1 C'oquel jun rey ccawil tuj tumelxix, ex ke nejenel che cawil tuj tumelxix. 2 Teyle junjun cye che oquel ic tza'n jun lugar te cycolbil cyib xjal oc ttzaj cyk'ik', ex ic tza'n jun cycolbil cyib te cyk'ik' jbal; ic che oquel ic tza'n jun tbeyil a' in pon te a'lbil tuj jun tzkij tx'otx' ex ic che oquel ic tza'n t-xlecumal jun nintz pic tuj jun lugar tzkij tx'otx'. 3 Mlay moẍxix cywitz keju in che que'yin, ex keju in che bin, cbel cyk'o'n cywi' ti'j tu'n cybinte ju yol. 4 Mya nok tu'n cyex twitz cbantel jun ti'xti cyu'n, nok o'cx cbantel cyu'n tuc'il nabl, ex ke xjal ẍt'ab che yolin, che yolil clarxix wen. 5 Aju xjal minti' tnabl, mlay cyma xjal ti'j ka mejor tmod, ex mlay cyma xjal ka ma' toclen jun xjal jawni twitz tu'n tbinchante mya ba'n. 6 Porque aju xjal minti' tnabl in yolin ti'j ju yol minti' tnabl ex in cub t-ximan jun ximbetz mya ba'n; toc tilil tu'n tu'n tbinchante jun il ma'xix ex in nic'an yol ti'j Kman; minti' in xi tk'o'n ch'in twa ju xjal at we'yaj ti'j ex minti' in xi tk'o'n ch'in tc'a aju at txketle'n ti'j. 7 Aju xjal jawni twitz tu'n tbinchante mya ba'n nim in sbun, ex in baj t-ximan ti'j tu'n tbinchante mya ba'n; toc tilil tu'n tu'n tbinchan mya ba'n tuc'il nic'aj yol cyi'j ke meba xjal; ax icx in tbinchan cyi'j ke xjal ch'in cyoclen, akeju in che kanin tu'n t-xi bincha'n cyi'j. 8 Atzun ke xjal ba'n cynabl, in baj cynac'u'n ti'j tu'n cybinchante ju ba'n, ex wa'lxix ke tuj cynabl ba'n. 9 Akeye xu'j minti' cyaje ti'j aju tzul, cybintze aju cxel nma'ne cyeye: Akeye xu'j k'ukl cyc'u'je, cybintze ke nyole: 10 Ja'lo k'ukl cyc'u'je, pero te tibajxi ch'intl jun abk'i, ctzajel tchiylal cyi'je, porque cbajel tk'ijlalil twitz awal ex mlay che chmone mastl ti'j twitz uva. 11 Akeye xu'j minti' cyaje ti'j aju tzul ex minti' ch'in cybise, che lu'lune; akeye k'ukl cyc'u'je, tzajx tchi cyi'je, cyi'n ele tbanil xbalun toc cyi'je ex cyk'on oque xbalun ch'i'x twitz te jun techal cybise. 12 Cyk'ajtza'n oque ttzi cyxu'que tu'n ta'w c'ixc'oj, tu'nju che najel ke cojbil tbanilxix ex ke tkan uva in cyk'o'n nim cywitz. 13 Ctzajel ch'iy tkan ch'i'x ex chc'ul tuj tnam etzan wu'ne ex cyuj cycyakil ke ja ate' tuj tnam jatum at nim tzalajbil ex achbil. 14 Cyjel tcolin tja rey, ex ju nintz tnam jatum ate' nim xjal, minti' xjal cyjel ten tuj, ke ja ma' cywa'l te cycolbil cyib xjal che cyjel colin te jumajx, ex atzun che tel ke bur te tjak' c'ul tuj ex c'oquel te cywabl alumaj. 15 Pero ctzajel tk'o'n Kman T-xew tu'n tten juntl maj kuc'il; aju tzkij tx'otx' c'oquel juntl maj te cojbil ex aju cojbil c'oquel ic tza'n jun nmak chc'ul tbanilxix. 16 Tuj tcyakil lugar cbinchetel aju tz'aklxix ex aju tuj tumelxix. 17 Octzun tbinchet aju tz'aklxix, bi'x cwebel k'oj, che tel xjal tuj tzalajbil ex bi'x ckebil cyc'u'j te jumajx. 18 Ke xjal etzan tu'n Dios che tel tuj txubtxaj, ex che najal cyuj ke ja segurxix te ojlabl. 19 Masque bi'x ma che baj naj ke tze' tuj chc'ul tu'n sakbakun ex masque bi'x ma naj tnam, 20 atzun cyeye che tele tuj tzalajbil, ctel nim a' te a'lbil cyawale ex che tzokpetel cyburre ex ke cywacẍe tu'n cyxi' wa'l.
