ISAÍAS 4

1Tuj tk'ijlalil tzul, tu'nju nic'xi xinak che cyjel ten, c'oquel cyk'on cyib wuk xu'j te t-xu'jil jun xinak ex cxel cyma'n cyja': Bay keye, ku'nxe jacu tz'oc kcwentin kibe ex ku'nxe jacu tz'oc kxbalumin kibe, nok o'cx tu'n toca te kchmile, tu'ntzun mi'n kele tuj kch'ixwiye. 2Tuj tk'ijlalil tzul, aju t-xul ju tronc ctzajel tu'n Kman tbanilxix que'yin ex nimxix tajwalil, ex aju twitz awal ctzajel tk'o'n tx'otx' c'oquel te jun cyoclen ma'xix ex te nimbil cye aj Israel, akeju otok che cyaj ank'in. 3Akeju che cyjel ank'in tuj tnam Sión ex ate'x tuj Jerusalén ex at cyoclen tu'n cynajan ma chixin, c'oquel cybi ke xjal xjansa'maj tu'n Kman. 4Oc tcub cysentens aj Jerusalén tu'n Kman, cnajsetel cyil tu'nju nim xjal cub cybyo'n; ex oc tcub cycastiw ke xu'j najl tuj tnam Sión, che tx'jetel, tu'n tel cytz'ilil. 5Tibaj tcyakil witz Sión ex cyibaj ke xjal cychmon cyib ma chixin, ctzajel tk'o'n Kman jun k'ek muj k'ijl, ex atzun konic'an ctzajel tk'o'n jun spic'un ex tkan k'ak'. Ex cbel ten tajwalil Kman tibaj tcyakil tnam, 6tu'ntzun cycwentinjtz xjal ex tu'n tajben te colbil cyib; ex c'ajbel te cyxmuj oc ttzaj ta'w cyak k'ijl ex te colbil cyib oc ttzaj jbal ex cyk'ik' jbal.

will be added

X\