ISAÍAS 30

1Chi Kman in tma'n: Ay bec'bil cywitz ke c'wa'lbaj miban che bin, in cub cyximan alcye tu'n tbant cyu'n, pero minti' in tzaj cykanin weye ex in moje' jun cyyol cyuc'il mastl xjal minti' o txi nma'ne cye tu'n cybinchante, ex tu'ntzun jlu in chmet nimxix il cyu'n. 2Jurat naj in che'x tuj Ejipt ex minti' in tzaj cykanin weye, in che jyon colbil cye tuc'il rey Faraón ex in ke' cyc'u'j ti'j tnam Ejipt tu'n cyclet. 3Pero aju colbil cyeye tuc'il rey Faraón mlay japun, ex aju nno'c ke' cyc'u'je cyi'j aj Ejipt, c'ajbel te jun xitbil cyeye. 4Masque otok che'x cysama'n ke xjal ma' cyoclen tu'n cyyolin cyuc'il aj Ejipt max tuj tnam Zoán ex Hanes, 5cycyakil cbel cych'ixwi tu'n tnam lu aju minti' tajben ex minti' onbil tu'n, ax icx minti' jun ba'n cbinchanjtzel cyeye tu'n, nok o'cx bis ex ch'ixbajil tzul tk'o'n cyi'je. 6Jun yol tzaj k'ma'n cyi'j ke txcup tuj tx'otx' Néguev: In che bet xjal tuj jun lugar xobajil jatum in che tzanun ke balun, ex jatum ate' ke lobaj k'anti' ex ke lobaj ba'n che lipan, in xi cyi'n xjal cypwak ex cyk'inumabl ttzal cyi'j ke chej bur ex cyibaj ke chej camey tu'n tpon cyi'n tuj Ejipt, aju tnam minti' tajben cye, 7minti' tipumal ex mlay bant tu'n tk'onte onbil. Tu'ntzun jlu ma tz'oc nk'o'ne tbi cyja': Jun ma' txcup in tzanun wen, pero minti' ch'in in bant tu'n. 8Ttzaja ja'lo ex tz'ibancuya twitz jun tz'lom, k'on cu'xa tuj jun libro, tu'ntzun tcyaj ten tu'n tajben te tibajxi ic tza'n jun yol minti' bajsbil te. 9Ke xjal lu miban che bin, minti' in japun ju yol cyu'n ex minti' cyaj tu'n t-xi cybi'n aju xnak'tzbil tu'n Kman. 10In xi cyma'n cye ke xjal ba'n che nabin: Cuchiwt mi'n tzaj yec'un jun ti'xti cyeye ic tza'n tuj witzic', che chi, ex in xi cyma'n cye cyja': Mi'n tzaj cytx'olba'ne ju yol ax toc keye; cymantze jun yol in ko tzalaje ti'j ex mi'n tzaj cyma'ne jun yol axix toc. 11Cypa'n el cyibe ti'j ju be ex mi'n che bettle tuj be ax toc, mi'n che yoline mastl ti'j ju Dios Xjan cye aj Israel, porque mi'n kajtle ko bine ti'j, che chi xjal. 12Tu'ntzun jlu in tma'n aju Dios Xjan cye aj Israel: Nne'l cyic'une aju yol in xi k'ma'n cyeye ex nno'c ke' cyc'u'je ti'j pwak nne'l cyxc'ayine cyi'j xjal, tuc'ix ti'j ju mya ba'n in cybincha'ne, ex cyi'jtzun jlu nno'c ke' cyc'u'je; 13cyja'tzun akeye at cyile tu'n tlaj jlu. Ic cytene ic tza'n jun muro o txi pax ex minaben jacu cub tilj; 14che najele ic tza'n in cub buchj jun c'il, bi'x in cub buchj tcyakil ex misicyer jun piẍ ttx'akan in cyaj ten tu'n tajben tu'n tetz k'it xk'a'l tuj k'ak', ex ka tu'n tjatz palut ch'in a' tuj xoch. 15Chi Kman aju Dios Xjan cye aj Israel: Ka ma che ajtz meltz'aje wuc'ile ex ka ma che cub txuleye, octzun che cletele. Ka ma che cub txuleye ex ka ma ke' cyc'u'je wi'je, octzun cyc'ma'ye cyipumale. Atzun cyeye minti' in cub tuj cywitze, 16ex o cymaye cyja': Mi'n, mas ba'n tu'n kxi oke cyibaj chej, che chiye. Ba'n, il ti'j tu'n cyel oke. Ex cymatle: Ko elex oke cyibaj ke chej cyuw che bet. Ba'n, pero ax cyuw che bet keju che oquel lpe' cyi'je tu'n tcub cyi'je cyu'n. 17Jun mil cybete c'elel ok tu'n jun xjal in xobtzan cyi'je, ex cycyakile che elel oke cyu'n jwe' ocxi cycyaj tene mya nim cybete, ic tza'n in cyaj ten jun tze' twi witz ex ka ic tza'n in cub k'o'n jun bander twi' jun tal witz. 18Cyja'tzun in ayon Kman cyi'je tu'n ttzaj k'ak'an tc'u'j cyi'je, ex nimxix tajbil tu'n t-xi tyec'un tc'ujlalil cyeye, porque ate Kman jun Dios tz'aklxix. At nim tzalajbil cye cycyakil keju in ke' cyc'u'j ti'j. 19Akeye aj Sión najlkeye tuj Jerusalén: Mlay che ok'e mastl. Ctzajel tz'e'y tc'u'j Kman cyi'je oc tbinte in che sch'ine ex in che kanine onbil, ex o'cx oc cybinjtze tu'n, che tzajel tzak'we'ne tu'n. 20Ex masque tzaj tk'o'n Kman cyeye aju c'ixbisabl ex yajbil, mlay txi tewan mastl tib cywitze aju xnak'tzal cyeye, ex oc cyila'ye cyu'n ke tbak' cywitze. 21Ex ka ma che'xe tuj be, ka tuj bank'abaj ex ka tuj nayaj, oc cybi'ye jun tk'ajk'ajel cyi'jtzeye in tma'n cyja': Lu ju be lu, cyxi'ye tuj. 22Ex c'elel cyic'une ke tilbilal nno'c cydiosine, c'oquel cyk'o'ne te tz'il ex c'elex cyxo'ne, ic tza'n tz'is. 23Ctzajel tk'o'n Kman jbal tibaj cyiyaje ma cu'x cyawa'ne ex ctzajel tch'isan tx'otx' nimxix triw ex tbanilxix. Tuj tk'ijlalil lu ctel nim lugar cye cyalune jatum tu'n cywa'n tuj. 24Cyuc'ix ke wacẍ ex ke chej bur, akeju in che ch'oquin tuj cycojbile, ctel cywa tbanilxix ex cheba binchamaj. 25Oc tpon tk'ijlalil tu'n cybyet nim xjal ex oc cycub xitj ke ja ma' cywa'l te cycolbil cyib xjal, che jawil jlet ke nima ex cbetel nimxix a' cyuj tk'ab xak cywi' ke nmak witz ex cywi' ke tal witz. 26C'oquel tpotzin Kman ẍil toc cyi'j ke xjal etzan tu'n ex c'oquel tk'anan aju ẍil tu'nx oc tk'o'n. Aju t-spic'umal xjaw c'oquel ic tza'n t-spic'umal k'ij, ex aju k'ij oc tk'a' t-spic'umal nimxix wen ic tza'n tu'n tc'ant t-spic'umal wuk k'ij junx. 27Cyque'yinxe, twitzel Kman cyja' ttzaj najchak tuc'il nimxix tk'oj, ic tza'n txkan sib nimxix wen, in yolin tuc'il nim ttx'u'jil, aju tyol mer ic tza'n jun k'ak' in baj tz'e'y tcyakil tu'n, 28aju t-xew mer ic tza'n jun nima in ch'iy nimxix ex in japun max tjak' tkul jun xjal; tzul tu'n cybaj tchito'n ke nasyon ic tza'n tu'n sarand, tu'ntzun cynaj ex tu'n tocx tk'o'n jun pren tuj cytzi' ke xjal tuj nimcu tnam, tu'n cyel tzpet tu'n. 29Atzun cyeye, che bitzale ic tza'n tuj jun nink'ij xjan te konic'an; ctzalajel cyanmiye ic tza'n jun xjal in bet tuc'il tk'ajk'ajel twi xux tu'n t-xi' twi witz etzan tu'n Kman, jatum in che clet aj Israel. 30Ck'ajtel Kman tu'n tbinjtz tk'ajk'ajel twi' ma'xix t-xilen, ex ctzajel tyec'un tipumal tuc'il ttx'u'jil xobajilxix, tuc'il k'ak' aju in baj tz'e'y tcyakil tu'n, tuc'il tkan k'ancyok, ex tuc'il jbal ex sakbakun. 31Porque oc cybinte aj Asiria tk'ajk'ajel twi Kman ex oc tcub cycastiw, ctzajel nimxix cyxobil, 32ex teyle junjun maj, oc tcub tk'o'n Kman cycastiw, che oquel k'ajtza'n ke tampor ex ke chnab arpa. Cyuwxix c'oquel ten Kman k'ojlel cyi'j. 33Ma bant-xi nim tyemp banimaj jun lugar te cyrey aj Asiria in c'ant tuj tu'n nimxix si', ma' twitz ex ma'xix t-xe', cjawil t-xupin Kman tu'n tc'ant ic tza'n txkan asufre in c'ant ex in bet ic tza'n jun nima.

will be added

X\