1 Tuj tk'ijlalil lu tzaj jun tyabil Ezequías cyuwxix wen, ex pon Isaías aju t-sanjel Dios ex tcy'ajal Amoz que'yilte te, ex xi tma'n te cyja': —Chi Kman teya cyja': Cawin cyaja keju ate' tuj tjaya, porque cymela. Mlayx banixa. 2 Atzunte Ezequías aj tk'o'n twitz twitz ja ex oc ten na'l Dios cyja': 3 —In chin cubsane twitza Nman, na'ntza, o chin ajbene teya tuj tumelxix ex tu'n tcyakil wanmiye, ex o nbinchaye aju in tzalaja ti'j, chi Ezequías. Ex jaw ok' cyuwxix wen. 4 Tzajtzun tma'n Kman te Isaías cyja': 5 Txi'ya ex k'manxa te Ezequías cyja': Ate Kman aju Tdios ktzan t-xe'chela David in tma'n teya cyja': Ma nbiye tna'j Diosa ex ma wile ta'l twitza. Cxel nk'o'ntle olaj abk'i tank'ibla. 6 Ccletela wu'ne, ax icx tnam Jerusalén ccletel wu'ne tuj tk'ab rey te Asiria. A kine chin colol ti'j tnam lu. 7 Atzun techal jlu cxel nyec'une teya, tu'n tjapun wu'ne aju yol xi ntziyane teya: 8 Tuj t-reloj Acaz, aju in marcarinjtz tu'n t-xlecumal k'ij, c'ajel meltz'aj t-xlecumal k'ij laj grad wu'ne, akeju otok tz'oc t-xlecumal k'ij cyi'j, chicuya te Ezequías, chi Dios te Isaías. Ex aj meltz'aj t-xlecumal k'ij laj grad. 9 Tej tbanix Ezequías aju rey te Judá, cub ttz'iban jun bitz lu: 10 O nmaye cyja': Tuj tmij wabk'iyile chin cymele tu'n npone tuj cynajbil cyimni, mlay japun baj wabk'iyile aju banimaj ti'j tu'n wank'ine tzalu. 11 Cub nximane cyja': Mlayx tz'oc nque'yintle Kman twitz tx'otx' lu, mlay tz'oc nque'yintle jun xjal cyxol keju najl twitz tx'otx'. 12 Ic tten nchwinklale ic tza'n cyja pastor ẍne'l, xbalun ja, aju nnic' ch'expu'n. Ic tten nchwinklale ic tza'n jun xbalun nne'l kesin ti'j ttxuylal tuj chembilte. K'ijtl ex konic'an in chin c'ixbisanjtze tu'na. 13 Tuj enter konic'an in chin sch'ine tu'n ta'w, mer ic tza'n tu'n jun balun in baj tokin ke nbakile. K'ijtl ex konic'an in chin c'ixbisanjtze tu'na. 14 In chin k'ajte ic tza'n in che k'ajt ke xtx'a'yil, in chin ok'e ic tza'n ke palom. Ma che sict tbak' nwitze tu'nju in chin que'yine twitz cya'j. Nman, in chin yajlanjtze, chin tonintza. 15 Pero ¿ti cxel nma'ne? Ax Kman ma k'mante jlu weye ex ax ma binchante. Cheba chin betele tuj tcyakil wank'ible, tu'nju at nim bis tuj wanmiye. 16 Nman, ti'j tcyakil jlu in che ank'in xjal, ax icx wanmiye in cnet tank'ibl ti'j tcyakil jlu. Tu'na ma chin banixe ex ma tzaj tk'o'na juntl maj nchwinklale. 17 Bintza, atintoke tuj bis nej, atzun ja'lo atine tuj txubtxaj. Tu'na ma clet nchwinklale tu'n mi'n nxi'ye tuj najen, porque tcyakil wile ma cub tnajsa'na. 18 Ke xjal o che cyim ax ate' tuj mukbil, mlayx bant tu'n tjaw nimsa'na cyu'n, mlay jaw nimsa'na cyu'n ke cyimni; akeju o che'x tuj jul minti' in ke' cyc'u'j tu'n cyc'monte aju tzaj ttziyana cye. 19 O'cx ke xjal itz'x jacu bant tnimsanjtza cyu'n, ic tza'n in bant wu'ne ja'lo. In xi cyma'n mambaj cye cyc'wa'l ka in japun tu'na aju in xi ttziyana cye. 20 Chin cletele tu'n Kman. Cyja'tzun c'oquel k'ajtza'n ke chnab arpa ex ko bitzal tuj tja Kman tcyakil k'ij te kank'ibl. 21 Xi tma'n Isaías tu'n tbinchet ch'in tk'otjil twitz higo, tu'ntzun toc k'ot jatum toc tyabil rey Ezequías, ex banixtzun. 22 Otok txi tma'n Ezequías te Isaías: ¿Alcyetzun jun techal ctzajel yec'un tu'n tel nnic'e ti'j ka chin xe'le juntl maj tuj tja Kman?
