ISAÍAS 36

1Tuj tcyajlajin abk'i toclen Ezequías te rey tuj Judá, oc tzokpaj Senaquerib aju rey te Asiria cyi'j cycyakil tnam toc muro cyi'j tuj Judá, ex cub cyi'j tu'n. 2Attok rey tuj tnam Laquis, xi t-sama'n jun xjal ma' toclen cyuc'ix nimcu soldad que'yilte rey Ezequías tuj Jerusalén, ex e cub ten ttxlaj tbeyil a' in pon tuj nintz pil tjax te jawni, ttzi be nne'x tuj tcojbil ju xjal tx'jol ti'j xbalun. 3Akeju e je'tz canil ti'j ma chixin, atzun ke jlu: Eliaquim aju tcy'ajal Hilcías, ex aju mayordomtok tuj tja rey, tuc'ix Sebna aju aj tz'ibal te rey, ex tuc'ix Joa aju tcy'ajal Asaf, ex aju mas ma' toclen toc ttxlaj rey. 4Aju xjal ma' toclen cyxol aj Asiria xi tma'n cye cyja': —Cymanxe te Ezequías aju tkanil lu ma tzaj tma'n aju nintz rey, aju rey cye aj Asiria: ¿Al i'j ma tz'oc ke' tc'u'ja tu'nju ma jaw ti'n tiba tu'n tk'ojina wi'je? 5Chitzuna in tma'na: At nnable ex at wipune tu'n nk'ojine, pero nok tu'n ttzi'ya in tma'na jlu. ¿Al i'j ma tz'oc ke' tc'u'ja tu'nju ma jaw ti'n tiba tu'n tk'ojina wi'je? 6Ba'n wu'ne, a nno'c ke' tc'u'ja ti'j Ejipt. Pero ic tten Ejipt ic tza'n jun ajlaj potz'naj, oc ttzaj ktzyu'n tu'n tajben te kcy'ako'ch ex ka ma txi kk'o'n kalil tibaj, in xi tz'upj tuj kk'ab. Ictzun tten Faraón aju rey te Ejipt te cye cycyakil keju nno'c ke' cyc'u'j ti'j. 7Ex ka ma cymaye weye: Keye, atzun nno'c ke' kc'u'je ti'j Kmane aju Kdiose, ka che chiye, ¿myapetzun o che baj tk'uchin Ezequías ke lugar te c'ulbil cyuc'ix ke altar teju Dios lu, ex o tma cye xjal ate' tuj Judá ex tuj Jerusalén o'cx tu'n cyc'ulun twitz junx altar? 8Binchama ti'j jun tyola tuc'il npatrone aju rey te Asiria: Jacu txi nk'o'ne cab mil chej teya, ka jacu che cnet ke xjal tu'na tu'n cychejin cyibaj. 9Balpelo mlay tz'el ok jun nejenel cye soldad cye aj Asiria tu'na, aju mas ch'in toclen, ex ¿che cnetelpetzun ke chej tu'na cyuc'ix ke xjal ba'n che chejin tuj Ejipt? 10¿Chipetzuna ka nok tu'n wexe nnic' ma chin tzaje tzalu tu'n woc tzokpaje ti'j tnam lu tu'n tcub nxitune? Ax toc ax Cydiose ma tzaj k'mante weye tu'n woc tzokpaje ti'j tnam lu tu'n tcub nxitune. 11Xitzun cytzak'we'n Eliaquim, Sebna ex Joa teju xjal ma' toclen cyxol aj Asiria: —Binchama xtalbil, yolina kuc'ile tuj yol aramey, porque atzun yol nne'l knic'e ti'j. Mi'n tzaj yolina kuc'ile tuj yol ebrey, porque cycyakil xjal cyjax twi muro in che bin ti'j. 12Atzunte ju xjal ma' toclen xi tma'n cye cyja': —Baka tuc'il cypatrone, ex baka cyuc'ile ẍin tzaj sama'ne k'malte jlu tu'n rey cye aj Asiria. Cyelpe ke xjal ate'jx twi muro, porque ake jlu icx che telba ic tza'nx che telba cyeye, cxel cywa'n cytxa' ex cxel cyc'a'n cytz'a'l. 13Ex cub we' aju xjal ma' toclen ex jaw tk'ajk'ajel twi' cyuwxix wen tuj yol ebrey ex tma: —Cybintze aju ma tma ju nintz rey aju rey cye aj Asiria, chi in tma'n cyja': 14Mi'n txi cyk'on cyibe tu'n cycub sbu'ne tu'n Ezequías; mlay che clete tu'n. 15Ka taj Ezequías tu'n tcub ti'j cynable tu'n, tu'n toc ke' cyc'u'je ti'j Cydiose ex ka ma tma cyeye cyja': Ax toc ate Kman Dios clolte ke, ex mlay tak' ambil tu'n tcub ti'j tnam lu tu'n tipumal rey te Asiria, ka chi Ezequías, 16mi'n txi cybi'ne tyol. Ma chin tzaj lajo'ne tu'n rey te Asiria k'malte tu'n tbant ti'j jun kyol, tu'n mi'n tten k'oj kxol ex tu'n taj cyk'on cyibe tuc'il, ex cyja'tzun teyle junjun cyeye jacu nic'ben ti'jx twitz t-uva ex ti'jx twitz t-higo, ex jacu che c'ane a' cyujx ke cyxoche. 17Te tibajxitzun che xel k'i'ne tu'n tuj jun tx'otx' ic tza'nx cytanmiye, aju tx'otx' lu at triw ex at tkan uva tuj, jacu bant pan cyu'ne ex ta'l twitz uva te cyc'aye. 18Ka in tma'n Ezequías cyeye cyja': Ko cletel tu'n Kman, ka chi, mi'n txi cyk'o'ne ambil te tu'n cycub sbu'ne tu'n. Baka o che clet ke txkantl tnam cyu'n ke cydios tuj tk'ab rey te Asiria. 19¿Jatum ate' ke cydios aj Sefarvaim? Baka o clet tnam Samaria cyu'n tuj tk'ab rey te Asiria. 20¿Alcyetzun cyxol cycyakil ke dios ate' cyuj tnam lu ma che clet ke tnam cyu'n tuj tk'ab rey te Asiria? ¿Tiku'n in cub cyximane ka jacu clet tnam Jerusalén tu'n Cydiose? Chi ju xjal ma' toclen cyxol aj Asiria. 21Minti' e k'ajt ke xjal ex misicyer jun yol xi cytzak'we'n, porque otok txi k'ma'n cye tu'n rey Ezequías tu'n mi'n t-xi cytzak'we'n jun yol. 22Tzajtzun tbis Eliaquim aju mayordom tuj tja rey, tuc'ix Sebna aju aj tz'ibal te rey, ex tuc'ix Joa aju xjal mas ma' toclen ttxlaj rey, el cysbit'un cyxbalun ex e je'x tx'olbalte jlu te Ezequías ti'j ju otok tma ju xjal ma' toclen cyxol aj Asiria.

will be added

X\