ISAÍAS 40

1Chi Cydiose cyja': Cyk'ukbame cyc'u'j ke xjal etzan ke wu'ne, cyk'ukbame cyc'u'j, 2che yoline tuj c'ujlalil cye ke xjal aj Jerusalén, cymanxe cye: Ma pon baj ju c'ixbisabl cye tuj ak'untl, ma baj chjet cyil ex cabal ma cyc'am cycastiw wu'ne tu'n tlaj tcyakil cyil. 3In jaw tk'ajk'ajel twi' jun xjal chi cyja': Cybinchame jun tbe Kman tuj lugar tzkij tx'otx', cyjakome jun be jikun ti'j te Kdios tuj lugar minti' cynajbil xjal tuj. 4Cynojsa'n baje ke tkan xak, cychk'ajlajin baje ke nmak witz ex ke tal witz, aju tx'otx' nim tkan xak tuj ex nim witz tuj, cyparejin baje tu'n tcyaj ten chk'ajlaj. 5Ctzajeltzun tyec'un Kman tajwalil ex oc cyila' cycyakil xjal. Axte Kman ma k'mante jlu. 6At jun tk'ajk'ajel wibaj in tma'n: Sch'inxa; atzun weye xi nkanine te: ¿Alcye yol cxel nsch'i'ne? Atzun jlu cxel t-sch'i'na: Cycyakil xjal ic cyten ic tza'n c'ul, ex junx ta' cyoclen ic tza'n t-xmacal c'ul tuj cojbil nok ch'in in ten. 7Ate c'ul in tzkij ex in tzaj tz'ak t-xmacal oc in tzaj t-xupin Kman ti'j. Ax toc cycyakil xjal ic cyten ic tza'n c'ul. 8Ate c'ul in tzkij ex in tzaj tz'ak t-xmacal, atzunte tyol Kman Dios cucx ctel te jumajx, chicuya, chi tzaj k'ma'n weye. 9Akeye aj Sión, cyjaxe max twi' jun witz ma' twa'l, cysch'inxe cyuw wen tu'n t-xi cyma'ne jun tkanil ba'n. Mi'n che xobe tu'n tjaw tk'ajk'ajel cywi'ye cyuw, akeye aj Jerusalén cymanxe tkanil cye ke tnam tuj Judá: Lu Cydiose tzul, che chicuye. 10Ate Kman ch'ix tul tuc'il tipumal, tu'nx tipumal in cyaj ten tcyakil tjak' tcawbil. Ke xjal etzan tu'n che ul ti'n junx tuc'il ocxi cycolpet tu'n. 11Tzul ic tza'n jun pastor cwentin ke t-ẍne'l tu'n, in che jaw tchle'n ke tal t-ẍne'l tuj tk'ab, k'i'n ke tu'n ttzi t-xu'c ex cwentinxix ke ttxu ẍne'l tu'n, akeju matok tcublen cyal. 12¿Alcye jun jacu bant tmalonte ju mar tu'n tlakil tk'ab? ¿Alcye jun jacu bant t-xc'uchbante twitz cya'j tu'n tk'ab? ¿Alcye jun jacu bant tmalonte tuj jun malbil tcyakil tkukil tx'otx', ex ka tu'n tmalonte tuj balans ke nimak witz ex ke tal witz? 13¿Alcye ma txi yec'unte te Kman alcye tu'n tbant tu'n, alcye ma txi k'onte tnabl ex alcye ma txi xnak'tzante te? 14¿Alcye o txi k'onte tconsej tu'n tel tnic' ti'j tcyakil? ¿Alcye o xnak'tzante te tu'n tcawin tuj tumelxix? ¿Alcye o xnak'tzante te tu'n tten tojtzkibl? ¿Alcye o txi xnak'tzante te tu'n tten tnabl? 15Ic cyten ke nasyon tuj twitz Kman ic tza'n jun txut a', nne'l txutpaj ti'j tcubil, ex ic cyten ic tza'n ch'in tpujil tx'otx' in cyaj ten tuj balans; ke nasyon ate' ttzi'yile mar ic cyten ic tza'n jun twitz ttxa tz'a'n minti' talil. 16Tuj tcyakil tiwitz tx'otx' Líbano mlay che canun ke alumaj tu'n t-xi k'ot jun chojbil te Dios, ex masque at nim tze' tuj, pero mlay canun tu'n tc'ant k'ak' tu'n tcub patit ju chojbil. 17Minti' ch'in nne'l bant cyi'j cycyakil nasyon tuj twitz Kman ex misicyer ch'in cyoclen tuj twitz. 18¿Alcye jun jacu che yoline ti'j ka ic tten ic tza'n Dios? ¿Alcye jun tilbilal jacu bant cyu'ne ex tu'n cymanteye ka ic que'yin ic tza'n tilbilal Dios? 19Jun xjal at tnabl tu'n tak'nan tu'n cybant ke tilbilal tu'n, nno'cx tk'o'n ke c'uxbil tuj k'ak' tu'n cycub ulj tu'ntzun tbant jun tilbilal ti'j, ex jun xjal tx'inol k'an pwak in baj tlo'tzin ti'j tilbilal tu'n k'an pwak, ex in che bant ke caden sak pwak tu'n, tu'n toc tk'o'n ti'j tilbilal. 20Aju xjal meba minti' tumel tu'n t-xi tk'o'n jun oyaj wi'yilxix in tzaj tjyo'n jun tze' aju minti' in poc'ix, ex in tzaj tjyo'n jun calpinter at tnabl ti'j tu'n tjaw twaban tilbilal ex tu'n mi'n tic' tz'ak. 21¿Baka minti' bi'n cyu'ne alcye Dios? ¿Ex na'nxpetzun cybinteye ti'j? ¿Minti'petzun nne'l cynic'e ti'j ju yol lu, aju o k'manjtz atxix tej tbant twitz tx'otx'? 22Ate Dios at tk'ukbil twitz cya'j tibajle tx'otx', ex in che tque'yin Dios ke xjal mer ic tza'n ẍplon. In xi tlic'un ju cya'j mer ic tza'n jun xbalun xaxj wen ex in xi tlic'un mer ic tza'n jun ja lona te tnajbil. 23Ke xjal ma' cyoclen in che oc tk'o'n te minti' cyajben, ax icx ke nejenel ate' twitz tx'otx' bi'x nne'l ti'n cyoclen. 24Ic cyten xjal ic tza'n awal a'laj tkan, tu'nju c'itzke tcuxlen awet ex ma in xi' tloc' tuj tx'otx'. Ka ma txi t-xupin Dios cyi'j, in che tzkij ex in che'x ikan tu'n nintz cyk'ik' mer ic tza'n ttxa triw. 25Chi Dios cyja', aju Dios Xjan: ¿Alcye jun jacu che yoline ti'j ka ic tten ic tza'n kine? ¿Alcye jun jacu pon ic tza'n kine? 26Cyi'n jaw cywitze twitz cya'j ex cyque'yinxe: ¿Alcye o binchante tcyakil jlu? Aju oc k'onte teyle junjun che'w tuj tlugar ex in che tzaj ttxco'n teyle junjun ic tza'n tbi toc. Mi a'l jun nnic' tibaj ju txocbil te, porque at nim tipumal Dios ex in cawin tibaj tcyakil. 27Akeye aj Israel tiyjil Jacob, ¿tiku'n cucx cyyoline mya ba'n wi'je? ¿Tiku'n in cyma'ne cyja': Minti' nno'c tk'o'n Kman cwent ki'je tza'n ktene, ex minti' taj Dios ki'je, che chiye. 28¿Minti'petzun bi'n cyu'ne? ¿Na'nxpetzun cybinteye? Ate Kman atzunte Dios, minti' bajsbil te, ate o binchante tcyakil twitz tx'otx', minti' in cub numj ex minti' in sict ex mlay tz'el knic' ti'j tnabl Dios ma'xix. 29In tzaj tk'o'n tipun aju xjal sicni, ex aju minti' tipun in tzaj tk'o'n mastl tipun. 30Ke cu'xun jacu che sict ex jacu che cub numj, ax icx keju maxix k'i'n cyipun, jacu che cub tz'ak, 31atzun keju k'ukl cyc'u'j ti'j Kman, cucx ctzajel k'o'n cyipun, jacu che lipan mer ic tza'n t'iw, jacu che ojkelan ex mlay che sict, jacu che bet ex mlay che cub numj.

will be added

X\