ISAÍAS 39

1Tuj tk'ijlalil lu tzaj t-sama'n Merodac-baladán jun u'j ex jun oyaj te Ezequías, tu'nju o tbi tej tyabt Ezequías ex otok banix. Toctok Merodac-baladán te rey tuj Babilonia, aju tcy'ajal Baladán. 2Atzunte Ezequías jaw tzalaj tej cypon ke sanjel ex xi tyec'un ke tk'inumabl cye, sak pwak ex k'an pwak, cyuc'ix ke perjum ex ju aseyt tbanilxix tuc'ix jatum c'u'n ke macbil in che ajben tuj k'oj ex cycyakil ke ja jatum c'u'n tk'inumabl. Minti' jun ti'xti at tuj tja rey ex tuj enter tcawbil minti'wt xi tyec'un cye. 3Xi'tzun Isaías aju t-sanjel Dios tuc'il rey Ezequías ex xi tkanin te cyja': —¿Jatum ẍe tzaj ke xinak lu, ex ti saj cyma'n teya? —Ma che tzaj tuj jun tx'otx' najchak wen, max ma che tzaj tuj Babilonia, chi Ezequías, xi ttzak'we'n. 4Xi tkanintl Isaías te: —¿Ti ma cyil ke xjal lu tuj tjaya? Xi ttzak'we'n Ezequías cyja': —Ma cyil tcyakil aju at tuj njaye. Minti' jun ti'xti jatum c'u'n ke nk'inumable minti'wt ma txi nyec'une cye. 5Xitzun tma'n Isaías te Ezequías cyja': —Bintza aju ma tma Kman aju Tajaw Tcyakil: 6Tzul k'ij tu'n cyxi k'i'n cycyakil ke ti'xti ate' tuj tjaya ex tcyakilju o baj cychmo'n ktzan t-xe'chela ojtxi ex aju cucx tchmet ja'lo, ex cxel k'i'n tcyakil jlu tuj Babilonia. Misicyer jun cyjel ten tzalu. 7Ex cyuc'ix junjun tiyjila che ul itz'j te tibajxi che xel k'i'n tuj Babilonia ex che oquel te aj sanjelal tuj tja rey. 8Xitzun ttzak'we'n Ezequías te Isaías: —Aju tkanil ma tzul ti'na, aju ma tzaj tma'n Kman teya, ba'n te jlu. Ex tmatl: Acux itz'x kine ko tel tuj txubtxaj ex segurxix ko tel.

will be added

X\