ISAÍAS 3

1Tz'elx cynic'e ti'j. Ate Kman aju Tajaw Tcyakil, c'elel ti'n cye aj Jerusalén ex cye aj Judá tcyakilju in ke' cyc'u'j ti'j, tuc'ix tcyakil cywa ex tuc'ix a'. 2Ax icx che najel xjal tu'n, akeju cyuw cyc'u'j tuj k'oj, cyuc'ix keju elni ke twitz k'oj, cyuc'ix ke jwes ex keju nno'c cyk'on cyib te t-sanjel Dios, cyuc'ix ke xjal ba'n che k'ijin, cyuc'ix ke cytijil xjal, 3cyuc'ix ke capitán, akeju at 50 soldad tuj cycwent, cyuc'ix ke nejenel ma'xix cyoclen, cyuc'ix keju ba'n che k'on consej, cyuc'ix keju at cynabl tu'n tbant tcyakil txcaj ak'untl cyu'n, ex ke chman, 4ex c'oquel tk'o'n Kman ke cu'xun te nejenel cyxol, ex ke c'wa'l che cawil cyibaj. 5Aju cbajel tuj tnam atzun jlu: Che oquel ten xjal yajlal jun ti'j juntl, ax icx ke xjal cyvesin cyib che oquel tzokpaj jun ti'j juntl. Cjawil cyi'n cyib ke cu'xun cyi'j ke tij xjal, ex ke xjal minti' cyoclen cjawil cyi'n cyib cyi'j ke xjal ma' cyoclen. 6Tuj ju k'ij lu cxel tma'n jun xjal te terman ax tuj tja cyman: Teya at t-xbaluna, cyja'tzun toca te nejenel kxole ex cawina kibaje cyxol ke ttx'akan ja lu, chilo. 7Atzunte terman cxel ttz'ak'we'n cyja': Mlay bant tu'n wonine cyeye ti'j ju mya ba'n ma tzaj cyi'je, minti' nwaye at tuj njaye ex minti' nxbalune tu'n toc nk'o'ne. Mi'n chin oc cyk'o'ne te nejenel cye tnam xjal, chilo. 8Ax toc ma naj tnam Jerusalén ex aju tnam Judá ma cub xitj, porque in che yolin mya ba'n ex in cybincha'n mya ba'n ti'j Kman ex minti' tchiylal tajwalil Kman tuj cywitz. 9Ax cywitz in yec'unte ti'j cyil; minti' in cub cyewan cyil; ic cyten ke ic tza'n ke xjal aj Sodoma, in xi cyyec'un cyil cye cycyakil xjal. Bec'bil cywitz porque cyu'nx in tzaj cyi'n castiw cyibaj. 10Cymanxe cye ke xjal tz'aklxix: Tcyakil c'elel ba'n te cye ex che tzalajel ti'j twitz cyak'unben. 11Ay bec'bil cywitz ke xjal binchal mya ba'n, porque tcyakil c'elel mya ba'n te cye. Cxel k'o'n chojbil cye ic tza'n cyak'unben mya ba'n. 12Cyuwxix in che cawin ke c'wa'l cyibaj ke ntanmile ex aju cawbil tuj cyk'ab xu'j ta'. Akeye ntanmile, cyu'nx ke nejenel ate' cyxole ma che cub sbu'ne ex ma che el tzpete ti'j cybeye cyu'n. 13Ma bant tten Kman tu'n cyoc ke xjal tuj xjel tu'n, ma bant tten tu'n tcub tk'o'n cycastiw xjal ate' cyuj nimcu tnam. 14Cbel tk'o'n Kman cysentens ke cytijil xjal ex ke nejenel cye xjal etzan tu'n, ex cxel tma'n cye cyja': Cyu'ne ma che baj naj ke tkan uva etzan wu'ne; ma tz'el cyelk'a'ne aju at cye ke meba ex aju ma tz'el cyelk'a'ne ma tz'ocx cyc'u'ne tuj cyjaye. 15¿Ti cyoclene tu'nju in baj cyyajla'ne ke xjal etzan wu'ne ex in baj cywabane ke xjal meba? Chi Kman in tma'n, aju Tajaw Tcyakil. 16Ax icx in tma'n Kman cyja': Ke xu'j aj Sión in jaw cyniman cyib ex tjaw cywitz twitz cya'j oc in che bet in che xmutxben tuj cywitz xinak, ch'in t-xol cykan oc in che bet ex in che chilin ke adorn cyoc ti'j cykan, 17cyja'tzun cbeletz pulj ttzmal cywi' tu'n tx'a'c wu'ne ex bi'x ctzajel cych'ixwi oc cyoc que'yin minti' cyxbalun toc, chi Kman. 18Tuj tk'ijlalil tzul, che najel cycyakil ke adorn lu tu'n Kman: Ke adorn nno'c cyk'o'n ti'j cykan, cyuc'ix keju in che oc ten ti'j cywi', cyuc'ix uwj, 19ke tuj ẍcyinbaj, ke tkul k'abaj ex ke xbalun te txaybil cywitz, 20ke c'albil cywi', ke tal caden toc te adorn ti'j cykan, ke c'albil cyc'u'j, ke tal botey tcu'x perjum cyuj, ke pwak toc cyi'j xjal tu'n mi'n cyoc cy'a'n, 21ke xmulk'abaj, ke adorn nno'c ten ti'j cytxa'n, 22ke cyxbalun tbanilxix, ke xbalun in ajben cyu'n te cyxmuj, ke xbalun in ajben te txaybil cyi'j ex ke pa, 23ke respej, ke xbalun tbanilxix, ke si'pj ex ke xbalun xaxj. 24Te t-xel perjum ctel ttzuwil; te t-xel c'albil cyc'u'j, c'ajbel jun sakbak; te t-xel puro xeban cywi', cbeletz pulj ttzmal cywi'; te cyxel ke xbalun tbanilxix, c'oquel cyk'o'n xbalun ch'i'x twitz cyi'j, te t-xel mejor che que'yin, c'oquel k'o'n marc cyi'j tu'n c'uxbil in sc'olin tu'n k'ak'. 25Atzun ke xinak aj Jerusalén che bel byo'n tu'n spad, ke xinak elni twitz k'oj che najel tuj k'oj. 26C'oquel ok'el ex bis tuj tnam ex te jumajx cyjel colin.

will be added

X\