ISAÍAS 35

1Ctzalajel aju lugar minti' cynajbil xjal tuj, ex aju tzkij tx'otx' ctzalajel nimxix ex che jawil pok'l nim bech twitz, 2ctzajel tpok'sa'n nim bech ic tza'n in tzaj pok'chaj nim bech lirio, ctzalajel nimxix ex cbitzal tuc'il tzalajbil. Tbanilxix c'oquel tu'n Dios, ic tza'n ju witz Líbano tbanilxix que'yin, ex ic tza'n ju witz Carmelo tuc'ix chk'ajlaj Sarón, tbanil tx'otx' ke. Cycyakil xjal c'oquel cyque'yin aju t-spic'umal tajwalil Kman Dios. 3E toc cyipun keju ma che sict ex e toc cyipun keju minti' cyipun. 4Cymanxe cyja' cye keju ba'n che xob: Cyk'onc cyipune, mi'n che xobe, lu Cydiose lu tu'n cyclete, ex ke aj k'oj cyi'je cbel tk'o'n cycastiw tu'ntzun t-xelin mya ba'n o cybincha cyi'je. 5Cjaketel cywitz ke moẍ ex cbantel cybin keju chcyin cywi', 6che jawil t'icpaj ke cox ic tza'n masat, ex che jawil sch'in ke men tu'n tzalajbil. Che jawitz jlet nim a' tuj lugar minti' cynajbil xjal tuj, aju tzkij tx'otx'. 7Aju tzkij tx'otx' nim ta'w cyak tuj, c'oquel te jun nintz najab, ex nim twi a' che jawitz jlet tuj tzkij tx'otx'. Tuj lugar jatum najl ke xo'j, ctzajel ch'iy tkan ajlaj tuc'ix tkan chum in ch'iy ttzi a'. 8Cbantel jun ninbe ma chixin ex c'oquel tbi: Aju be Xjan. Keju mya tx'jomaj tuj cyanmi ex keju miban che niman, mlay che bet tuj. 9Tuj be lu mlay che ten ke balun ex mlay che ul lak'e' ke txcup ba'n che biyun. O'cx che betel tuj be lu ke xjal otok che tzokpet. 10Che ul meltz'aj ke xjal ma che colpet tu'n Kman. Che oquex tuj tnam Sión in che bitzan tuc'il tzalajbil, ex cucx che tel tuj tzalajbil. Cucx che tzalajel ex che tel tuj txubtxaj, mlay che tentl tuj bis ex mlay che ayayantl.

will be added

X\