1 Ay bec'bil cywitz ke xjal in che'x tuj Ejipt jyolte onbil, keju nno'c ke' cyc'u'j cyi'j ke chej, keju in ke' cyc'u'j tu'nju at nim cycarwaj at ma chixin ex tu'nju nimxix cyipun ke soldad cyjax cyibaj cychej aj Ejipt. Tu'ntzun jlu minti' nna'jtz cyi'j tuc'il ju Dios Xjan cye aj Israel ex minti' in xi cykanin onbil te Kman. 2 Pero ax icx te Dios nimxix tnabl at, ex jacu tzaj t-sama'n ju yajbil, ex oc tmante jun tyol syempr in japun tu'n; cbel tk'o'n cycastiw ke binchal mya ba'n, cyuc'ix keju onil cye binchal il. 3 Ke aj Ejipt, xjal ke ex mya Dios ke; ke cychej at cychibjal ex mya xewbaj ke. Cbel tk'o'n Kman cycastiw, tza'nxix ju tnam Ejipt in colin, ax icx ju tnam in clet tu'n, junx che najel cycabil. 4 Chi Kman tzaj tma'n weye: Ic tza'n jun balun otok cub jun ẍne'l tu'n, minti' in tzaj cychi pastor ti'j masque baj cychmon cyib cycyakil tu'n cyoc ten sec'pulte te tu'n tk'ajk'ajel cywi' oc cyjaw sch'in, cyja'xtzun, oc tul Kman aju Tajaw Tcyakil twi witz Sión, tu'n tcolin cyi'j ke xjal etzan tu'n. 5 Ic tza'n jun chyu'j cwentin tk'u' tu'n ex in lipan tibaj, cyja'xtzun ccolol Kman aju Tajaw Tcyakil ti'j tnam Jerusalén; c'oquel tcwentin, ccletel tu'n, ccolil ti'j ex ctzokpetel tu'n. 6 Akeye aj Israel, cyajtz meltz'aje tuc'il Dios aju ma tz'el cypa'n cyibe ti'j. 7 Porque tuj tk'ijlalil tzul c'elel cyic'une ke tilbilal k'an pwak ex sak pwak cytx'otx'il, akeju tu'nx cyk'abe e bant tu'n cybinchane il. 8 Che bel byo'n aj Asiria tu'n spad, pero mya tu'n tipumal jun xjal. Tuj k'oj lu che elel ok ke cysoldad aj Asiria, ex ke cu'xun nim cyipun tu'n cyk'ojin che oquel te majen; 9 tu'nju tchiylal lu c'elel ok cyrey aj Asiria, ex cyjel cycolin ke capitán cybander oc cyel ok ti'j. A jlu a Kman in k'mante, ka tuj tnam Jerusalén at jun k'ak' tu'n tcub cycastiw ke aj k'oj.
