 21O nbinchaye ke xjal lu tu'n tjaw cynimsa'n nbiye tu'n cybitz. 22Atzun cyeye aj Israel tiyjil Jacob, minti' e cubsane nwitze, nok o'cx ma baj cyganiye wi'je. 23Minti' ẍe cub cybyo'ne ke ẍne'l tu'n tcub cypatune tibaj altar te jun oyaj te weye, ex minti' ẍin jaw cynimsa'ne cyu'n keju chojbil. Mya tu'nju in chin kanine oyaj cyeye ma che sicte, ex minti' ẍin k'ajte cyi'je tu'n tcub cypatune storac. 24Minti' ma che lak'one ti'j jun wik ajlaj at tc'oc'jal tu'n ttzaj cyi'ne weye te cyoyaje, ex minti' tzaj cyk'o'ne t-sebyil alumaj weye te jun chojbil tu'n ntzalaje ti'j. Nokpe ma chin yajlanjtze tu'n tlaj ju il in bant cyu'ne ex ma chin sicte tu'nju mya ba'n in bant cyu'ne. 25Pero nok tu'nju akine Cydiose ma cub nnajsa'ne cyile, tu'nju ma che ic'e tibaj nleye, ex mlay tzaj nna'ntle. 26Ka at jun wile tuj cywitze, ba'n tu'n toc cyma'ne weye, tu'n kyolin ti'j ex tu'n tel nic'baj ti'j alcye at til. Cymantze ka jacu che ele twitz ex ka ax toc minti' cyile. 27Aju tnejel cyxe'chele o binchan il, ex ke xnak'tzal cyeye jaw cyi'n cyib tu'n cyk'ojin wi'je. 28Cyja'tzun cbel nk'o'ne cych'ixwi ke nejenel in che ajben tuj njaye, ex cxel nk'o'ne ambil tu'n cynaj ex tu'n cyoc xmayin ke aj Israel, akeju tiyjil Jacob.

will be added

X\