ISAÍAS 34

1Che lak'etze bil akeye tnam, akeye nasyon cyk'ontz cywi'ye ti'j. Ba'n tu'n ttzaj tbi'n tx'otx' cyuc'ix keju ate' twitz, ba'n tu'n ttzaj tbi'n enter tx'otx' ex cycyakil keju in che tzaj ch'iy twitz. 2Porque ma tzaj tk'oj Kman cyi'j cycyakil nasyon ex cyi'j cycyakil ke cysoldad, ex ma cub cysentens tu'n cycub xitj ex tu'n cycyim. 3Akeju che cymel cyxol, cucx che cyjel pale', cbajel noj twitz tx'otx' tu'n ttzuwil cyximlal ex cnojel twi witz tu'n cychc'el. 4Cycyakil ke che'w ate' twitz cya'j che bajel ulj, cjawil balk'i'n cya'j ic tza'n in jaw balk'it jun u'j, ex cycyakil ke che'w che tzajel tz'ak ic tza'n in tzaj tz'ak t-xak uva ex ka t-xak higo. 5Ax toc, oc tbaj naj twitz cya'j tu'n t-spad Kman, cbeletz cyibaj aj Edom tu'n tcub tcastiw ju tnam banin ti'j tu'n tnaj. 6Cbajel noj ti'j t-spad Kman tu'n chic' ex tu'n sebo, ic tza'n in che cub byet ke tal tman ẍne'l ex ke tman chip te chojbil. Aju chojbil lu cbantel tu'n Kman tuj tnam Bosra ex nim xjal che bel byo'n tuj Edom. 7Che bel byo'n ke xjal ic tza'n in che cub byo'n ke wacẍ te tjak' c'ul, ke tal tman wacẍ ex ke tor; cbajel noj tuj cytanmi tu'n chic' ex cnojel tkukil tx'otx' tu'n cysebyil cyimni. 8Ax toc atzun k'ij tu'n t-xelin tu'n Kman, atzun abk'i lu tu'n t-xelin tu'n Kman ti'j cybinchben ke aj Edom ti'j tnam Sión. 9Ke tk'ab xak ate' tuj Edom che oquel ic tza'n k'ol in c'ant, ex aju tkukil tx'otx' c'oquel ic tza'n asufre; aju tx'otx' cc'antel ic tza'n k'ol in c'ant. 10Mlay cu'x yupj k'ijl ex konic'an; cucx cjawil t-sibel. Tuj tcyakil tabk'iyil cyjel colin ex mi a'l jun xjal cbetel ma chixin. 11Atzun che tel ke ẍin ex ke tol; cbajel cybincha'n ke joj ex ke xitx' cyk'u' tuj. C'oquel tx'otx' lu tu'n Kman te jun lugar minti' ttxolil ex mi jun xjal cnajal tuj. 12Mlay ten juntl maj jun cyrey tu'n tcawin cyibaj tnam, cycyakil ke nejenel cyxol che bel naj. 13Tuj cyja ke cyrey che tzajel ch'iy ke ch'i'x, ex cyuj ke ja ma' cywa'l te cycolbil cyib che tzajel ch'iy ke tkan la tuc'ix ch'i'x c'ul. C'oquel te cynajbil wech ex te cyewbil cyib ke chyu'j avestrús. 14C'oquel cyuc'in cyib ke jil najl tuj tzkij tx'otx' cyuc'il ke xo'j, ex ke chip te tjak' c'ul ctzajel cytxco'n ke cyuc'il. Atzun cnajal ju lab in xobtzan konic'an ex cnetel jun lugar tu'n jatum tu'n tojlan. 15Atzun cbantel cyk'u' ẍin, cbel cyjos, che jawil pok'l ke cyal ex che oquel cychmo'n tu'n cyoc cycwentin. Ex ax c'oquel cychmon cyib ke k'anjan, jun tman ex jun ttxu'. 16Cyque'yincxe tuj libro te Kman ex cysch'i'n jawe: Mi jun cyxol ke jil lu cyjel naj ex minti' jun ctel minti' tmoj, porque axte Kman ma cub ximante te ex tu'n T-xew che bajel tchmo'n. 17Ex teyle junjun ma txi tk'o'n tlugar jatum tu'n tten tuj, axte ma cub echante cytx'otx' ex te jumajx che najal tuj; tuj tcyakil tabk'iyil te jumajx che najal tuj.

will be added

X\