ISAÍAS 41

1Chi Dios cyja': Akeye tnam ttzi mar, che txulecuye nwitze; akeye nasyon tz'ocx cyipune, cytzaje tu'n kyolin ti'j ju yol lu; e toc kchmon kib tu'n toc yol ti'j ku'n. 2¿Al u'n jaw jlet ju rey tuj tjawitz k'ij, aju cucx in cub cyi'j mastl tnam tu'n? ¿Alcye in xi k'onte cye nasyon tuj tk'ab tu'n tcub cyi'j tu'n ex tu'n cycyaj ten ke mastl rey tjak' tcawbil? In che baj tpaẍu'n tu'nju t-spad ex in che baj t-sputun ic tza'n ttxa triw tu'n t-xobl plech. 3Nno'c lpe' cyi'j ke nasyon tu'n tcub cyi'j tu'n, ex minti' jun ti'xti in tc'ulba'n cyuj ke be jatum bajx tz'ocx aj cyuj. 4¿Al u'n o bant jlu? Al u'n baj nac'u'n ti'j alcye tu'n tbant cyu'n ke tnam tuj junjun tk'ijlalil atxix t-xe tnejel? Akine Dios aju Cymane, aju baj nac'unte ti'j tcyakil jlu. Akine t-xe tnejel ex ax kine te bajsbil. 5Ke tnam cycubsa'n ttzi mar o cyil ex o tzaj tchi cyi'j; tcyakil ttxa'npun tx'otx' tzaj lu'lun. Ch'ix cyul canun ex lu che ul. 6Teyle junjun xjal at tnabl ti'j ak'untl in baj tonin ju tuc'il ex in baj tcyuwsa'n tnabl. 7Aju xjal binchal ke tilbilal in tcyuwsa'n tnabl ju xjal tx'inol k'an pwak tu'n toc cyi'j ke tilbilal; aju xjal tz'umsal sak pwak tu'n martiy in tma'n teju xjal tx'inol c'uxbil: Ba'n tten tmojbaben c'uxbil tu'na, chi, ax in baj tcyuwsa'n ju tilbilal tu'n clav tu'ntzun mi'n tic' ch'uypaj. 8Cybintze, akeye aj Israel tiyjil Jacob, akeye nmajene sc'o'maj wu'ne, akeye tiyjil Abraham aju wamiwoye. 9A kine in tzaj k'inte cyeye max ttxa'npun tx'otx', e tzaj ntxco'ne max cyuj ke lugar najchak ex xi nma'ne cyeye cyja': Akeye nmajene. Akine in jaw sc'on cyeye ex bajx che el wic'une. 10Mi'n che xobe porque lu kine atine cyuc'ile, mi'n baj cyc'u'je, akine Cydiose. Cxel nk'o'ne cyipumale ex chin onile cyi'je, tzyu'n keye wu'ne tu'n nbank'abe tu'nju tz'aklxix kine. 11Cycyakil keju in tzaj cyk'oj cyi'je, cbel cych'ixwi ex cnajel cynabl, ex keju in che k'ojin cyi'je, bi'x che najel te jumajx. 12Che oquel tene jyol cye aj k'oj cyi'je ex mlay che cnet cyu'ne, keju in che k'on k'oj cyi'je che oquel mer ic tza'n minti' otok che ten. 13Porque akine Dios aju Cymane, tzyu'n keye wu'ne ex o nmaye cyeye cyja': Mi'n che xobe, chin onile cyi'je. 14In tma'n Kman cyja': Akeye aj Israel tiyjil Jacob, masque tal ch'in keye ex minti' cyipune, mi'n che xobe porque chin onile cyi'je. A kine Dios Xjan cye aj Israel, akine colpil cyeye. 15Che oquel nk'o'ne ic tza'n jun macbil aju nne'l bajunte tbak' triw ac'aj ex nimxix twitz te'; cbajel cybaju'ne ke witz ex che oquel te kuk cyu'ne ex ke tal witz ic che oquel ic tza'n ttxa triw cyu'ne. 16Che jawix cyxo'ne twitz cya'j ic tza'n triw, che xel k'i'n tu'n cyk'ik' ex che bajel sputun tu'n cyk'ik' jbal. Atzun cyeye che tzalajele wi'je, akine Dios aju Cymane, ex chin jawil cynimsa'ne, akine Cydiose Xjan, akeye aj Israel. 17Ke xjal meba ex minti' ch'in at cye in che jyon ti'j a' te cyc'a, pero minti' in cnet cyu'n; puro tzkij ti'j cyak' tu'n txketle'n, pero akine Dios aju Cyman cxel nk'o'ne aju in che jyon ti'j. Mlay che cyaj ncoline, akine Cydios aj Israel. 18Che jawil jlet ke nima wu'ne cyxol ke witz tz'la'j cyi'j, ex che jawil jlet ke twi a' tuj cymij chk'ajlaj; aju tzkij tx'otx' c'oquel te soban wu'ne, ax icx che jawil jlet ke twi a' wu'ne tuj tzkij tx'otx'. 19Tuj tzkij tx'otx' che belex wawa'ne ke wi'ten, ke ch'i'x tze', ke k'atxab ex ke tze' olivo; tuj tx'otx' jatum minti' cynajbil xjal che jawil ch'iy ke tzaj wu'ne, tuc'ix c'ol ex ke tzis, 20tu'ntzun cyque'yinte cycyakil xjal ex tu'n cybinte ex tu'n ttzaj cyk'o'n cywi' ti'j ex tu'n tel cynic' ti'j, wu'ne o bant tcyakil jlu, akine Cydios aj Israel, xjan kine. 21In tma'n Kman cyja', aju cyrey tiyjil Jacob: Cytzaje akeye tilbilal, ex cyyec'untze ka ba'n che colin cyibe, cytzaje tu'n cyclonte cyibe. 22Cytzaje tu'n ttzaj cyma'ne aju tzul te tibajxi ex tu'n ttzaj cytx'olba'ne aju o baj ojtxi, ex cbel kk'o'n kwi'ye ti'j; cyk'ontze tkanil keye ti'j ju ti'xti tzul te tibajxi, tu'ntzun tel knic'e ti'j jatum cpol baj. 23Cymantze keye ti cbajel te tibajxi, cyyec'untze keye ka axix toc dios keye. Cybinchame alcye jacu bant cyu'ne, ka ba'n ex ka mya ba'n, nok tu'n ttzaj tchiylal ki'je ex tu'n kxobe. 24Pero akeye minti' ch'in ba'n cyu'ne, ex aju cyak'unbene te jumajx minti' tajben. Ic'bilxix cywitz keju in che c'ulun cywitze. 25Ma jaw nsc'o'ne jun xjal tuj tx'otx' tuj tbank'ab k'ij, lu tzul; ex max tuj tjawitz k'ij ctzajel na'n nbiye tu'n. In che baj twaban ke cawil ic tza'n in baj wabat bar tx'otx', ex ic tza'n in baj xyok'in xok'l tu'n tkan ju binchal xar. 26¿Alcye o k'onte tkanil tej t-xe't jlu tu'ntzun kbinteye? ¿Alcye otok tzaj k'mante jlu ojtxi tu'ntzun kk'manteye ka ax toc tyol? Mi jun cyeye o k'mante tkanil lu ex mi jun o binte jun cyyole. 27Akine in k'onte tkanil te tnam Sión atxix ojtxi ex xi nsama'ne jun nsanjele tu'n tpon tuj tnam Jerusalén k'olte tkanil ba'n. 28Tej t-xi nque'yine, mi jun cyxol ke tilbilal pon tlak'ban tib; ex mi a'l jun ba'n tu'n tk'onte jun consej, ex misicyer jun jacu tzaj tzak'wente jun nxjele. 29Cycyakil minti' ch'in cyajben ex minti' jun ti'xti jacu bant cyu'n; tilbilal ke ex minti' ch'in jacu tz'el bant cyi'j.

will be added

X\